Inaksyunan na ni Pangulong Rodrigo Duterte ang sigalot sa DILG o Department of Interior and Local Government, sa ginawang pulong ng gabinete, kagabi.
Kaugnay ito sa umano’y confidential memorandum para sa Pangulong Duterte ng tatlong undersecretary ng DILG laban kay Secretary Mike Sueno dahil sa reklamong pag-abuso sa kanyang kapangyarihan bilang kalihim.
Bagamat hindi direktang kinumpirma, sinabi ni Justice Secretary Vitaliano Aguirre na naapektuhan si Sueno sa pulong at hindi na dapat nangyari ang naturang problema.
PAKINGGAN: Bahagi ng pahayag ni Justice Secretary Vitaliano Aguirre
Una rito ay nanindigan si Interior and Local Government Secretary Ismael ‘Mike’ Sueno na pinupolitika siya ng tatlo niyang undersecretary.
Ito’y para isulong aniya ang pagpapatalsik sa kaniya sa puwesto para i-upo bilang kalihim si TESDA Director General Guiling Mamondiong.
Sa panayam ng DWIZ kay Sueno, itinanggi nito ang paratang nila Interior undersecretaries John Castriciones, Jesus Hinlo at Emilie Padilla na umabuso siya sa kapangyarihan para magpayaman.
Giit ni Sueno, hindi niya kailanman ginamit ang kaniyang mga naging posisyon sa gobyerno sa matagal na panahon para sa sariling interes.
Kaya naman, ipina-uubaya na ni Sueno sa Pangulo ang gagawin niyang aksyon hinggil sa reklamong ibinato ng grupo ng mga nabanggit na opisyal laban sa kalihim.
By Katrina Valle | Balitang Todong Lakas (Interview) | Jaymark Dagala