Ipinamamahagi na ng Department of Finance (DOF) ang unang tranche ng pinansiyal na ayuda para sa mga middle class workers na nagtatrabaho sa mga maliliit na negosyong apektado rin ng krisis sa coronavirus disease 2019 (COVID-19).
Ayon kay Finance Assistance Secretary Toby Lambino, sinimulan ang distribusyon para sa wage subsidy sa ilalim ng small business wage subsidy (SBWS) program, kahapon, Abril 30.
Aniya, tuloy-tuloy ang pagta-transmit ng unang tranche ng pinansiyal na ayuda sa pamamagitan ng iba’t ibang bangko at remittance centers hanggang Mayo 15.
Habang ipamamahagi naman ang ikalawang tranche mula mayo 16 hanggang 31.
Sa ilalim ng SBWS program, makatatanggap ng lima hanggang 8,000 wage subsidy ang mga kuwalipikadong manggagawa batay sa buwanang minimum wage sa partikular na rehiyon.
Una na rin pinalawig ng DOF hanggang Mayo 8 ang aplikasyon para sa SBWS program kasunod ng pagkakaroon ng technical problem sa website ng Social Security System (SSS).
