Tuluyan nang ipinasasara ng Food and Drug Administration o FDA ang kumpanyang nagsusuplay umano ng mga pekeng rabies vaccines sa mga ospital.
Inilabas ng ahensya ang kautusan matapos ang kanilang isinagawang imbestigasyon hinggil sa ulat ng Medical City na nakabili sila ng palsipikadong rabbies vaccines mula sa Geramil Trading, na isang wholesale distributor at may lisensya mula sa FDA.
Halos wala umanong pinagkaiba sa original ang fake vaccine, maliban lamang sa registration number ng label nito.
Ayon sa pribadong pagamutan, halos dalawang libong pasyente ang kailangan nilang isailalim sa eksaminasyon makaraang maturukan ng pekeng vaccine.
Sa ngayon nahaharap na ang Geramil Trading sa patung-patong na criminal charges.
Inihayag naman ni Health Undersecretary Eric Domingo, na hindi na pinahihintulutang mag-operate ang Geramil Trading matapos itong tanggalan ng lisensya.
