Ipagpapatuloy ng CALABARZON chapter ng transport group na Piston ang panawagan nito sa pamahalaan na alisin ang excise tax sa langis at ibasura ang Oil Deregulation Law.
Ito ang sinabi ni Starter Piston Secretary General Miguel Portea matapos ang kanilang dalawang-araw na nationwide transport strike.
Ayon kay Portea, hindi sapat ang mga rollback sa presyo ng produktong petrolyo, partikular na sa diesel.
Paliwanag niya, maaari lamang umanong bawiin ng mga oil company ang ibinabang presyo sa pamamagitan ng muling pagtataas ng presyo kung nanaisin ng mga ito.
Dahil dito, nananawagan ang grupo sa pamahalaan na higit na isaalang-alang ang kapakanan ng mga nasa public transport sector, lalo na ang mga jeepney driver.
Ayon sa grupo, kabilang ang mga traditional jeepney sa may pinakamababang singil sa pamasahe, kaya malaki ang epekto sa kanilang kita ng patuloy na pagtaas ng presyo ng langis. | Sa panulat ni Anjo Riñon
