Nagsumite ng petisyon sa Korte Suprema ang limang technology professionals upang ipawalang-bisa ang ban ng pamahalaan sa social media platform na Discord at iba pang mga website.
Sa inihaing Petition for Certiorari and Prohibition ng mga naturang tech expert, sinabi ng mga petitioner na wala sa saklaw na otoridad ng Department of Information and Communications Technology, at mga kaugnay nitong ahensya tulad ng Cybercrime Investigation and Coordinating Center at National Telecommunications Commission, ang utos na i-ban ang Discord at ang isa pang social media platform na Reddit.
Kabilang sa mga petitioner ang tech entrepreneur at content creator na si Carlo Ople; tech businessman at white hat hacker na si Eliezer “Eli” Rabadon; PayMongo co-founder at law student na si Francis Plaza; BetterGov.ph co-founder Christopher Star; at intellectual property at tech lawyer na si Atty. Arjel De Guzman.
Respondent naman sina DICT Secretary Henry Aguda; CICC Executive Director Renato “Aboy” Paraiso; at NTC Commissioner Ella Blanca Lopez.
Ayon sa mga petitioner, hindi dapat gamitin ang krusada ng pamahalaan kontra cybercrime bilang instrumento upang buwagin ang tinatawag nilang “digital public square.”
Matatandaang nagpatupad ng restriction ang DICT sa Discord at Reddit matapos ang mga insidente ng karahasan sa mga paaralan kamakailan. | Sa panulat ni Anjo Riñon
