Ikinasa na ang ikalawang araw na tigil-pasada ng grupong Pinagkaisang Samahan ng mga Tsuper at Operator Nationwide o PISTON ngayong araw.
Ayon kay PISTON National President George San Mateo, naging matagumpay ang unang araw kaya’t umaasa silang ganito pa rin ang magiging resulta ng kanilang kilos protesta ngayong Martes.
Sa Monumento area sa Caloocan City, maagang dumating ang mga driver at operator na miyembro ng PISTON para mag-protesta.
Bitbit ng protesters ang mga streamer kung saan nakasulat ang mga katagang “Jeepney phaseout: masaker sa kabuhayan ng mga driver at operator”.
Kasabay nito, nananatili namang handa ang gobyerno na magbigay ng ayuda sa mga apektadong pasahero.
Nagbibigay pa rin ng libreng sakay ang MMDA sa mga Monumento, SM Marikina, Luneta parade grounds, Hong Kong Plaza Southwest Terminal, Camp Aguinaldo, Orense – Guadalupe at UP Technohub sa Quezon City.
Nakaalalay din ang mga pribadong bus at iba pang sasakyan sakaling kailangan.
Samantala, inihahanda na ng Land Transportation Franchising and Regulatory Board o LTFRB ang mga kasong isasampa laban sa ilang driver at operator na nakiisa sa kilos protesta ng PISTON.
Ayon kay LTFRB Board Member Atty. Aileen Lizada, kinukuha na nila ang mga detalye ng mga miyemrbo ng grupo na nanguna at nakiisa sa tigil-pasada.
Ilan aniya sa mga driver ay nangharang pa ng ibang tsuper para makiisa sa kanila.
Dahil dito, sinabi ni Lizada na hindi lang basta prangkisa ang nakataya dito kundi posible rin silang maharap sa kasong kriminal.
Kaugnay nito, sinuportahan naman ni Transportation Secretary Arthur Tugade na kasuhan ng economic sabotage ang mga miyembro ng PISTON.
Tinawag pa ni Tugade na selfish at small minded ang PISTON na nagsasagawa ng dalawang araw na tigil-pasada.
—-
