Walang kinalaman si dating Pangulo at ngayo’y Pampanga Representative Gloria Arroyo sa impeachment complaint laban kay Chief Justice Maria Lourdes Sereno.
Tugon ito ni Atty. Larry Gadon sa naging alegasyon ni political analyst Professor Ramon Casiple na posibleng nagagamit si Gadon ng kliyente nitong sina Arroyo at dating Chief Justice Renato Corona.
Ayon kay Gadon, bagama’t siya ay abogado ni Arroyo ay personal naman niyang adbokasiya kaya nais niyang mapaalis sa puwesto ang Punong Mahistrado.
Hindi rin niya ikinakaila ang pagiging close sa pamilya ni Corona ngunit wala rin aniya itong kinalaman sa impeachment ni Sereno.
Dahil dito, binanatan ni Gadon si Casiple sa pagsasabing resulta lamang ito ng wild imagination ng propesor.
Aniya, malaking insulto rin ito sa House Justice Committee na nakakita ng sufficiency in substance and form sa kanyang inihaing impeachment.
—-
