Nanawagan si Senador Risa Hontiveros sa gobyerno na makialam at tumulong sa pagpapabilis ng pagpapalaya sa singer na si Mark Mabasa, anak ng pinaslang na brodkaster na si Percy Lapid, na kasalukuyang nasa kustodiya ng U.S. Immigration and Customs Enforcement sa California.
Ayon kay Sen. Hontiveros, hindi dapat matagal na nakapiit si Mabasa habang hinihintay ang kanyang asylum application, lalo na’t hindi pa naisiwalat ang dahilan ng kanyang detensiyon.
Nakipag-ugnayan na rin umano si Sen. Hontiveros sa mga kinatawan ng Pilipinas at Amerika, kabilang ang Philippine Ambassador sa U.S. Jose Manuel “Babes” Romualdez at Philippine Consul General sa Los Angeles Adel Cruz.
Samantala, sinabi ng konsulado na nakapagsagawa na ito ng welfare check kay Mabasa at handa itong magbigay ng angkop na tulong ayon sa batas ng U.S.
Iginiit ng mambabatas na dapat makialam ang gobyerno dahil matagal nang humihingi ng proteksiyon ang pamilya Mabasa matapos ang pagpaslang kay Percy Lapid. | Sa panulat ni Reabelle Medina
