Nagtalaga ang Korte Suprema ng mga Regional Trial Court na magsisilbing special courts na hahawak ng mga kasong may kinalaman sa katiwalian sa mga infrastructure project sa ilalim ng anti-graft laws.
Kabilang dito ang tig-lilimang RTC sa National Capital Region, at Region 3; tig-aapat naman sa Regions 4-A, 5, 7, at 11.
Sakali namang walang special court sa isang lugar, ang kaso ay ire-refer naman sa pinakamalapit na judicial region na may special court.
Sinabi ng Kataas-taasang Hukuman na sasailalim sa special training ang mga hukom na nakatalaga sa special courts, sa pangunguna ng mga Associate Justices ng Sandiganbayan, sa pamamagitan ng Philippine Judicial Academy.
Sakop sa training ang mga batas tulad ng RA 7080 o Plunder Law, RA 3019 o Anti-Graft and Corrupt Practices Act, patakaran sa pagpyansa sa plunder cases, evidentiary rules sa anti-graft cases, cyber warrants, at forensic evidence.
Ipinaliwanag ng Supreme Court na may exclusive original jurisdiction ang RTC sa ilalim ng Republic Act 10660 kung ang graft case ay hindi nagdudulot ng pinsala sa pamahalaan, walang panunuhol, o kung ang transaksyon ay hindi lalampas sa isang milyong piso.
