Nanawagan ang isang environmental group na itigil ang pagmimina sa Mt. Hamiguitan Mountain Range, isang protektadong lugar at UNESCO World Heritage Site, matapos lumantad ang pagkasira ng bundok sa Davao Oriental.
Ayon sa Interfacing Development Interventions for Sustainability, maihahalintulad ang Mt. Hamiguitan sa Sierra Madre ng Luzon dahil sa mahalagang papel nito sa pagbabawas ng epekto ng kalamidad, lalo na sa panahon ng bagyo at pagbaha. Sagana rin ito sa biodiversity at nakakatulong protektahan ang mga komunidad sa Davao Oriental, kabilang ang Mati City, Governor Generoso, at San Isidro.
Ngunit nagiging banta umano sa kabundukan ang pagmimina, partikular sa Barangay Macambol, Mati City. Noong October 2025, naglabas ang pamahalaang panlalawigan ng larawan na nagpapakita na tinatayang 200 hectares o ektarya ng Mt. Hamiguitan ang nasira dahil sa pagmimina.
