Malayang makakausad ang impeachment complaint laban kay Vice President Sara Duterte sakaling may maghain ng kaso kapag lumipas na ang one-year bar rule ngayong Pebrero a-sais.
Ito ang sinabi ni Bicol Saro Party-list Rep. Terry Ridon sa harap na rin ng nakabinbing motion for reconsideration sa Korte Suprema laban sa pagdedeklara sa impeachment case bilang “unconstitutional.”
Para kay Ridon, hindi mapipigilan ang pagnanais ng mga grupo o indibidwal na maghain ng panibagong impeachment complaint laban sa bise presidente.
Dagdag pa niya, hindi pa malinaw kung dapat bang sundin ang umiiral na rules sa impeachment habang hinihintay ang pasya, pero pabor man sa Kamara o hindi ang Supreme Court ruling sa mosyon, mahalaga pa rin na ito ay maresolba.
Layon nitong malaman kung may bagong panuntunan na magsisilbing gabay sa proseso ng kaso.
Matatandaang iniapela ng Kamara ang ruling ng Kataas-taasang Hukuman sa pamamagitan ng Solicitor General kung saan idineklara ang articles of impeachment laban kay VP Sara bilang unconstitutional.
