Kinumpirma ni Justice Secretary Frederick Vida na nagpadala na ang Department of Justice (DOJ) ng subpoena sa Office of the Senate Secretary para hilingin na isumite ang mga dokumentong kaugnay sa imbestigasyon sa nangyaring putukan sa Senado.
Hiniling din ng DOJ sa Senado na ipresenta ang imbentaryo ng baril at security logs ng mga pumasok at lumabas ng Senado noong araw na naganap ang barilan.
Naglabas na rin ng DOJ ng subpoena sa Commission on Audit (COA) para makuha ang mga dokumento upang matukoy kung ilan at sino-sino ang may hawak na armas na nasa Senado.
Pinadalhan din ng subpoena ang pamunuan ng Philippine National Police Firearms and Explosives Office para makuha ang mga papeles at matukoy ang imbentaryo ng kabuuang bilang ng mga armas na nakarehistro sa Senado.
Kaugnay nito, muling ipinaalala ni Frederick Vida ang kaukulang parusa para sa paglabag sa Presidential Decree 1829, o batas tungkol sa obstruction of justice, kung saan maaaring managot at matanggal ang mga opisyal o nakaupo sa pwesto, at hindi na puwedeng maupo sa anumang pwesto sa pamahalaan.—ulat mula kay Jun Samson (Patrol 24)
