Nagbabala ang Cybercrime Investigation and Coordinating Center na ang mga magulang, at hindi ang social media bans, ang unang depensa sa pagprotekta sa mga bata laban sa panganib sa internet.
Ayon kay CICC Undersecretary Renato Paraiso, dapat maging mapagmatyag ang mga magulang sa mga pagbabago sa ugali ng kanilang anak, gaya ng pagiging mailap, palaging may ka-chat, biglang paggaling sa Ingles, at madalas na pagpupuyat, dahil maaari itong senyales ng online grooming.
Binigyang-diin ng CICC na mas mapanlinlang na ngayon ang mga cybercriminal, dahil nagpapanggap silang kapwa bata upang makuha ang tiwala ng kanilang mga biktima.
Payo ng CICC sa publiko na huwag burahin ang mga kahina-hinalang mensahe o chat. Sa halip, itabi ang mga ito bilang ebidensya at tumawag sa CICC hotline number na 1326 para sa agarang aksyon. | Sa panulat ni Reabelle Medina
