Naaalarma ang mga ekonomista matapos makatala ng 75.9% na budget surplus ang pamahalaan noong Oktubre, na magiging mitsa ng mas mababang gross domestic product ng bansa.
Ayon sa Bureau of Treasury, katumbas ito ng 11.2 billion pesos, na halos doble ng naitalang 6.3 billion pesos sa parehong panahon noong nakaraang taon.
Naniniwala si Leonardo Lanzona ng Ateneo de Manila University na ang mas malaking budget surplus ng pamahalaan ay dahil sa iskandalong dulot ng mga maanomalyang flood control project.
Sang-ayon din si John Paolo Rivera ng Philippine Institute for Development Studies, na itinukoy ang October budget surplus bilang resulta ng paghina ng paggastos ng estado dahil sa ibinunyag na katiwalian sa pamahalaan. —Sa panulat ni Anjo Riñon
