Nilinaw ni Justice Secretary Fredderick Vida na nananatiling nakabinbin sa Department of Justice (DOJ) ang mga reklamong Inciting to Sedition at Grave Threats na inihain ng National Bureau of Investigation (NBI) laban kay Vice President Sara Duterte.
Ayon kay Secretary Vida, hiwalay ang naturang proseso sa nagpapatuloy na impeachment trial sa senado kahit parehong may kaugnayan sa umano’y pagbabanta laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Iginiit ng kalihim na ang impeachment ay isang hiwalay na proceedings upang panagutin ang isang impeachable official, samantalang ang DOJ ay humaharap sa posibleng pananagutang kriminal batay sa umiiral na batas.
Kinumpirma ni Secretary Vida na naihanda na ang resolusyon kaugnay ng mga reklamong inihain noong 2025, ngunit nananatili pa itong nasa ilalim ng pagsusuri ng panel of prosecutors. | mula sa panulat ni Jordan Gutierrez
