Inireklamo ni dating Social Welfare Secretary Dinky Soliman si DSWD Assistant Secretary Lorraine Marie Badoy dahil sa kanyang social media post patungkol sa child pornography.
Batay sa isinumiteng liham ni Soliman kay CSC o Civil Service Commission Chair Alicia Bala na may petsang Marso 29, sinabi nito na hindi akma para kay Badoy na maglabas ng saloobing taliwas sa kanilang layunin bilang kumakalinga sa mga mahihirap, babae at mga bata.
Kabilang sa mga post ni Badoy sa social media ay ang patutsada nito sa European Union (EU) na mag-online child pornography na lang ito kaysa sa batikusin ang war on drugs ng administrasyon.
Gayundin ang isa pang post ni Badoy na ayon kay Soliman ay tumutuligsa kay Secretary Judy Taguiwalo dahil sa kabiguan umano nitong protektahan at ipagtanggol ang mga mahihirap.
Giit ni Soliman, dapat isaalang-alang ni Badoy ang karapatan at kapakanan ng lipunang kanyang ginagalawan na siyang pinaglilingkuran ng kagawarang kanyang kinabibilangan.
By Jaymark Dagala
Photo: Facebook/ Lorraine Marie Badoy
