Patay ang dalawang hinihinalang tulak ng droga habang arestado ang siyam na iba pa sa ikinasang buy-bust operations sa Pulilan at Meycauayan sa Bulacan.
Kinilala ni Acting Provincial Director, Sr. Supt. Chito Bersaluna, ang mga napatay na sina Jomari Reyes ng Barangay Paltao, Pulilan; at Julius Siriban ng Barangay Bagbaguin, Meycauayan City.
Nakatunog umano ang dalawa na pulis ang kanilang katransaksiyon kaya nanlaban ang mga ito.
Narekober sa pinangyarihan ng insidente ang isang sachet ng hinihinalang Marijuana, 500 peso bill na buy-bust money, ilang sachet ng umano’y shabu, isang magnum cal. 22 revolver, isang caliber .38 revolver at ilang piraso ng bala.
Sa iba pang operasyon sa San Rafael, Pandi at San Jose del Monte, kabilang sa mga nahuli sina Jerome Evangelista, Arlo John Ebio, Mark Gil Jandayan, Ruben Ibarra, Wilson Lozanta, Nelson Tayag at Alejandro Marasigan.
Sinasabing 30 sachet ng hinihinalang shabu at buy-bust money ang nasabat mula sa mga suspek.
