SPORTS

Susubukan ng Gilas Pilipinas na gibain ang koponan ng Iran sa pagpapatuloy ng FIBA Asia Championship sa Changsha, China.

Ayon sa mga manlalaro ng Gilas, naghahanda na sila sa posibleng pisikalang laro kontra sa defending champion na Iran.

Base sa rekord, dinomina ng Iran ang nakalipas na first round sa kanilang grupo kung saan wala silang talo.

Habang ang Gilas naman ay mayroong isang talo at kinakailangan pa ng adjustment.

By  Rianne Briones 

Ibinuhos ng National University ang buong lakas nito laban sa Ateneo de Manila dahilan upang maitulak sa game 3 ang finals ng V-league Collegiate Conference sa San Juan.

Sinungkit ng Lady Bulldogs ang straight sets victory, 25-22, 25-17, 25-17, kaya’t magkakaroon ng isa pang laro sa susunod na linggo.

Ito ang kauna-unahang panalo ng N.U. laban sa Ateneo sa kasalukuyang torneo habang ikalawang pagkatalo naman ng Lady Eagles.

Si Jaja Santiago ang nanguna sa Lady Bulldogs taglay ang kanyang 13 points.

Dahil sa matinding depensa ng N.U. ay hindi masyadong nakaporma si lady eagles superstar Alyssa Valdez dahil nalimitahan ang score nito sa 9 points.

By: Jelbert Perdez

Isiniwalat ni Top Rank Promoter Bob Arum na posibleng ilatag nila ang laban nina Manny Pacquiao at Amir Khan sa Las Vegas sa katapusan ng Pebrero ng susunod na taon.

Aniya, kung hindi magkakasundo sa naturang petsa ay posible rin itong ikasa sa huling linggo ng Abril 2016.

Ayon kay Arum, si Khan ang numero uno sa listahan ng mga pinagpipilian nila na maaaring makasagupa sa ring ng pambansang kamao.

Sinabi ni Arum na nakikipag-negosasyon na rin ito sa tiyuhin ni khan at abogado nitong si Atty. Robert Davis.

Sinasabing hindi interesado ang kampo ni Khan na harapin si Ruslan Provodnikov.

Gayunman, nagbabala ang trainer ni Khan na si Virgil Hunter na kung gusto ng British boxer na makalaban si Pacquiao ay dapat bawas-bawasan ang kanyang charity engagements.

By: Jelbert Perdez

Sisipa na sa Oktubre 19 ang UAAP Season 78 Beach Volleyball Tournament.

Idedepensa ng Women’s Champions ng university of Santo Tomas at men’s champions ng National University ang kanilang korona sa season opener.

Sa Women’ division, ang UST ay unang sasagupa sa koponan ng Adamson sa naturang torneo.

Samantala, sa men’s division naman ay makikipagsubukan ang defending champions na National University sa Adamson.

By: Jelbert Perdez

Pasok na ang Team Philippines sa second round ng 2015 World Cup of Pools sa London matapos talunin ang Russia.

Napasakamay nina Warren Kiamco at Carlo Biado ang panalo kontra Russian players na sina Ruslan Chinakhov at Kunstantin Stepanov.

Taong 2013 nang maging kampeon ang Pilipinas sa World Cup of Pool sa pamamagitan nina Dennis Orcollo at lee Van Corteza.

Ang sinumang mananalo sa Sweden at England ang kakaharapin ng Pilipinas sa round 2.

By  Judith Larino  

Wala ng aasahang bagong National Sports Training Center o malaking sports complex para sa mga atletang Filipino sa ilalim ng administrasyon ni Pangulong Noynoy Aquino.

Aminado si Philippine Olympic Committee President Jose “Peping” Cojuangco na umatras sila sa planong pagtatayo ng National Training Center dahil sa mataas na renta sa itatayong Clark Green City sa Pampanga.

Ayon kay Cojuangco, masyadong mataas ang renta na 150,000 sa kada ektarya sa loob ng 50 hectare facility.

Gayunman, hindi anya sila sumusuko na matupad ang pangarap na magkaroon ng malaking sports facility katulad ng sa Beijing, China.

Umaasa rin ang PSC na matutupad ito matapos ang eleksyon sa susunod na taon.

By  Drew Nacino  

Inilampaso ng Gilas Pilipinas ang Hong Kong sa 2015 FIBA Asia Championship sa score na 101-50.

Ito ang unang panalo ng Philippine National Men’s basketball team matapos gibain ng Palestine sa unang laro sa FIBA Asia sa Changsha, China.

Sa unang yugto pa lamang ng laro ay gumawa na ng 12-0 run ang Gilas at mula noon ay hindi na ito lumingon.

Kumamada si Jayson Castro ng 21 points habang nag-ambag naman si naturalized player Andray Blatche ng 17 points para sa Pilipinas.

Tumipa rin si Dondon Hontiveros ng 14 points na isa sa mga nakatulong upang mabaon nang husto ang mga Tsino.

Una rito, tinalo naman ng host china ang Singapore sa score na 91-42 habang tinambakan din ng Iran ng 38 points ang Japan.

By  Jelbert Perdez  

Aminado ang isa sa miyembro ng Palestinian national basketball team na hindi nila inasahan na mananalo sila kontra Gilas Pilipinas sa unang sigwada ng 2015 FIBA Asia Championship.

Ayon kay Sani Sakakini, sentro ng Palestinian team, na underdog sila sa laban lalo’t liyamado sa ranking ng FIBA World Cup ang Pilipinas subalit pagdating sa court ay naglaro sila para manalo sa score na 75-73.

Umabot anya ng dalawang linggo ang kanilang preparasyon para sa FIBA Asia Championship na ginaganap sa Changsa, China.

Naniniwala naman ang American coach ng Palestine na si Jerry Steele na isa sa mga rason kaya nanalo sila laban sa Gilas ay ang mga kinakaharap na hamon ng Palestinian team sa kanilang bansa na balot ng kaguluhan.

Bagaman 12 ang required player sa bawat team sa FIBA, 10 ang nasa roster ng Palestine subalit pito lamang ang naglaro laban sa Gilas.

By  Drew Nacino

Bigo ang Gilas Pilipinas sa unang laro nito sa 2015 FIBA Asia Championship sa Changsha, China.

Ito’y matapos padapain ang Philippine National Men’s basketball team ng Palestine sa score na 75-73.

Sa una hanggang sa ikatlong quarter ay naghabol ang mga Palestino, subalit nakadikit ito sa Gilas pagsapit ng ika-apat na quarter.

Ilang segundo ang nalabi sa huling bahagi ng laro ay nakatabla pa ang Palestine sa pangunguna ng isa sa mga pambato nitong si 6’8″ forward Sani Sakakini hanggang sa masungkit ang panalo.

By: Jelbert Perdez