SPORTS

Bigo ang Gilas Pilipinas sa unang laro nito sa 2015 FIBA Asia Championship sa Changsha, China.

Ito’y matapos padapain ang Philippine National Men’s basketball team ng Palestine sa score na 75-73.

Sa una hanggang sa ikatlong quarter ay naghabol ang mga Palestino, subalit nakadikit ito sa Gilas pagsapit ng ika-apat na quarter.

Ilang segundo ang nalabi sa huling bahagi ng laro ay nakatabla pa ang Palestine sa pangunguna ng isa sa mga pambato nitong si 6’8″ forward Sani Sakakini hanggang sa masungkit ang panalo.

By: Jelbert Perdez

Sinupalpal din ni dating Welterweight Champion Andre Berto ang pagiging “walang ka-latoy-latoy” na kalaban ni Floyd Mayweather Junior nang magkaharap sila noong isang linggo.

Ayon kay Berto, inaasahan niyang magiging mainit ang laban subalit nadismaya siya dahil sa pagiging safe fighter nito na sa halip umatake ay mas piniling maging defensive.

Aniya, inakala niyang buburahin ni Pretty Boy ang impresyon na boring itong kalaban matapos ang sagupaan nila ni Manny Pacquiao noong Mayo.

Hindi rin kumbinsido si Berto sa ipinangangalandakan ni Floyd na siya ang “The Best Ever” boxer dahil sa totoo lang ay hindi naman ito malakas sumuntok.

Nagretiro si Mayweather matapos nanalo via unanimous decision si Floyd sa kanilang laban ni Berto at napanatili ang kanyang WBA at the ring welterweight championship.

By  Drew Nacino  

Tila takot umanong malugi si Top Rank Boss Bob Arum sa susunod na laban ni 8 Division Champion Manny Pacquiao.

Ito’y matapos igiit ni Arum na posibleng sa Estados Unidos na ang susunod na laban ni Pacquiao at malabo na itong matuloy sa United Arab Emirates at England.

Sinasabing mas gusto ni Arum na ilatag ang laban ni Pacquiao sa 2016 sa Amerika dahil siguradong tatabo ito ng sangkaterbang pay-per-view sales.

Matatandaang humakot ng 4.5 million buys ang laban nina Pacquiao at Floyd Mayweather, Jr. noong Mayo na nakabasag ng maraming pay-per-view records.

By: Jelbert Perdez

Handang-handa na ang Gilas Pilipinas sa pagsabak sa 2015 FIBA Asia Championship na lalarga simula bukas.

Tatangkain ng Gilas na mag-kampyon sa naturang torneyo upang mag-qualify sa 2016 Rio Olympics sa Brazil.

Kumpleto ang 12-man lineup ng Philippine team nang dumating sa Changsha, China kahapon.

Unang makakasagupa ng Gilas ang Palestine alas-12:00 ng tanghali bukas bago makalaban ang Hong Kong sa Huwebes at Kuwait sa Biyernes.

By  Drew Nacino  

Biyaheng Changsha China na ang Gilas Pilipinas para sa  inaabangang FIBA Asia Championship na magsisimula sa   Setyembre  23 na tatagal hanggang Oktubre 3.

Ayon kay Gilas Coach Tab  Baldwin, hindi nila bibiguin ang expectation ng mga  Pinoy basketball fan.

Sinabi ni Baldwin na gagawin nila ang  lahat  para masungkit  ang gintong medalya at makalusot  sa inaasam na  Rio   Olympics  na  gaganapin sa Brazil sa  susunod na  taon.

Malaking advantage aniy ang mga manlalaro ng Gilas ang  puso ng mga ito sa paglalaro na  hindi trabaho ang  tingin sa  pagbabasketball kundi  isang misyon bilang mga Filipino.

Matatandaang 1972 pa nang huling makapasok ang koponan ng  Pilipinas  sa  Olympics.

By: Ralph Obina

Umalagwa sa huling quarter ang Far Eastern University (FEU) Tamaraws upang lampasuhin ang University of the Philippines (UP) Fighting Maroons, 75-58, sa pagpapatuloy ng UAAP Season 78 men’s basketball tournament sa Araneta Colisuem kahapon.

Dahil sa panalo, kasama na sa standing ang Tamaraws kasama ang UST Growling Tigers at Ateneo de Manila University Blue Eagles na may kapwa 3-1 na kartada.

Naghulog ng 13-2 bomba ang FEU sa gitna ng huling kanto upang palawigin ang 52-47 na kalamangan tungo sa 65-49 na abante.

Nalasap naman ng Fighting Maroons ang ikalawang sunod na talo sa liga at bumagsak sa 2-2 na baraha.

By  Mariboy Ysibido  

Tila tinitiyak na ni Pambansang Kamao Manny Pacquiao na hindi makaka-apekto sa kanyang susunod na laban ang kanyang plano para sa darating na eleksyon.

Ito’y matapos ihayag ni promoter ni Pacquiao na si Bob Arum, na kinausap siya ni pambansang kamao upang siguruhing ang susunod na laban nito ay hindi dapat lalagpas sa ikalawang linggo ng Abril ng susunod na taon.

Anya, ito’y para magamit ni Pacquiao ang mga susunod na linggo sa kanyang pangangampanya para sa eleksyon.

Sinabi naman ni Pacquiao sa isang panayam na wala pa siyang pinal na  desisyon ngayon kung ano ang kanyang plano sa kanyang karera sa pulitika.

Ayon naman kay Arum, kapag pinayagan na ng mga doktor si Pacquiao para lumaban, saka lamang nila sisimulan ang negosasyon para sa susunod na laban ng pambansang kamao.

Ilan sa pinagpipiliang makaktapat ni Pacquiao ay sina Amir Khan, Kell Brook, Terence Crawford at Juan Manuel Marquez.

Sa ngayon, nasa recovery stage pa si Pacquiao dahil sa kanyang injury sa balikat.

By: Jonathan Andal