SPORTS

Naantala ng halos 9 na oras ang pagdating sa bansa ng Gilas Pilipinas mula sa China matapos ang FIBA Asia Championship.

Nabatid ng DWIZ patrol na dapat dumating sa bansa ang Gilas alas-12:55 kaninang hatinggabi subalit naging alas-9:00 na mamayang umaga ang arrival schedule ng mga pambato ng Pilipinas.

Na-delay ang flight ng Gilas dahil sa masamang panahon sa Hong Kong kung saan manggagaling ang tropa ng Pinoy basketball players mula China.

Bitbit ng Gilas team sa pagbalik sa bansa ang silver medals nito.

By  Judith Larino | Jopel Pelenio (Patrol 17)  

Itinanghal nang kampyon ng Shakey’s V-league Collegiate Conference Season 12 ang NU Lady Bulldogs matapos pataubin ang Ateneo Lady Eagles sa game 3 ng kanilang finals sa San Juan Arena sa score na 25-21; 26-24 at 25-19.

Pinaka maraming puntos na naiambag sa koponan ng NU ay si Myla Pablo na may 15 points. Sinundan ni Dindin Santiago na may 11 points at sina Jaja Santiago at team captain Jorelle Singh na may tig 10 puntos.

Habang sa team ng Ateneo, si Alyssa valdez ang may pinakamaraming naiambag sa kanyang 14 na puntos habang si Bea de Leon ay naka-10 puntos.

By: Jonathan Andal

Itinuturing ni Gilas Coach Tab Baldwin na malaking hamon ang kanilang pagtutuos ng China, mamayang gabi para sa finals ng FIBA Asia Championship.

Ayon kay Baldwin, maliban sa koponan ng China, tiyak na malaki din ang pressure mula sa audience dahil sa home court advantage.

Inaasahan din ng Gilas na magiging pisikal ang kanilang laban ng China, lalo pa at posibleng gumanti ang mga ito sa hindi nila pagkakapasok sa finals noong 2013 FIBA Asia na ginawa dito sa bansa.

By  Katrina Valle  

Pasok na ang Gilas Pilipinas sa finals ng FIBA Asia Championship.

Ito ay matapos tambakan kagabi ng Gilas ang kalabang Japan sa iskor na 81-71.

Nanguna sa tagumpay ng Gilas si Jayson Castro na kumana ng 20 puntos habang malaki naman ang naitulong ng mga pinakawalang three points ni Dondon Hontiveros upang lumaki ang kalamangan ng Pilipinas.

Dahil dito, makakaharap ng Gilas sa finals ang wala pang talong koponan ng China.

Sisikapin naman ng Gilas na makuha ang gintong medalya at tuluyang makatuntong sa pinapangarap na Rio Olympics sa susunod na taon.

By   Ralph Obina  

Nag-leave bilang head coach ng Golden State Warriors si Steve Kerr.

Ito ay para magpagaling sa ang iniindang injury nito sa likod.

Ayon kay Warriors Center Andrew Bogut, hindi pa matiyak kung kailan makakabalik si Kerr ngunit pansamantala munang hahalili dito ang assistant coach na si Luke Walton.

Sinabi ni Bogut na kailangan nang harapin ni Kerr ang injury nito upang hindi aniya maging problema habang nasa kalagitnaan sila ng regular season.

Matatandaang noong Hulyo ay inoperahan si Kerr dahil sa ruptured disc sa likod nito.

By  Ralph Obina  

Pasok na ang Gilas Pilipinas sa semi-finals ng 2015 FIBA Asia Championship na ginaganap sa Changsha, China.

Ito’y matapos ilampaso ng Gilas ang Lebanon sa score na 82-70 sa quarterfinals ng torneyo, kagabi.

Aminado naman ang Philippine team na lalo silang ginanahan na ipakita ang kanilang bangis sa court dahil sa pangmamaliit sa kanila ng coach ng Lebanon.

Sunod na makasagupa ng Pilipinas sa semi-finals ang Japan mamayang alas-9:30 ng gabi.

Kailangang ipanalo ng Gilas ang naturang laban maging ang susunod na game upang matiyak ang kanilang pagpasok sa 2016 Rio Olympics sa Brazil.

By  Drew Nacino 

Minaliit ng Lebanon ang Gilas Pilipinas na kanilang makakaharap mamayang gabi para sa quarterfinals ng FIBA Asia Championship.

Ayon kay Lebanon Coach Veselin Matic, hindi sila nakararamdam ng anumang pressure sa paglaban sa Pilipinas dahil mas tinik sa dibdib ang powerhouse Iran.

Ito ay kahit pa tinambakan ng Pilipinas ang koponan ng Iran.

Iginiit ni Matic na hindi rin siya nababahala sa prisensya ni Gilas naturalized player Andray Blatche dahil sa kanila na aniyang napag-aralan ang laro at kung papaano pipigilan ang sentro ng Pilipinas.

By Ralph Obina