SPORTS

Kumpiyansa ang world number eight Rafael Nadal na magtutuloy- tuloy ang panalo nito sa China Open.

Ito ay makaraang payukuin ni Nadal ang kalabang si Wu Di sa buena manong round ng torneo sa iskor na 6-4, 6-4.

Dahil dito, susunod na makakasagupa ni Nadal si Vasek Pospisil ng Canada.

Matatandaang noong US Open, maagang umexit si Nadal dahil sa pagkatalo nito sa third round pa lang ng terneo.

By  Ralph Obina  

Isinusulong ni Philippine Sports Commission Chair Richie Garcia ang paghahain ng pormal na protesta ng Samahang Basketbol ng Pilipinas.

Ito ay para ipaabot sa FIBA o International Basketball Federation ang hindi pag sang ayon ng pilipinas sa nangyari sa nakalipas na FIBA Asia Championships .

Sinabi ni Garcia na bilang kinikilalang asosasyon ng FIBA dapat na magpadala ng sulat kung saan iisa isahin ang mga naging obserbasyon at nakitang paglabag ng China sa regulasyon ng laro.

Kabilang dito aniya ang hindi pagtira ng players ng china sa hotel kung saan nanatili ang mga player ng ibang koponan bukod pa sa tila pag pabor ng FIBA officials at mga referee sa China sa final round kung saan natalo ang mga Filipino at umuwing silver medalist.

By: Judith Larino

Tatlong (3) araw bago ang kanilang laban sa FIFA World Cup Qualifiers ay dumating na ang Philippine Azkals sa North Korea.

Dahil walang direct flights ay kinailangan pang dumaan ng Bangkok, Thailand ang team bago tumulak patungong China na nagsisilbing entry point papunta sa venue ng kanilang laban na gaganapin sa Oktubre 8.

Sa Beijing nagkita-kita ang mga atletang Pinoy dahil ang ilan sa kanila ay nanggaling pa ng Estados Unidos, Germany, England, at iba pa.

Makikipagtuos sa North Korea ang Philippine National Football Team na wala pang talo sa tatlong laro at nangunguna sa Group H.

Ang Azkals naman ay mayroong rekord na 2-1 dahil natalo na ito ng Uzbekistan sa pinakahuli nilang laban noong Setyembre.

By  Jelbert Perdez 

Nakabalik na sa bansa ang Gilas Pilipinas kasunod ng kanilang paglahok sa FIBA Asia Championship sa China.

Sa kanilang pagbabalik-bansa, nagpasalamat sina Jayson Castro at Marc Pingris sa mga sumuporta sa kanilang laban.

Binigyang diin ng dalawang manlalaro na malaki ang nagagawa ng suporta ng taong bayan sa kanilang paglaban.

By Katrina Valle | Raoul Esperas (Patrol 45)  

Watch:

Naniniwala si national team coach Tab Baldwin na may magandang kinabukasan pa ang darating sa Gilas Pilipinas.

Ito ay sa kabila ng masaklap at kontrobersyal na pagkatalo ng Gilas kontra China sa finals ng FIBA Asia Championship sa iskor na 67-78.

Inamin ni Baldwin na masakit at hindi niya maitago ang pagkadismaya sa pagkatalo ng Gilas lalo’t alam nitong ibinigay lahat ng kanyang manlalaro ang kanilang kakayahan.

Gayunman, sinabi ni Baldwin na kanilang pag-aaralang mabuti ang mga naging pagkakamali sa laban upang hindi na aniya maulit pa sa olympic qualifying round.

By   Ralph Obina

*Video Courtesy of: Raoul Esperas (Patrol 45) 

Buo pa rin ang suporta ni Fil-Am Jordan Clarkson sa Gilas Pilipinas kahit pa natalo ito sa China at hindi tatapat sa Brazil para sa Olympics.

Ayon kay Clarkson, ang puso niya ay nasa Gilas kahit pa nagte-training siya sa Hawaii sa Los Angeles Lakers team.

Binigyang diin ni Clarkson na may pusong kampeon pa rin ang Gilas at lalaban hanggang sa huli at suportado niya ito anuman ang mangyari.

Pinapurihan pa ni Clarkson si Gilas Coach Tab Baldwin sa motivation para lumaban ang grupo.

By  Judith Larino