SPORTS

Pinayuhan ni Top Rank CEO Bob Arum si Manny Pacquiao na wag nang umasa pa na magkaroon ng rematch kay Floyd Mayweather Jr.

Ginawa ni Arum ang payo kay Pacman nang magkausap sila sa New York.

Nagtungo si Manny ng Amerika para tanggapin ang prestihiyosong 2015 Asia Game Changer Award.

Ayon kay Arum, huwag na umanong habulin pa ni Pacman si Mayweather na nagretiro na rin matapos ang laban noong buwan ng Setyembre.

Pinagsabihan din umano ni Arum ang fighting congressman na mag-move on na lamang at paghandaan ang last fight ng kanyang career bago magretiro sa susunod na taon.

Kabilang sa mga posibleng makalaban at pinagpipilian ni Pacman ay sina Terrence Crawford, rematch kay Timothy Bradley kung sakaling manalo kay Brandon Rios, ang wala pang talo na si Viktor Postol at si Amir Khan.

By  Mariboy Ysibido

Nagdesisyon na ang Philippine Basketball  Association na  suportahan at  payagan   ang   mga  manlalaro  ng  Gilas  Pilipinas  na   makalahok  sa     Olympic   qualifier para sa  pag-asang  makapaglaro   sa  2016 Rio  Olympics.

Kasabay nito,  ipinalabas  na  ng PBA ang mga manlalarong  bubuo  sa  Gilas   Pilipinas para  sa naturang   qualifier.

Kabilang  dito sina:

1. June Mar Fajardo
2. Marcio Lassiter
3. Japeth Aguilar
4. LA Tenorio
5. Greg Slaughter
6. Calvin Abueva
7. Paul Lee
8. Gabe Norwood
9. Jayson Castro
10. Matt Rosser
11. Ryan Reyes
12. Marc Pingris
13. Ian Sangalang
14. Troy Rosario
15. Ranidel de Ocampo
16. Terrence Romeo
17. Jeff Chan

Matatandaang   napurnada    ang     karera  ng      Gilas  patungong    Rio olympics   makaraang talunin ng  China sa     finals  ng    FIBA  Asia  Championship   kayat    kailangan nilang   dumaan ngayon  sa   wildcard    qualifier.

By: Ralph Obina

Tila pressured ang Azkals sa susunod na laban nito kontra sa Yemen.

Ito ay dahil hindi muna makakapaglaro ang team captain na si Phil Younghusband matapos mapatawan ng ikalawang yellow card sa laro laban sa Bahrain.

Una nang nanghinayang ang maraming Pinoy fans dahil sa muntik maipasok ni Phil ang bola sa goal sa dalawang attempt nito.

Gayunman, malaki pa rin ang tiyansa ng Pilipinas na makausad sa World Cup dahil may laro pa kontra sa Uzbekistan at North Korea.

By  Judith Larino 

Hindi na matutuloy ang laban nina British boxing star Amir Khan at Manny Pacquiao.

Kasunod ito nang pag-atras umano ni Khan sa negosasyon sa laban kay Pacman.

Ayon kay Khan, dismayado siya dahil hindi nakikipagtulungan ang kampo ni Pacman para mabuo ang kanilang laban.

Sinabi pa ni Khan na pirmahan na lamang ang kulang para maitakda na ang sagupaan nila ni Pacman.

Sinisisi ni Khan ang Pambansang Kamao sa pagkadiskaril ng negosasyon kung saan pinakahuli nito ay ginanap noong isang linggo sa Doha, Qatar.

By  Judith Larino

Pinayuko ng koponan ng Bahrain ang Philippine Azkals sa kanilang pagtutuos sa ikalawang round ng World Cup Qualifiers.

Hindi nagawang makaporma ng Azkals sa agresibo at sa mahigpit na depensa ng Bahrain.

Bigong makapuntos ang Azkals habang natapos naman sa 2-0 ang iskor ng laban pabor sa Bahrain.

Sa kabila nito, may nakalinya pang laban ang Azkals kontra sa mga koponan ng Yemen, Uzbekistan at North Korea.

By  Ralph Obina

Magpupulong bukas  ang Philippine Basketball Association board upang  talakayin  ang isyu  ukol  sa    pagsali ng  Gilas Pilipinas  sa  Olympic  wildcard qualifier.

Tiniyak ni PBA president at  CEO Chito   Salud na magkakaroon na  bukas   ng malinaw    na  posisyon ang  board  sa   naturang   isyu.

Matatandaang dahil sa nagtapos  ang  Gilas  sa pilak     matapos    matalo  ng  China sa   FIBA  Asia Championship  ay    kailangan  nitong  sumabak sa wildcard    qualifier   upang     makatuntong sa  inaasam na  Olympics.

Gayunman,  may hindi  pagkakasundo  sa   pagitan ng PBA at  Samahang Basketball ng Pilipinas kaya’t nakabitin ngayon   kung lalahok sa  qualifiers ang Gilas Pilipinas.

May hanggang Oktubre 18 ang Gilas  para kumpirmahin ang partisipasyon nito  sa  final qualifier  sa  2016   Rio  Olympics.

By: Ralph Obina

Tiniyak ng Philippine Azkals na kanilang ipapanalo ang kanilang laban kontra Bahrain sa ikalawang round ng FIFA World Cup Qualifiers.

Ito ay para masigurong makakaabanse ang national team sa susunod na round ng torneo.

Mataas ang kumpiyansa ng Pilipinas makaraang talunin ng Uzbekistan ang Bahrain sa iskor na 4-0 noong nakaraang linggo.

Maliban dito, malaki rin ang naitulong ng scoreless draw ng Pilipinas kontra North Korea.

By  Ralph Obina  

Nahaharap sa sanction ang Philippine basketball team na Gilas sa sandaling tumanggi itong lumahok sa FIBA Olympic qualifiers sa susunod na taon.

Ayon kay Simon Wlkinson, Communications Coordinator ng FIBA, kailangang makasali ang Gilas sa torneo dahil nakataya ang tatlong puwesto sa Olympics.

Nabigyan ng pagkakataon ang Pilipinas na makasali pa rin sa prestihiyosong Olympics makaraang pumangalawa sa China sa katatapos pa lamang na FIBA Asia Championships.

Sa Hulyo 4 naman sa susunod na taon gagawin ang simultaneous three Rio de Jeneiro qualifiers na magtatagal hanggang sa Enero 10.

By  Jaymark Dagala