SPORTS

Aminado ang Philippine Olympic Committee (POC) na bumaba ang morale ng mga manlalaro ng Gilas Pilipinas makaraang matalo ito sa South Korea noong Miyerkules ng gabi.

Ayon kay POC Chairman Monico Puentevella, ito ang dahilan kaya’t nangangamba siyang hindi rin palarin ang Philippine team sa magiging laban nito sa Lebanon mamaya sa pagpapatuloy ng Fiba Asia Cup.

Paglalabanan ng Pilipinas at Lebanon ang ika-limang puwesto sa Fiba habang babagsak naman sa ika-pito ang sinumang matatalo sa nasabing laban.

Magugunitang nabuo na ang final 4 ng Fiba na kinabibilangan ng New Zealand, Iran, Korea at Australia.

By Jaymark Dagala

Tiwala ang promoter na si Bob Arum na makukumpirma na sa susunod na linggo ang rematch sa pagitan ni fighting Senator Manny Pacquiao at Australiyanong boksingero na si Bob Arum.

Ayon kay arum, batay sa inisyal na resulta ng negosasyon, posibleng ganapin ang rematch sa Nobyembre sa Suncorp Stadium sa Brisbane Australia.

Dagdag ni Arum, dahil sa kuwestyonableng pagkapanalo ni Horn laban kay Pacquiao sa kanilang naunang laban, nasumite ngayon ang WBO ng listahan ng tatlong posibleng maging referree at 10 mga posibleng hurado.

Mula sa mga nasabing listahan ay pipili ang magkabilang panig ng magiging referree at judge sa darating na rematch.

By  Krista de Dios

Nakasungkit ng bronze medal ang archery team ng Pilipinas sa pagpapatuloy na 29th Southeast Asian o Sea Games sa Kuala Lumpur, Malaysia.

Tinalo ng koponan ng Pilipinas ang bansang Vietnam sa men’s archery sa pangunguna ni Paul Marton Dela Cruz, Joseph Benjamin Vicencio at Earl Benjamin Yap.

Magugunitang napagwagian din ni Dela Cruz ang individual action category noong Miyerkules kaya’t dalawa na ang nakukuhang bronze medal ng bansa.

Kasunod nito, muli na namang sasabak sa labanan ang naturang koponan bukas, Agosto 18 para sa mixed category.

By Jaymark Dagala

Halos madurog ang “puso” ng Filipino fans matapos maputol ang pag-asa ng Gilas Pilipinas na makapasok muli sa FIBA World Cup.

Ito’y makaraang muling makatikim ng masaklap na pagkatalo ang Gilas sa kamay ng isa sa pinakamatinding karibal na South Korea sa 2017 FIBA Asia Cup, sa kanilang paghaharap sa Beirut, Lebanon.

Ginantihan ng SoKor ang Pilipinas at sa pagkakataong ito ay tinambakan ang Philippine National Team sa score na 119-86 sa quarterfinals ng torneyo.

Di hamak na mas maganda ang gameplay execution at asintado ang outside shooting ng mga Koreano kumpara sa Gilas na nagmistulang one-man team sa pangunguna ni Terrence Romeo.

Taong 2011 nang walisin ng SoKor ang Pilipinas para sa 3rd place ng FIBA Asia cup habang noong 2009 FIBA Asia Cup ay tinalo rin ng Korean team ang mga Filipino para sa 7th place.

By  Drew Nacino

Nasungkit ng Philippine Malditas ang unang round ng women’s football event ng 29th Southeast Asian Games sa Kuala Lumpur, Malaysia.

Pinataob ng Philippine Women’s Football Team sa Group B ang host nation na Malaysia sa score na 2-1 sa kanilang paghaharap, kagabi.

Nag-ambag ng goal para sa Pilipinas sina Patricia Impenido at Camille Rodriguez.

Sunod na makakaharap ng Malditas ang Vietnam, sa University of Malaysia Arena, bukas.

By   Drew Nacino

Inaabangan na ng basketball fanatics ang muling pagbubukas ng season ng NBA o National Basketball Association sa Oktubre 18.

Kasunod nito, inilabas sa kauna-unahang pagkakataon ng NBA ang kanilang full schedule para sa ika-72 regular season nito.

Batay sa inilabas na schedule, mula sa 1,230, babawasan ng NBA ang game schedule ng bawat koponan na hindi bababa sa dalawa hanggang tatlong beses lamang sa isang linggo.

Unang maglalaban sa opening game ang defending champion na Golden State Warriors kontra sa Houston Rockets sa Western conference habang ang Cleveland Cavaliers at Boston Celtics naman ang maghaharap sa Eastern conference.

By Jaymark Dagala

Muling maghaharap ang magkaribal na Gilas Pilipinas at South Korea sa 2017 FIBA Asia na ginaganap sa Beirut, Lebanon.

Magsasagupaan sa Quarterfinals ang dalawang team sa  makaraang pataubin ng Sokor ang Japan sa score na 81-68, kagabi.

Ang  Philippine at Korean team ang isa sa pinaka-matinding  magkalaban sa FIBA Asia lalo’t maka-ilang beses ng naghaharap ang dalawa na nagreresulta sa pagkatalo ng Pilipinas.

Gayunman, binasag ng Gilas ang “tinatawag” na “Korean curse” makaraang pataubin ng Pilipinas ang Sokor sa semi-finals ng 2013 FIBA Asia Cup.

Maghaharap ang dalawang koponan sa Nouhad Nawfal Stadium, bukas.

By: Drew Nacino

Wagi ang Philippine Softball Team kontra sa bansang Puerto Rico sa majors division ng Little League Softball World Series sa Oregon, Estados Unidos.

Nakabawi ang Negros Occidental Little League matapos ang dalawang oras na laban nila ng Softball Femenino de Coamo ng Puerto Rico sa score na 2-1.

Ito na ang kauna-unahang panalo ng Pilipinas bilang kinatawan ng rehiyon ng Asya Pasipiko sa nasabing torneyo na magtatapos sa Agosto 17, oras sa Pilipinas.

Magugunitang natalo ang Pilipinas noong Biyernes kontra sa host team mula sa Portlan Oregon District 4 gayundin sa Central at Southwest Region.

By Jaymark Dagala