SPORTS

Labing-limang (15) medalya na ang nasungkit ng Team Pilipinas sa Southeast Asian o SEA Games na ginaganap sa Kuala Lumpur, Malaysia.

Sinasabing tatlo rito ay ginto habang anim naman ang silver medals.

Maliban dito, pumalo na rin sa anim ang kabuuang bronze medals na nahakot ng mga Pinoy sa SEA Games.

Ang dalawang pinakahuling gold medals na nakuha ng bansa sa regional event ay mula kina Nico Bryan Huelgas at Kim Mangrobang na sumabak sa men’s at women’s triathlon.

Nahablot naman ng isa pang Filipino triathlete na si John Chicano ang silver sa parehong event.

Magugunitang naisukbit ng Team Pilipinas ang kauna-unahan nitong ginto sa SEA Games sa katauhan ng marathoner na si Mary Joy Tabal noong Sabado.

By Gilbert Perdez

Naging maganda ang panimula ng linggo para sa Philippine team sa Southeast Asian Games.

Dalawang ginto agad ang nadagdag sa unang ginto na nasungkit ng bansa noong Sabado.

Sa larangan ito ng triathlon kung saan parehong ginto ang nakuha nina Nikko Bryan Huelgas sa men’s event at Kim Mangrobang sa women’s event.

Galing rin sa Philippine team ang nakakuha ng silver medal sa katauhan nina John Chicano at Claire Adorna.

Sa larangan ng swimming, pasok na sa finals 400-meter freestyle sina Jessie Lacuna at Roxanne Yu makaraang malusutan nila ang kanya-kanyang heat.

By Len Aguirre

Umabante agad sa knockout round ng men’s basketball ng 29th Southeast Asian o SEA Games ang defending champion na Gilas Pilipinas.

Ito’y makaraang pabagsakin ng Gilas ang Thailand sa score na 81-74 sa preliminary round, sa Maba Stadium, Kuala Lumpur, Malaysia, kagabi.

Ang Pilipinas ang nagdikta sa laban hanggang sa huling quarter ng game pero bahagyang nahirapan ang koponan dahil sa lakas ng Thai cager na si Tyler Lamb sa second quarter.

Nagpakawala ng 16 points si Troy Rosario para sa Philippine team habang nag-ambag ng 17 points si Lamb para sa Thailand.

Sunod na makakasagupa ng Pilipinas ang Myanmar, bukas habang sa Miyerkules ang host nation na Malaysia.

By  Drew Nacino

Opisyal nang nagsimula ang 29th Southeast Asian Games sa Malaysia.

Umarangkada ang opening ceremony sa pamamagitan ng engrandeng light show sa national stadium sa Kuala Lumpur Sports City.

Halos limanlibong atleta mula sa labing-isang bansa ang kalahok sa nabanggit na regional sports event.

Dumalo sa aktibidad si Malaysian prime minister Datuk Seri Najib Tun Razak at asawang si Datin Seri Rosmah Mansor at youth and sports minister Khairy Jamaluddin.

Nakataya sa SEA games ang  apatnaraang gintong medalya sa tatlumpu’t walong sports kabilang ang ice skating, ice hockey, indoor hockey at cricket na isasagawa sa kauna-unang pagkakataon.

Bago pa man lumarga ang opening ceremony, sumungkit na ng ginto ang Pilipinas sa marathon na iniambag ni Mary Joy Tabal habang mayroon na ring isang silver at dalawang bronze ang Philippine delegates o nasa apat na ginto na ang nakolekta ng mga Pinoy.

By Drew Nacino

Humingi ng paumanhin ang pole vaulter na si Ernest Obiena sa Pinoy fans matapos mag-withdraw sa South East Asian Games sa Kuala Lumpur, Malaysia.

Ayon sa official statement ni Obiena, nakaranas siya ng ACL o Anterior Cruciate Ligament sa tuhod.

Inamin ni Obiena na dismayado siya sa nangyari lalo na’t handang-handa na siya sa pagsabak sa Sea Games.

Si Obiena ay nakapagtala ng Philippine record nang lumahok ito sa Germany International Event kung saan binali nito ang sariling record na nakuha nito noong 2016.

Una na ring umatras si Patrick Unso na nakatakdang sumabak sa 110 meter hurdles matapos magka-injury sa kanyang hamstring.

By Judith Estrada – Larino

Humataw ang Meralco sa fourth quarter dahilan upang makuha nila ang 107-104 victory laban sa Phoenix sa PBA Governor’s Cup sa Araneta Coliseum.

Kumamada si Garvo Lanete ng 27 points, kabilang ang anim na three-point shots habang tumipa naman si import Allen Durham ng 33 points, kabilang ang 16 rebounds para sa Bolts.

Si Lanete ang nanguna sa panalo ng Meralco habang wala sina Cliff Hodge na may injury at Gilas players Baser Amer at Mike Tolomia na kasalukuyan nang nasa Kuala Lumpur para sa Southeast Asian Games.

Dahil sa panalo, umakyat na ang kartada ng Bolts sa 5-1 kaya’t kapantay na nila sa 2nd place ang NLEX Road Warriors.

Sa hiwalay na laro, pinadapa naman ng Blackwater Elite ang NLEX sa score na 107-106.

By  Gilbert Perdez

Tinamaan ng kamalasan ang archery team ng Pilipinas sa 29th Southeast Asian o SEA Games matapos mabigo sa semifinals sina Paul Morton dela Cruz at Amaya Paz-Cojuangco sa Merdeka Square sa Kuala Lumpur, Malaysia.

Hindi nakaporma ang dalawa sa mixed compound event nang matalo sa tambalan nina Chau Kieu Kanh at Tien Cuong Nguyen ng Vietnam sa score na 156-159 sa kanilang bronze-medal match.

Samantala, bigo rin ang women’s at men’s football teams ng Pilipinas sa kanilang laban sa SEA Games football tournament.

Ang national-under 22 booters ay pinadapa ng Indonesia sa score na 3-0 sa harap ng tinatayang 5,000 fans sa Shah Ahlam Stadium.

Natalo rin ang Malditas sa kamay ng Vietnam sa score na 3-0 sa UM Arena sa Petaling Jaya.

By  Gilbert Perdez