SPORTS

Hindi pa rin natitinag ang Pilipinas sa ika-anim na puwesto sa 29th Southeast Asian o SEA Games na ginaganap sa Kuala Lumpur, Malaysia.

Sa kasalukuyan ay mayroon nang 14 na ginto, 18 pilak at 31 tanso o nasa 63 medalya na ang Pilipinas.

Kabilang sa mga sumungkit ng ginto ang Philippine Ice Hockey Team na nagwagi laban sa Thailand sa score na 5-4 at lawn bowls, kahapon; mga boksingerong sina Eumir Marcial sa middleweight title; Marvin Tupas sa light heavyweight at Trenten Anthony Beram para sa athletics.

Nangunguna pa rin ang host nation na Malaysia na mayroong 63 gold; 45 silver at 38 bronze medals o kabuuang 146 na medalya.

Pumangalawa ang Vietnam na may 37 gold; 25 silver at 32 bronze o 94 na medalya habang pangatlo ang Singapore na may 34 na gold; 32 silver at 34 na bronze o 100 medalya.

By  Drew Nacino

Nasungkit ng Pilipinas ang ika-sampung gintong medalya sa nagpapatuloy na Southeast Asian o SEA Games na ginaganap sa Kuala, Lumpur Malaysia.

Ito ay matapos pagharian ng Pinoy athlete na si Aries Toledo ang men’s decathlon.

Nakalikom si Toledo ng 7,443 points mula sa sampung track and field events.

Tinalo ni Toledo ang Thailand na may silver medal at Vietnam na nakuntento na lamang sa bronze medal.

By   Ralph Obina

Nakapako pa rin sa ika-anim na puwesto ang Pilipinas sa 29th Southeast Asian Games na ginaganap sa Kuala Lumpur, Malaysia.

Nasa 45 medalya na ang hawak ng mga atletang Pilipino na binubuo ng 10 gold, 15 silver at 20 bronze.

Kabilang sa mga nag-ambag ng ginto sina Aries Toledo na namayagpag sa 1,500 meter decathlon at Anthony Beram  na tinanghal na pinaka-mabilis na atleta sa  200-meter dash na may official time   20.84 seconds.

Dumagit din ng ginto si Brennan Wayne Louie  sa  fencing maging sina Nikko Bryan Huelgas para sa men’s triathlon at Marion Kim Mangrobang sa women’s triathlon.

Nangunguna pa rin sa medal tally ang host nation Malaysia na mayroong 119 na medalya na binubuo ng 50 gold, 37 silver at 32 bronze.

By Drew Nacino

SMW: RPE

Dalawa pang medalya ang nadagdag sa koleksyon ng Philippine gymnast team sa Southeast Asian (SEA) Games.

Silver medal ang nakuha ni Kaitlin de Guzman sa floor exercise at isa pang bronze sa balance beam event.

Dahil dito, nangunguna na si Kaitlin na ang may pinakamaraming medalyang nakuha sa buong Philippine team na kalahok sa SEA games.

By Len Aguirre

Tuluyan nang lumipat ng koponan si all-star point guard Kyrie Irving.

Ito ay matapos siyang i-trade ng Cleveland Cavaliers sa Boston Celtics.

Ipinalit naman kay Irving ang point guard ng Celtics na si Isaiah Thomas.

Matatandaang sa pagtatapos ng NBA season ay nagsabi na si Irving na nais nitong malipat sa ibang koponan.

Si Irving ay may average career high na 25.2 points na may 47.3 percent na shooting at 5.8 assists noong nakaraang season.

By  Ralph Obina

Pinatunayan ng Gilas Pilipinas ang galing nito matapos bawian ang Myanmar sa pagkatalo sa Thailand sa basketball tournament sa SEA Games sa Kuala Lumpur, Malaysia.

Nilampaso ng Gilas ang tropa ng Myanmar kung saan naitala ang final score sa 129-34.

Ang ganti ng Gilas ay pinangunahan ni dating FEU Center Raymar Jose na gumawa ng 22 points samantalang 20 points naman ang ambag ni Kobe Paras.

Unang quarter pa lamang ng sagupaan ay umarangkada na ang Gilas nang mai-poste ang 31-7 lead at nagtuluy-tuloy na hanggang makaungos ng 97 points.

Bukas, Huwebes ay nakatakdang makaharap ng Gilas ang tropa ng Malaysia.

By  Judith Larino

Umaabot na sa 23 ang medalyang nahahablot ng mga manlalarong Pilipino na nakikipagtagisan sa Southeast Asian o SEA Games sa Kuala Lumpur, Malaysia.

Kabilang dito ang walong ginto, walong pilak at pitong tansong medalya sa pinakahuling medal tally ng SEA Games.

Kahapon, limang gintong medalya at tig-dalawang silver at bronze medals ang nakuha ng Pinoy athletes.

Humablot ng gold medals kahapon sina Eric Cray sa 400 meters hurdles, gymnasts na sina Reyland Capellan at Kaitlin de Guzman, Agatha Wong ng Wushu-Women’s Taijiquan at Brennan Louie ng fencing.

Wagi naman sa silver medals sina Hanniel Abella at Harlene Raguin kapwa ng Women’s Epee o fencing at Jayson Ramil Macalalay sa Kumite below 60 kilogram event ng karate.

Naka-bronze medal naman ang pambato ng bansa sa men’s individual kata na si Orencio James delos Santos at Junna Tsukii sa Women’s Kumite below 50 kilogram event.

By Judith Larino

Dalawa pang gintong medalya ang nakuha ng Pilipinas sa nagpapatuloy na 2017 Southeast Asian (SEA) Games sa Kuala Lumpur, Malaysia.

Nasungkit ng Filipino gymnast na si Reyland Capellin ang gintong medalya makaraang pagharian nito ang men’s floor exercise event sa iskor na 13.590.

Matagumpay na naidipensa ni Capellan ang titulo nito noon sa 2015 SEA Games sa Singapore.

Samantala, nag-ambag din ng gintong medalya si Kaitlin de Guzman para sa uneven bars event.

Maliban sa limang gintong medalya, hawak din ng Pilipinas ang anim na pilak at anim na tansong medalya.

Dahil dito, pang-anim na ang Pilipinas sa over-all rankings ng SEA Games.

By Ralph Obina

Kumpiyansa ang Philippine Athletic Track and Field Association na muling paghaharian ng Filipino-American track athlete na si Eric Cray sa 100-meter dash at 400-meter hurdels sa nagpapatuloy na Southeast Asian o SEA Games sa Malaysia.

Ayon kay PATAFA President Philip Ella Juico, tiwala sila na muling itatayo ni Cray ang bandila ng Pilipinas.

Target ni Cray na muling makasungkit muli ng dalawang gintong medalya tulad noong 2015 SEA Games.

Si Cray ay nakatakdang lumaban ngayong hapon kasama ang three time NCAA sprint champ na si Anfernee Lopena.

By  Ralph Obina