SPORTS

Muling masusubukan ang bangis ng tinaguriang diyos ng chess o chess god sa Rapid and Blitz Tournament sa St. Louis Missouri.

Labing dalawang taon matapos magretiro, babalik sa kumpetisyon ang dating world champion na si Garry Kasparov.

Makakaharap ni Kasparov sa chess tournament ang bagong henerasyon ng chess players na kumikilala sa kanya bilang chess god.

Si Kasparov ang pinakabatang naging world champion sa edad na 22 at nagdomina sa mundo ng chess mula 1985 hanggang year 2000.

By  Len Aguirre

Napanatili ng Gilas Pilipins ang undefeated record nito sa Group B ng 2017 FIBA Asia Cup.

Sinelyuhan ng Gilas ang 3-0 record makaraang patumbahin ang huling kalaban sa Group B na Qatar sa score na 80-74, sa kanilang paghaharap sa Nouhad Nawfal Stadium, sa Beirut, Lebanon, kagabi.

Pinangunahan ni Matthew Wright ang Pilipinas matapos magpakawala ng 25 points habang nag-ambag ng 23 points si Mansour Elhadary para sa Qatar.

Hinihintay na lamang ng Philippine National Basketball Team kung sino ang mananalo sa sagupaan ng Japan at South Korea, mamaya.

Ang sinumang mananalo sa pagitan ng Japan at SoKor ay awtomatimong papasok sa quarterfinals at makakaharap ang Pilipinas sa Miyerkules, Agosto 16.

By  Drew Nacino

Target ng Gilas Pilipinas na makakuha ng malinis na rekord sa preliminary ng 2017 FIBA Asia Cup na ginaganap ngayon sa Beirut Lebanon

Wala pang talo ang Gilas sa kanilang unang dalawang laro laban sa koponan ng China at Iraq

Bagamat pasok na sa Quarterfinals ng kompetisyon dahil sa dalawang panalo, ayaw pa ring magpakakampante ng Gilas sa kanilang huling laban mamayang gabi sa koponan ng Qatar para sa preliminaries

Target ng grupo ang undefeated record sa Group B ng kompetisyon

Inaaasahang magiging madali lang sa Gilas ang pagpapataob sa Qatar na wala pang panalo at laglag na sa 2017 FIBA Asia Cup

By: Jonathan Andal

Pinagreretiro na sa boxing ni Coach Freddie Roach ang kanyang alagang si Manny Pacquiao.

Ayon kay Roach, gusto rin naman niyang maka rematch ni Pacman si Jeff Horn pero pagkatapos nito, manalo man o matalo dapat nang magretiro ang Peoples Champ.

Anya, dapat na lang ituon ni Pacquiao ang kanyang atensyon sa pulitika bilang Senador.

Pero nangangamba si Roach na baka ituloy pa rin ni Pacquiao ang boksing para mapanatili ang popularidad sakaling planuhin nitong tumakbong Presidente ng bansa.

By: Jonathan Andal

Hindi malayong maglaro rin para sa Gilas Pilipinas ang anak ni dating NBA Player at Los Angeles Lakers  Forward Metta World Peace.

Ito’y makaraang ihayag ni Peace o Ron Artest sa kanyang isang araw na pagbisita sa Pilipinas na nag-apply na ng Philippine passport ang kanyang panganay na si Jeron Artest.

Sa oras na mabigyan ng pasaporte ang 16 anyos at 6 foot 2 na si Jeron, eligible na ito na maglaro para sa Philippine National Team.

Nasa Pilipinas si Peace para sa isang personal visit at una nitong pinuntuhan ang isang Filipino restaurant sa Makati City.

Si Jeron ay anak ni Peace sa dati nitong girlfriend na Filipina na si  Jennifer Ruth Uy-Palma.

By: Drew Nacino

Otomatikong  pasok na  ang Gilas Pilipinas sa Quarterfinals ng 2017 FIBA Asia Cup na ginaganap sa Beirut, Lebanon.

Ito’y makaraang ilampaso ng  Pilipinas ang Iraq sa score na 84-68 noong Biyernes na nagresulta sa  ikalawang sunod na panalo at dahilan upang manatili sa number 1 spot ang Gilas sa Group B.

Bago nito ay  makakaharap ng Philippine National team mamaya ang Qatar na unang na-eliminate  sa qualifying rounds.

Makakasagupa naman ng Gilas sa miyerkules, Agosto 16 ang sinumang mananalo sa pagitan ng Japan at South Korea.

By: Drew Nacino

Desidido ang Gilas Pilipinas na makapasok sa quarterfinals ng FIBA Asia Cup matapos ilampaso ang Iraq sa final score na 84-68.

Sinabi ni Gilas Head Coach Chot Reyes na todo-todo pa rin ang kanilang training kahit pa ang huling makakaharap ng Gilas na Qatar team ay itinuturing na underdog.

Matapos ang nasabing panalo , nangunguna na ang Pilipinas sa Group b standing na may 4 points dahil sa dalawang panalo habang nasa ikalawang puwesto ang China at Iraq na kapwa may 3 points o tig-isang panalo at talo at pang huli ang qatar na may 2 points o walang panalo kundi dalawang talo.

Katapat na rin ng Pilipinas sa unang puwesto ang New Zealand sa Group C habang ang Australia ay nasa unang puwesto sa Group D.

By  Judith Larino

Nailusot ni Bong Quinto ang isang game-winning lay-up may 12.6 seconds ang nalabi sa laro kaya’t nakuha ng Colegio de San Juan de Letran ang 63-61 win laban sa University of Perpetual Help sa FilOil Flying V Centre.

Dahil sa panalo, umakyat na ang rekord ng Knights sa 1-3 sa NCAA 93 Men’s Basketball Tournament.

Nalasap naman ng Altas ang kanilang ikalawang sunod na pagkatalo sa torneo at hawak na nila ngayon ang kartada na 2-4.

Ayon kay Head Coach Jeff Napa, kuntento siya sa performance ng kanilang mga atleta dahil lahat sila ay nagtrabaho para makuha ang panalo.

Kumamada si Quinto ng 14 points, nine rebounds, at three assists para sa Letran.

By Jelbert Perdez

Bagama’t nagpakita ng bangis ang Philippine National Women’s Volleyball, hindi naman sila umubra sa lakas at height advantage ng Kazakhstan.

Sina Ace Hitter Katerina Tatko at Yekatarina Zhdanova ang nanguna sa panalo ng mga Kazakhs laban sa mga Pinay sa tatlong set sa 19th SMM Asian Senior Women’s Volleyball Championship sa Alonte Sports Arena sa Laguna.

Dahil sa panalo, umakyat na ang record ng Kazakhstan sa 2-0 win-loss record habang nalugmok naman ang Pilipinas sa unang pagkatalo sa dalawang laro.

Unang nakalamang ang women’s team sa tulong nina Alyssa Valdez, Jaja Santiago at Ces Molina sa unang set pero nakahabol ang mga kalaban.

Haharap naman ang Kazakhstan sa Vietnam bukas habang ang mga Pinay naman ay makikipagtuos sa South Korea sa quarterfinals classification round.

By Jelbert Perdez

Inilampaso ng Gilas Pilipinas ang koponan ng Iraq sa pagpapatuloy ng FIBA Asia  Cup na ginaganap sa Lebanon.

Pinataob ng Gilas ang Iraq sa iskor na 84-68.

Nanguna sa panalo ng Gilas si Terrence Romeo na kumana ng 17  puntos habang  nakasikwat naman ng 16 na puntos ni Filipino-German Center Christian   Stanhardinger.

Dahil dito, dalawang panalo na ang hawak ng Pilipinas makaraang talunin sa   unang laro ang China.

By Ralph Obina