Laglag na sa Roger’s Cup si Spanish Tennis Star Rafael Nadal.
Ito ay makarang gulatin siya at talunin ng Canadian teenager na si Denis Shapovalov sa third round ng Torneo sa iskor na 3-6, 6-4, 7-6.
Ang 18 anyos na si Shapovalov ang pinakabata ngayong tennis player na nakaabot sa quarterfinals sa isang ATP masters.
Samantala, dahil sa maagang pagkatalo, nabigo si Nadal sa tangka nitong malampasan sa ranking si Murray na hindi nakapaglaro ngayon dahil sa injury nito.
Tiniyak ni undefeated boxer Floyd Mayweather Jr. na magiging madugo ang laban nila ni UFC star Conor McGregor sa Agosto 26.
Ayon kay Mayweather, napag-aralan na niyang mabuti ang kilos at paraan ng paglaban ni McGregor.
Ngayon pa lang sinabi ni Mayweather na excited na siya para sa laban at asahan aniya ang kapanapanabik na laban.
Matatandaang kapwa nangako ang dalawang mandirigma na tatapusin nila ang laban via technical knockout.
Hindi nagpapaka-kampante ang Gilas Pilipinas sa kanilang susunod na makakaharap sa 2017 FIBA Asia Cup na Iraq.
Ito’y kahit ramdam pa rin ng Pilipinas ang “momentum” matapos ang kanilang makasaysayang panalo kontra defending champion China na maituturing na ganti ng Philippine National Team sa kanilang hindi mabilang na talo sa Tsina sa mga nakalipas na torneyo.
Sa oras na makaharap ang Iraqi team, mamayang alas 9:00 ng gabi sa Beirut, Lebanon, hindi na “underdog” ang Pilipinas at tiyak na mag-iiba rin ang game play ng kalaban.
Inaasahang magiging mas “defensive” ang Iraq lalo’t ramdam ang Pilipinas ang tumalo sa kanila sa William Jones Cup sa Taipei, Taiwan.
Gaya ng Gilas, asahan na ring isasabak ng Iraq sa starting lineup ang kanilang naturalized player na si Kevin Galloway.
Umaasa ang Filipino – Australian Golfer na si Jason Day na magiging maganda ang kanyang simula sa PGA Championship.
Ito ay matapos ang isang taong ding pananamlay ng kanyang golf career.
Tamang-tama lang ang dating ni Day sa Charlotte kung saan gaganapin ang PGA Championship.
Ayon kay Day, natuto na siya sa mga nakaraang tournament kung saan maaga siyang dumarating na dahilan din maagang mental drain.
Matatandaang mula sa pagiging No. 1 ay kasalukuyang nasa 7th spot si Day.
Umatras na si Top Seed Andy Murray sa Cincinnati ATP Open na magsisimula na sa susunod na linggo.
Ito ay dahil sa iniinda pa rin nitong hip injury.
Sinabi ni Murray na kinakailangan niyang magpahinga at magpagaling nang husto upang makalaro aniya siya sa US Open na magsisimula naman sa Agosto 28.
Matatandaang huling naglaro si Murray sa Wimbledon Quarterfinals noong Hulyo matapos itong matalo kay Sam Querrey.
Ginulat ng Gilas Pilipinas ang Chinese national basketball team sa unang sigwada ng 2017 FIBA Asia Cup sa Beirut, Lebanon.
Pinatumba ng Pilipinas ang China sa score na 96-87 sa kanilang paghaharap sa Nouhad Nawfal Gymnasium, kahapon.
Ito ang unang panalo ng Gilas laban sa kanilang pinakamabigat na karibal at Asian basketball powerhouse na China sa nakalipas na dalawang taon
Mistulang rematch ng finals noong 2015 FIBA Asia Cup ang paghaharap kahapon ng defending champion na China at second placer na Pilipinas.
Hindi binigo ni Terrence Romeo ang Philippine Team na naging susi upang makamit ang malaking tagumpay matapos magpakawala ng 26 points.
Sa unang quarter pa lamang ay liyamado na ang Gilas at umabot pa sa 17 points ang kalamangan sa second half at bagaman humabol ang Chinese team sa 4th quarter, sinamantala ni Romeo ang pagkakataon upang magpaulan ng tres.
Sunod namang makakasagupa ng Gilas Pilipinas ang Iraq, bukas.
Kinutya ni dating World Boxing Champion at ngayo’y promoter na si Oscar ‘Golden Boy’ Dela Hoya ang bakbakang Floyd Mayweather Jr. at UFC Star Conor McGregor.
Ayon kay Dela Hoya, hindi naman totoong laban ang paghaharap nina Mayweather at McGregor.
Kaya naman nanawagan ang dating Olympic Boxing Champion sa mga fan na huwag nang panoorin ang naturang laban sa halip ay tangkilikin na lamang ang bakbakang Canelo Alvarez at Gennady Golovkin para makasaksi ng totoong laban.
Ang labang Alvarez – Golovkin ay gaganapin sa Setyembre 16 sa ilalim ng Golden Boy Promotions ni Dela Hoya.
Umaasa ang Gilas Pilipinas na uubra ang kanilang game plan kontra China sa kanilang paghaharap mamayang gabi sa pagsisimula ng FIBA Asia Cup na gaganapin sa Lebanon.
Ayon kay Gilas Head Coach Chot Reyes, kulang ang koponan ngayon sa matatangkad na player dahil sa pagkawala nina Junemar Fajardo at naturalized player Andray Blatche.
Dahil dito, sinabi ni Reyes na kanilang paiigtingin ang outside shooting kung saan magiging sentro sa diskarte si Terrence Romeo at Jayson Castro.
Maliban dito, magiging katuwang din nina Romeo at Castro sa outside shooting sina Matthew Wright, RR Pogoy at Gabe Norwood.
Ang pagtutuos sa pagitan ng China at Pilipinas ay magaganap mamayang alas-6:30 ng gabi.
Muling nalagasan ang mga miyembro ng Philippine team na lalahok sa 29th Southeast Asian (SEA) Games na gaganapin sa Kuala Lumpur, Malaysia, simula sa Agosto 19 hanggang 30.
Kabilang sa pinakabagong nawala sa Philippine delegation ang figure skater na si Samantha Mary Lynn Cabiles at track cyclist Kristian Emmanuel Reyes.
Dahil sa problema sa kalusugan, nagpasya si Cabiles na huwag munang lumahok sa women’s individual figure ice skating event habang si Reyes ay na-injury habang nagte-training sa South korea.
Una ng ipinull out ni Philippine Chief-De-Mission Cynthia Carrion ang mga gymnast na sina Rachele Arellano at Adrian Mirasol Apuyan.
Mula sa 497 atleta ay 493 na lamang ang lalahok sa 37 sports events sa SEA Games.
Kumpiyansa ang kampo ni WBO Welterweight Champion Jeff Horn na matutuloy ang rematch kontra kay dating Eight Division World Champion Manny Pacquiao bago matapos ang taong kasalukuyan.
Ayon sa coach ni Horn na si Glenn Rushton, pag-uusapan pa rin nila kung saan at kailan ang posibleng paghaharap muli ng dalawa.
Sinabi ni Rushton, na nais nilang patunayan na hindi tiyamba ang pagkapanalo ni Horn.
Dahil dito, ngayon pa lang ay naghahanda na si Horn para sa posibleng paghaharap muli nila ni Pacquiao.