SPORTS

Nasilat ng Meralco Bolts ang kanilang buena manong panalo sa best of five series ng semi-finals ng 2017 PBA Governor’s Cup.

Agad naungusan ng Meralco sa Game 1 ang Star Hotshots sa score na 72-66 sa kanilang paghaharap sa Alonte Sports Arena sa Biñan, Laguna, kagabi.

Umalagwa si Allen Durham matapos magpakawala ng 23 points para sa Meralco habang kumamada ng 15 points si Jio Jalalon para naman sa Star.

Muling magbabakbakan ang dalawang team sa game 2 sa Sta. Rosa Multi-Purpose Complex, Santa Rosa, Laguna, bukas.

Samantala, magsasalpukan naman sa Game 1 ng best of five series ang defending champions Barangay Ginebra Gin Kings at TNT Katropa, sa Araneta Coliseum, mamayang gabi.

—-

Hindi makakapag-laro sa buong NBA preseason si San Antonio Spurs All-Star Forward Kawhi Leonard.

Ayon kay Spurs Coach Gregg Popovich, ito’y dahil sa injury sa kanang hita ng basketbolista na natamo nito noong nakaraang taon pa.

Hindi aniya nila inasahan na magiging matagal ang paggaling ng injury ni Leonard kahit pa tuloy-tuloy naman ang rehabilitation program dito.

Hindi pa matiyak ngayon ni Popovich kung kailan makakabalik sa court si Leonard.

Ngayong araw ang umpisa ng NBA preseason kung saan una nang sumalang ang Denver Nuggets at Golden State Warriors.

Wagi ang Nuggets kontra Warriors sa iskor na 108-102.

_____

Lumagda ng 5-year contract extension ang reigning nba MVP na si Russel Westbrook sa Oklahoma City Thunders.

Bagaman hindi idinetalye ni Thunders Executive Vice President Sam Presti ang terms and conditions, posibleng umabot sa 205 million dollars ang napagkasunduang suweldo kay Westbrook o 41 million dollars kada taon.

Ito na sa ngayon ang pinakamalaking halaga ng kontratang nilagdaan sa NBA.

Excited naman si Westbrook na makatambal ang mga bagong teammate at kapwa all star na sina Paul George at Carmelo Anthony.

Samantala, dahil sa contract extension at dalawang dagdag na star players, naniniwala si Presti na malaki ang tsansa ng team na makabalik sa NBA finals.

Bigo pa ding makasipot si NBA Superstar Lebron James sa ikalawang sunod na ensayo ng Cleveland Cavaliers.

Kasunod na din ito ng pilay ni James sa kaliwang bukong-bukong na natamo nito sa unang practice ng team.

Inaabangan naman kung kakayanin ni James na bumalik sa unang pre-season games ng koponan sa susunod na linggo kontra Atlanta Hawks.

Ang bagong NBA Season ay nakatakdang magbukas sa Oktubre 17.

Unang makakasagupa ng Cavs ang Boston Celtics kung saan unang pagkakataon ding maglalaro sa Celtics ang dating Cleveland guard na si Kyrie Irving.

_____

Tiwala ang Chooks-To-Go Pilipinas na makukuha ang ika-limang puwesto sa huling araw ng FIBA Asia Championship Cup.

Ito ay matapos talunin ng Philippine team ang Mono Vampire Team ng Thailand sa score na 115-102.

Target ng Chooks-To-Go na muling mapataob ang koponan ng Thailand ngayong tanghali sa Chenzhou Sports Center sa isang rematch game.

—-

Bagama’t hindi nakalusot sa quarterfinals, nakabawi naman ang Chooks-To-Go Pilipinas.

Ito’y matapos gibain ang Shabab Al Ahli ng Dubai, 92-57, sa classification phase ng FIBA Asia Champions Cup na ginanap sa Chenzhou Sports Complex sa Chenzhou, China.

Kumamada si Kiefer Ravena ng 20 points, six boards at isang assist habang nagdagdag si Almond Vosotros ng 14 points at 12 points naman mula kay LA Revilla.

Nahirapan naman ang Shabbir dahil pitong manlalaro lamang ang naipasok nito kung saan tanging si Qais Omar Alshabebi ang nakaiskor ng double-digits.

Makakasagupa naman ng Pilipinas ngayong araw ang Mono Vampire ng Thailand para sa ika-limang puwesto.

—-

Inspirado sa kanyang laban ngayong araw sa China ang Pinoy Boxer na si Mark Anthony Barriga.

Ito ay dahil nasa China na rin ngayon si Fighting Senator Manny Pacquiao para magbigay suporta kay Barriga.

Dito ay makakalaban ni Barriga para sa regional championship fight ang Thai boxer na si Wittawas Basapean.

Una rito, matagumpay si Barriga na makuha ang tamang timbang para sa laban.

_____

Nagkasama na sa ensayo si Lebron James at ang bagong miyembro ng Cleveland Cavaliers na si Dwyane Wade.

Pero sa kasawiang palad nagtamo agad ng injury sa kanyang kaliwang bukong-bukong si James.

Dahil dito, hindi muna makakasama sa practice ng Cavs si Lebron ngayong araw.

Hindi pa batid sa ngayon kung gaano kalala ang injury ni Lebron.

Matatandaang dalawang NBA championship ang magkasamang nasungkit nina Lebron at Wade sa ilalim ng dati nilang koponan na Miami Heat.

—-

Bigong maungusan ng koponang Chooks-to-Go ng Pilipinas ang Kashgar Team ng China sa kanilang paghaharap sa quarterfinals ng FIBA Asia Cup.

Nilampaso ng team China ang Pilipinas sa score na 86-70 dahil sa pag-arangkada ng Chinese team sa ikalawang bahagi ng laban.

Gayunman, ipinagmalaki ni Gilas Coach Chot Reyes na bagama’t bigo, nagawa namang mangibabaw nila Kiefer Ravena at Isiah Austin sa nasabing laro na kapwa nakapagtala ng tig-labing anim na puntos.

Ginawa ang nasabing laban sa Chenzhou Sports Center sa Chenzhen,China kung saan, susunod na makakaharap ng Pilipinas ang koponan ng UAE o United Arab Emirates na Shabab Al-Ahli Dubai.

Paglalabanan ng dalawang koponan ang ika-5 puwesto para sa continental club championship ng FIBA.

—-