SPORTS

Balik finals sa 2017 PBA Governor’s Cup ang Meralco Bolts makaraang walisin sa semi-finals ang Star Hotshots.

Sinelyuhan ng Meralco ang semis sa kartadang 3-0 at nalusutan ang Star sa score na 91-88, sa kanilang paghaharap sa Araneta Coliseum, kagabi.

Nagpakawala ng 24 points si Allen Durham para sa Bolts habang sumalaksak ng 21 points si Mark Barroca para sa Star.

Makakaharap ng Meralco sa Game 1 ng Finals sa Quezon Convention Center, sa Lucena City sa Oktubre 13 ang sinumang magwawagi sa sagupaang Barangay Ginebra San Miguel at TNT Katropa.

Magbabakbakan naman sa Game 3 ng semi-finals sa The Big Dome, mamaya ang Ginebra at TNT na kapwa tabla na sa kartadang 1-1.

—-

Binigo ng Atlanta Hawks ang unang laro kung saan sanib-puwersa sina Dwayne Wade at Derrick Rose ng Cleveland Cavaliers.

Nasilat ng Hawks ang Cavs kung saan naitala ang final score sa 109-93.

Tila minalas din umano si Kevin Love sa bagong papel bilang center ng Cavs kahit pa nakagawa ng 12 points at 5 rebounds sa 15 minuto ng paglalaro.

Nanguna naman sa magandang diskarte ng Atlanta si Dennis Schroder na kumamada ng 18 points.

Sa darating na Sabado naman haharapin ng Cavs ang host na Indiana Pacers samantalang bibisita naman ang Hawks sa Pistons.

_____

Kasado na ang kampanya ng Gilas Pilipinas sa 2019 FIBA World Cup Asian Qualifiers.

Makikipagtagisan ang Gilas sa Japan sa November 24 sa Olympic Park General Sports Ground Gymnasium sa Komazawa, Tokyo, Japan.

Hindi pa nagpapalabas ng buong line up ng Gilas Pilipinas na maglalaro partikular ang mga kukuning naturalized players.

Matapos ang Japan, makakaharap naman ng Gilas ang Chinese Taipei sa November 27.

—-

Niresbakan ng TNT Katropa ang defending champion Barangay Ginebra San Miguel sa Game 2 ng best of 5 series ng 2017 PBA Governor’s Cup semi-finals.

Itinabla ng TNT ang kartada sa 1-1 makaraang malusutan ang Gin Kings sa score na 103-96 sa kanilang sagupaan sa Batangas City Coliseum, kagabi.

Nagpakawala ng 21 points para sa Katropa si Glen Rice Junior habang kumamada ng 25 points si Justin Brownlee para sa Barangay Ginebra.

Bagaman na-bangko si Rice sa first half dahil sa apat na foul, iniangat naman ng kanyang mga teammate na sina Jayson Castro, Troy Rosario at Roger Pogoy ang TNT as third quarter.

Nag-ambag si Castro ng 20 points habang 16 points sina Rosario at 14 points si Pogoy.

Muling maghaharap ang dalawang koponan sa Game 3 sa Araneta Coliseum, sa Sabado.

—-

Humablot ng tig-dalawang silver at bronze medals ang Pilipinas sa world Wushu Championship sa Kazan, Russia.

Natalo ng Vietnamese na si Minh Duc Vu ang Pinoy na si Arnel Mandal sa men’s 52-kilogram division.

Nakuntento naman din sa silver medal si Hergie Bacyadan matapos itong igupo ng Iranian na si Maryan Hashemiforoud sa women’s 70-kilogram division.

Kapwa naman nakakuha ng bronze medal sina Divine Wally ng women’s 48 kilogram at Francisco Solis.

_____

Abot-kamay na ng Meralco Bolts ang kanilang pagbabalik sa finals ng PBA Governor’s Cup.

Hawak na ng Meralco ang 2-0 lead makaraang itumba ang Star Hotshots sa Game 2 ng best of 5 series ng semi-finals sa score na 98-74 sa kanilang paghaharap sa Santa Rosa Multi-purpose Complex sa Laguna, kagabi.

Sa oras na manalo muli ang Bolts sa Game 3 sa Araneta Coliseum, bukas, awtomatikong pasok na ang team sa finals.

Samantala, magsasalpukan din sa Game 2 ang defending champion Barangay Ginebra San Miguel at TNT Katropa sa Batangas City Coliseum, mamaya.

—-

Higit na magiging agresibo umano si Kazakh Knockout Artist Gennady Golovkin sa rematch nito kay Mexican Superstar Saul Canelo Alvarez.

Tiniyak ito ni Tom Loeffler ng K2 Promotions, promoter ni Golovkin, matapos ipag-utos ng World Boxing Council ang agarang rematch sa pagitan ng dalawang boksingero.

Sinabi ni Loeffler na posibleng Marso o Mayo ng susunod na taon gawin ang Golovkin – Canelo rematch bagamat lumutang na ang petsang cinco de mayo na nabatid na holiday sa bansang Mexico.

_____

Planong gawing sentro ng Cleveland Cavaliers si NBA Champion Kevin Love sa pagbubukas ng bagong NBA season.

Ayon kay Cavs Coach Tyronn Lue, mapapaganda ang floor spacing ng koponan kung ililipat si Love sa Center.

Maliban dito, plano rin ni Lue na ilagay sa forward spots sina jae Crowder at superstar Lebron James habang backcourt naman sina Dwyane Wade at Isaiah Thomas sakaling makapaglaro uli ito.

—-

Hawak na ng defending champion Barangay Ginebra San Miguel Gin Kings ang unang panalo sa best of five series ng semi-finals game sa 2017 PBA Governor’s Cup kontra TNT Katropa.

Niresbakan ng Ginebra sa Game 1 ang TNT sa score na 121-94 sa kanilang paghaharap sa Araneta Coliseum, kagabi.

Kumamada ng 21 points ang bigman ng Gin Kings na si Justin Brownlee habang nagpakawala ng 26 points ang kapwa import na si Glen Rice Jr. para naman sa Katropa.

Sa third quarter, lalong dinurog ng Barangay Ginebra ang TNT sa pamamagitan ng tambalan nina Brownlee at Greg Slaughter hanggang sa tambakan nila ng mahigit 20 puntos ang kalaban sa 4th quarter.

Magugunitang tinambakan din ng TNT ang Gin Kings sa elimination round sa score na 121-92, noong September 23 rumesbak ang defending champion sa semi-finals.

Samantala, maghaharap muli ang dalawang koponan sa Game 2, sa Batangas City Coliseum, bukas.

—-