SPORTS

Napanatili ng Philippine Azkals ang top spot sa Group F ng AFC Asian Cup Qualifiers makaraang itabla sa score na 1-1 ang game kontra Yemen sa kanilang paghaharap sa 3rd round sa Al Wakr Stadium sa Doha, Qatar.

Bagaman pahirapan para sa Azkals na tibagin ang Yemen sa halos buong game, nakasikwat naman ng goal si Mike Ott upang isalba ang Pilipinas at itabla sa 1-1 ang score sa oras na 89 minutes.

Sa ikalawang sunod na draw laban sa Yemenis, nadagdagan ng 8 points ang Philippine team upang umakyat sa kartadang 2 wins, 2 draws at walang talo.

Sunod na makakasagupa ng Azkals ang Nepalese team sa Halchowk Stadium, Kathmandu, Nepal, sa Nobyembre 14.

Sakaling maselyuhan ng Pilipinas ang panalo sa Group F ng qualifiers, awtomatikong pasok na ang team sa 2019 AFC Asian Cup na gaganapin sa Enero 5 hanggang Pebrero 1 taong 2019.

—-

Inanunsyo ngayon ni Gilas Pilipinas Player Kiefer Ravena ang kanyang paglahok sa PBA rookie draft.

Ayon kay Ravena, kinonsulta niya ang kanyang pamilya bago nagdesisyong sumali sa draft.

Binigyang-diin nito na pangarap niyang lumevel up at sumali sa PBA.

Una rito, nagpahayag na din ng intensyon ang kapwa Gilas ni Ravena na si Jeron Teng na magsumite ng draft application sa PBA draft.

_____

Nasungkit ni Spanish tennis star Rafael Nadal ang kampeonato sa China Open.

Ito ay makaraang idispatsa ni Nadal si Nick Kyrgios ng Australia sa iskor na 6-2, 6-1.

Dahil dito, napasakamay ni Nadal ang ika-anim nitang tropeo para sa taong ito kung saan kabilang sa kanyang mga pinaghariang torneo ay ang French Open at US Open.

Samantala, sa women’s tennis naman, itinanghal na kampeon ng China Open si Caroline Garcia matapos talunin si Simona Halep sa iskor na 6-4, 7-6.

—-

Balik finals na ang Barangay Ginebra San Miguel sa 2017 PBA Governor’s Cup.

Tinapos ng Ginebra ang best of five series ng semi-finals kontra TNT Katropa sa kartadang 3-1.

Tinalo ng Gin Kings ang Katropa sa score na 115-105 sa Game 4 sa Araneta Coliseum, kagabi.

Muling makakaharap ng Ginebra sa finals rematch ang Meralco Bolts para sa best of seven series ng finals na magsisimula sa Biyernes, sa Quezon Convention Center, Lucena City.

—-

Nakabayad na si US boxing champion Floyd Mayweather, Jr. sa utang niyang 22 million US dollars o katumbas ng 1.1 billion pesos sa IRS o Internal Revenue Service.

Ang nasabing utang ay nag ugat sa hindi nabayarang buwis sa laban kay Fighting Senator Manny Pacquiao noong Oktubre 2016.

Ayon sa kampo ni Floyd Jr., ang ipinambayad nila ay nagmula sa 300 million dollars na panalo ni Mayweather laban kay UFC Star Conor McGregor.

Una nang inalmahan ni Mayweather ang paniningil sa kaniya ng IRS na nagtulak sa kanyang magsampa ng kaso dahil sa paniningil sa kanya sa hindi makatarungang halaga ng buwis.

Kumamada si Joe Devance ng 20 points para sa Barangay Ginebra dahilan upang masungkit nila ang 106-103 victory laban sa TNT sa Game 3 ng PBA Governors’ Cup Semi-finals sa Araneta Coliseum.

Nagdagdag naman si Justin Brownlee ng 17 points at 13 rebounds habang si Scottie Thompson ay tumipa ng 17 points at 12 rebounds para sa Gin Kings.

Dahil sa panalo, nakuha ng Ginebra ang 2-1 lead sa kanilang Best-of-5 Series.

Nagkainitan naman at nagtalo sina Barangay Ginebra Coach Tim Cone at Katropa Head Coach Nash Racela dahil sa sinasabing diperensiya sa bilang ng free throws.

Kung papalarin sa Game 4 bukas, makakasagupa ng defending champions sa finals ang Meralco Bolts na siyang dumurog sa Star Hotshots sa hiwalay na semi-finals series.

_____

Hindi pinaporma ng Minnesota Timberwolves ang NBA Champion Golden State Warriors sa kanilang face off sa isang exhibition game sa Shenzhen, China.

Naitala ang final score sa 111-97.

Pinangunahan nina Jimmy Butler at Karl Anthony Towns ang Timberwolves matapos gumawa ng tig-16 points.

20 points naman ang ginawa ni Kevin Durant para sa Golden State.

Ang dalawang grupo ay maghaharap muli sa araw ng linggo kung saan inaasahang babawi naman ang Warriors.

_____

Posibleng makapaglaro na si Lebron James sa laban ng Cleveland Cavaliers kontra Indiana Pacers sa NBA pre-season match up.

Ayon ito kay Cavaliers Coach Tyronn Lue ay kasunod na rin nang pagsalang ni James sa full practice session sa kauna-unahang pagkakataon matapos makaranas ng left ankle sprain.

Gayunman, sinabi ni Lue na tatanungin pa rin nila ang four-time NBA most valuable player kung kaya na nitong maglaro sa laban kontra Pacers.

 —-