SPORTS

Nasungkit ni Maria Sharapova ang kanyang unang WTA title.

Ito ay matapos niyang payukuin ni Sharapova ang Belarusian teenager na si Aryna Sabalenka.

Bagamat pukpukan ang laban, sinelyuhan ni Sharapova ang kanyang panalo sa pamamagitan ng isang powerful serve.

Matatandaang ang dating world number one ay bumalik sa aksyon nito lamang Abril matapos ang 15 buwan niyang suspensyon dahil sa paggamit ng ipinagbabawal na substance.

Taong 2015 nang huli siyang makasungkit ng kampeonato kung saan dinomina nito ang Italian Open.

—-

Abante na ng 2-0 ang Barangay Ginebra San Miguel matapos manalo sa best of seven finals nila kontra Meralco Bolts sa iskor na 86-76.

Bumida si Justin Brownlee ng Ginebra na nakapagtala ng 19 points habang mayroong 14 points at dalawang steals naman si LA Tenorio.

Hawak na ng Meralco ang kalamangan mula unang quarter hanggang makapagtala ng 17-1 run ang Ginebra sa natitirang anim na minuto ng last quarter.

Aminado naman si Ginebra Coach Tim Cone na nahirapan sila kaya ginawa nila umano lahat ng kanilang makakaya.

—-

Pinatawan ng one game suspension ng NBA si Portland Trail Blazer Guard CJ Mccollum.

Ito ay matapos na umalis sa bench area si Mccollum nang magpambuno ang kanyang kasamahan na Caleb Swanigan at si Alex Len ng kalabang koponan na Phoenix Suns sa fourth quarter ng   NBA Preseason Game.

Bagama’t hindi nakisama si Mccollum sa gulo ay ipinagbabawal sa rules ng NBA ang umalis sa bench area.

Dahil dito, hindi makapaglalaro sa unang laban ng Portland si Mccollum sa pagbubukas ng regular season ng NBA sa darating na  Miyerkules.

Tagumpay ang Barangay Ginebra sa Game 1 ng best of seven series nila kontra Meralco Bolts sa finals ng PBA Governor’s Cup.

Bumida sa nasabing laro si Justin Brownlee na gumawa ng 32 points, isang rebound, anim na assists at isang steal.

Nag-ambag naman ng 15 points, apat na rebounds at tatlong blocks si Japeth Aguilar samantalang gumawa ng 14 points, walong rebounds at dalawang blocks si Greg Slaughter at 11 points naman ang kontribusyon ni Kevin Ferrer.

Mula unang quarter ay lumamang na ang ginkings habang sa huling quarter at naitala ang final score sa 102-87.

—-

Nakatakdang i-retiro ng Memphis Grizzlies ang jersey number 9 ni NBA Champion Tony Allen.

Ayon sa team owner ng Grizzlies na si Robert Pera, hindi mapapantayan ang mga nagawa ni Allen para sa kanilang koponan.

Pinuri din ni Pera ang naging serbisyo ni Allen sa koponan sa loob ng pitong seasons.

Nabatid na naglaro si Allen para sa Grizzlies mula 2010 hanggang 2017 at nito lamang Setyembre ay lumipat na ito sa New Orleans Pelicans.

____

Lumagpak ang Pilipinas sa rankings ng FIBA makaraang selyuhan ng Gilas ang 7th spot sa FIBA Asia Cup na ginanap sa Beirut, Lebanon, noong Setyembre.

Bumaba sa 30th spot ang Gilas Pilipinas mula sa 27th spot noong isang taon.

Nasa 29th spot naman ang Czech Republic habang nasa 31st spot ang Belgium.

Samantala, muling sasabak ang Gilas sa qualification para sa 2019 FIBA World Cup na gaganapin sa China.

Makakasagupa ng Pilipinas sa 1st round sa Group B ng FIBA Asia ang Japan sa Nobyembre 24.

—-

Nanganganib na hindi makapaglaro sa opening game ng NBA ang Cleveland Cavaliers star na si Lebron James.

Ito ay dahil sa pananakit pa rin ng kaliwang bukong bukong na natamo nito habang nag-eensayo sa kanilang training camp.

Ayon kay Cavs Coach Tyronn Lue, hindi pa nila tiyak kung magiging handa na si Lebron bago sumapit ang laban.

Makakaharap ng Cavs sa October 18 ang Boston Celtics na koponan ngayon ng dati nilang teammate na si Kyrie Irving.

—-

Pursigido ang Meralco Bolts na maka-resbak sa defending champion Barangay Ginebra San Miguel  sa muli nilang paghaharap sa finals ng   P.B.A. Governors cup.

Aminado si Meralco Coach Norman Black na nagdiwang silang lahat na mistulang katapusan na ng mundo dahil sa kanilang rematch sa Gin Kings.

Ayon kay Black, isang mapait na karanasan ang pinagdaanan nila noong isang taon matapos talunin ang Bolts ng Ginebra sa Game 6 ng 2016 PBA Governors Cup Finals.

Gayunman, sa pagkakataon anyang ito ay titiyakin nilang mahihirapan ang Barangay Ginebra na maidepensa ang kanilang korona dahil aagawin ito ng Meralco.

Dagdag ni Black, determinado ang kanilang team na manaig kontra sa defending champion lalo’t may karanasan na sila sa finals.

Mas engrande ang pagbubukas ng Australian Open sa Enero ng susunod na taon.

Ito ay dahil itinaas na sa 3.1 million dollars ang prize money ng torneo.

Maliban dito, inaasahan din ang mas kaabang-abang at umaatikabong mga laban lalo’t balik na sa paglalaro ang mga pansamantalang nagpahinga sa mga torneo ngayong taon sa injury gaya nina dating mga world number one Novak Djokovic at Andy Murray.

Samantala, umaasa naman ang mga tennis fan at organizers na sasabak na muli sa laro si dating world’s number one Serena Williams na ilang buwan na ring namahinga sa tennis dahil sa pagbubuntis at panganganak.

—-