SPORTS

Humingi ng paumanhin si Barangay Ginebra Coach Tim Cone kay Meralco Bolts Coach Norman Black.

Ito ay kaugnay sa inasal ni Cone kung saan nilagpasan lamang nito at hindi nakipagkamay kay Black matapos ang mainit na Game 3 ng PBA Governor’s Cup kung saan ang Meralco ang nakasungkit ng panalo.

Inamin ng Gin Kings Coach na napikon siya sa pagtawag pa ni Black ng time out sa nalalabing 38.1 seconds ng fourth quarter gayong lamang naman ng 13 puntos ang Bolts.

Gayunman, sinabi ni Cone na nadala lamang siya ng sitwasyon at iginiit nitong mataas ang kanyang respeto kay Black.

Tiniyak din ni Cone na personal siyang magso-sorry kay Black.

—-

Sasailalim sa surgery si Boston Celtics forward Gordon Hayward matapos ang left leg injury.

Gayunman sinabi ni Celtics Coach Brad Stevens na inaasahan niya ang full recovery ni Hayward kapag sumalang na sa surgery.

Si Hayward ay ibiniyahe pabalik ng Boston at dinala sa New England Baptist Hospital para sa kinakailangang treatment sa kaniyang injury.

Sinabi ni Stevens na nalulungkot si Hayward dahil bukod sa physical pain ang emotional pain matapos ibigay ang best effort sa laban kontra Cleveland Cavaliers kung saan sila natalo noong Martes.

Hindi naman masabi ni Stevens kung kailan uubrang makapaglaro si Hayward subalit inaasahan nilang sandaling panahon lamang ay makakarekober na ito mula sa kaniyang injury.

—-

Nakabawi na ang MERALCO Bolts  sa serye ng 2017 PBA Governors Cup finals kontra defending champion Barangay Ginebra San Miguel Gin Kings.

Nasilat ng MERALCO ang kanilang unang panalo upang ipako sa 2-1 ang kartada pabor sa Ginebra sa paghaharap ng dalawang team sa game 3 ng best of seven series, sa Araneta Coliseum, kagabi.

Inilampaso ng Bolts ang Gin Kings sa score na 94-81  sa pangunguna ni Allen Durham na nagpakawala ng double-double na 38 points at 20 rebounds.

Gayunman, asahan ng magiging dikdikan ang susunod na laban para sa MERALCO  makaraang magtamo ng injury ang isa sa bigman ng team na si  Ranidel  de Ocampo dahilan upang maunsyami ang paglalaro nito sa game 4.

Muling maghaharap ang dalawang koponan para sa game 4, sa big dome pa rin, ala 7:00 ng gabi, bukas.

Walang bakas na kagagaling lamang sa ankle injury ni Lebron James nang pangunahan nito ang panalo Cleveland Cavaliers kontra Boston Celtics sa season opener ng NBA.

Kumamada si Lebron ng 29 puntos at tinapos ng Cavs ang laban kontra Celtics sa iskor na 102-99.

Ang bagong miyembro naman ng Cleveland na si Dwyane Wade ay nakapag-ambag ng 29 ding puntos habang si Derrick Rose naman ay nakagawa ng 14 puntos.

Samantala, pansamantalang nabalam ang kalagitnaan ng unang quarter nang magtamo ng ankle injury si Gordon Hayward.

Ito ay matapos abutin ni Hayward ang alley-oop pass mula kay Kyrie Irving.

Sa kasamaang palad ay mali ang bagsak ni Hayward at pumilipit at nabali ang bukong-bukong nito.

Bumuhos naman sa social media ang suporta ukol sa sinapit na injury ni Hayward.

—-

Binigyan na ng go signal ng kanyang doktor ang golf star na si Tiger Woods para makapaglaro.

Ayon sa agent nito na si Mark Steinberg, nakakuha na si Woods ng clearance mula sa kanyang doktor matapos itong magkaroon ng injury sa likod noong Pebrero.

Nag-post din si Woods na kanyang social media account ng larawan habang siya ay nagsasanay sa pag-go-golf.

Ilang buwang isinailalim si Woods sa rehabilitation para magpahinga at tuluyang magpagaling mula sa kanyang injury.

—-

Walang pinagsisisihan si NBA Star Kyrie Irving sa paglipat nito sa Boston Celtics.

Sa kabila ng pagkukumahok ng mga koponan na bumuo ng super teams ay nagdesisyon si Irving na umalis sa Cleveland Cavaliers at iwanan ang kanyang teammate na si Lebron James.

Sinabi ni Irving na nais niya ng espasyo kung saan ay may matututunan siya sa araw – araw kung saan ay kanyang maibubuhos ang buo niyang kakayahan.

Binigyang – diin nito na hindi naman siya nababahala kung siya man ay hindi magtagumpay sa pinili niyang landas.

______

Nasungkit ni two time world 10-ball champion Rubilen Amit ang kampeonato sa Women’s Division ng 2017 Guri International 9-Ball Championship sa ginanap sa South Korea.

Tinalo ni Amit ang pambato ng South Korea na si Park Eunji sa semifinals habang idinispatsa nito si Wie Tsu-Chien ng Taiwan sa mismong finals.

Naibulsa ni Amit ang mahigit 1.3 milyong pisong grand prize ng torneo.

—-

Patay ang goalkeeper ng isang Indonesian football team na si Choirul Huda matapos nitong makabanggaan ang kapwa nito teammate na si Ramon Rodriguez sa kalagitnaan ng kanilang laro.

Batay sa video footage ng laro, sasaluhin sana ni Huda ang bola bago ito pumasok sa goal nang aksidente itong masalubong ang kanyang teammate na si Rodriguez.

Agad na isinugod sa ospital ang goalkeeper ngunit hindi na ito nagawa pang i-revive ng mga doktor.

Hinihinalang dahil sa tindi ng impact ng salpukan ng dalawa ay huminto sa pagtibok ang puso ni Huda na naging dahilan upang bawian ito ng buhay.

—-

Balik ensayo si NBA Superstar Lebron James.

Ito ay matapos ang tinamo niyang injury sa kaliwang bukong – bukong sa practice ng koponan.

Ayon kay Cavs Coach Tyronn Lue, nakibahagi sa training ng team si James para matesting ang kanyang pilay.

Gayunman, wala pa ring kasiguraduhan kung tuloy na ang paglalaro ni Lebron sa Miyerkules kontra sa Boston Celtics.

Matatandaang tatlong Preseason Games na ang hindi nalalaruan ni Lebron sa Cavs.

______