RONDA PROBINSYA

Isang 28-anyos na lalaki ang sugatan matapos hatawin ng pry bar ng kanyang kasamahan sa bahay dahil umano sa pagtanggi niyang magpahiram ng cellphone.

Kinilala ang biktima na si Ashley Luminog, na tinamaan sa bandang noo habang natutulog sa kanilang bahay sa Cebu City.

Ayon kay Luminog, nagising siya sa malakas na tunog at matinding sakit sa ulo.

Nakita niyang hawak ng suspek na si alias “Tibo,” 19-anyos, ang pry bar. Sinubukan pa raw siyang hatawin muli pero nailagan niya.

Agad rumesponde ang mga awtoridad at naaresto ang suspek. Nakuha rin sa kanya ang pry bar na ginamit sa krimen.

Hinala ng biktima, nainggit umano ang suspek matapos siya makabili ng bagong cellphone na matagal niyang pinag-ipunan.

Nakatakda nang magsampa ng kaso si Luminog laban sa suspek.

Pinasimulan ni Mayor Leni Robredo ng Naga City ang kanyang programa sa radyo na “Oras ni Mayor” sa DWIZ 95.1 Naga, na layuning magbigay ng impormasyon at talakayin ang mga isyung may kinalaman sa lungsod. Sa unang episode ng programa, tinutukan ng alkalde ang kahandaan ng Naga City sa pagdating ng Bagyong Uwan.

Ibinahagi ni Mayor Robredo ang mga karanasan ng lungsod sa nakaraang mga bagyo at ikinumpara ito sa naranasan ng Cebu City sa ilalim ng Bagyong Tino, na aniya ay halos kapareho ng epekto ng Bagyong Kristine sa Naga. Dagdag pa niya, ang kaibahan lamang ay ang kawalan ng coastal area sa Naga, dahilan upang magkaiba ang uri ng panganib na kinakaharap ng dalawang lungsod.

Patuloy ang panawagan ni Mayor Robredo sa mga residente na agad na sumunod sa mga abiso ng evacuation at huwag nang hintaying lumala pa ang panahon bago kumilos. Hinikayat din niya ang lahat na makiisa sa paglilinis ng mga kanal at daluyan ng tubig, at huwag umasa lamang sa lokal na pamahalaan.

Ayon sa alkalde, sa unang araw pa lamang ng kanyang panunungkulan ay agad siyang hinarap ng mga pagbaha dahil sa dami ng waterways sa lungsod. Marami na umanong minor works ang naisagawa upang mapigilan ang pagbaha, ngunit mayroon pa ring mga major projects na kinakailangang ipatupad upang matugunan ang suliraning ito sa mas malawak na antas.

Kaugnay nito, aktibo umano ang Waterways Management Committee na pinamumunuan ni Konsehal Aries Macaraig, na regular na nagsasagawa ng inspeksyon sa mga creek at drainage upang matiyak na malinis at walang bara. May ilang lugar na may mga obstruction at agad nang pinadalhan ng abiso upang maisaayos.

Binigyang-diin din ng alkalde ang pagpapatupad ng “Zero Tolerance Against Corruption” at “No Gift Policy” sa pamahalaang lungsod. Aniya, ipinagbabawal na ang pagreregalo sa mga opisyal at kawani upang maiwasan ang anumang uri ng impluwensiya sa paggawa ng mga desisyon. Magkakaroon din ng orientation meeting para sa mga supplier at contractor upang maipaliwanag ang bagong patakaran.

Sa usapin naman ng kaligtasan at serbisyo, tiniyak ni Mayor Robredo na patuloy ang suporta sa mga barangay electricians, kung saan binigyan sila ng high-quality tools, flyers, at harnesses para sa kanilang proteksyon. Layunin ng programa na dahan-dahang ma-equip ang mga barangay electricians upang mapabuti ang kanilang operasyon.

Ipinagmalaki rin ng alkalde ang pagbuhay at pagpapaganda ng Roco Library, na ngayon ay bukas na pitong araw sa isang linggo at may internet connection, 20 laptops, at learning materials para sa mga guro sa bawat antas ng paaralan. Dinagdagan na rin ng mga mesa at air conditioning unit ang pasilidad dahil sa dami ng mga gumagamit, lalo na sa Children’s Room at sa bahagi ng mini-museum ni dating Senador Raul Roco.

Tinalakay din ni Mayor Robredo ang mga hakbang sa kahandaan ng lungsod sa Bagyong Uwan. Mayroong limang evacuation centers na pinamamahalaan ng lungsod — Balatas, Sta. Cruz, Mepo 2nd Floor, JMR Coliseum, at City Hall People’s Hall — na pawang may well-trained camp managers na sumusunod sa standards ng DSWD.

Mayroon ding limang water assets sa lungsod — tatlo mula sa Angat Buhay at dalawa mula sa BFAR, na handang gamitin anumang oras para sa operasyon. Inatasan ng alkalde ang lahat ng tanggapan ng pamahalaang lungsod na magpadala ng mga kinatawan sa disaster management teams upang mas mapabilis ang pagtugon sa panahon ng kalamidad.

Ayon kay Mayor Robredo, katuwang din ng lungsod ang DepEd schools, mga simbahan, private schools, at ilang pribadong tahanan sa pagtanggap ng mga evacuees. Tiniyak din niyang ginagawa ng LGU ang lahat upang maging maayos, ligtas, at komportable ang bawat evacuation center, na may sapat na tubig, palikuran, at kusina.

Kasabay nito, binanggit din ni Mayor Robredo ang pakikipagtulungan ng mga mall sa Naga para magbigay ng parking spaces at karagdagang evacuation areas kung kakailanganin. Ang Naga Central Bus Terminal, na madalas bahain, ay nakatakdang ayusin at kasama sa 2026 city budget para sa pagpapalalim ng mga kanal.

Dalawang tulay sa Barangay Cararayan at ang Colgante Bridge na kasalukuyang may bitak ay kabilang din sa mga prayoridad na proyekto ng lungsod sa susunod na taon.

Binigyang-diin ng alkalde na ang evacuation ay first come, first served basis, kaya’t dapat agad na sumunod ang mga residente kapag nag-anunsyo na ang barangay.

Sa pagtatapos ng programa, tiniyak ni Mayor Leni Robredo na mas handa na ngayon ang Naga City sa pagharap sa mga sakuna tulad ng Bagyong Uwan, sa tulong ng pagkakaisa, disiplina, at malasakit ng bawat Nagueño.

Patay ang dalawang babae matapos barilin ng kanilang kapitbahay sa Tabaco City, Albay.

Batay sa imbestigasyon, nag-iinuman ang suspek kasama ang isang kapitbahay sa bahay ng kanyang kapatid nang yayain niya ito na bumili umano ng ipinagbabawal na gamot sa isa sa mga biktima, na noo’y nag-iinuman din malapit sa lugar.

Nagalit umano ang suspek nang tumanggi ang biktima at umalis, kaya bumalik ito dala ang baril at binaril ito at isa pang babae sa isang eskinita.

Dinala sa ospital ang dalawang biktima ngunit idineklarang dead on arrival.

Pinaghahanap na ng mga awtoridad ang suspek.

Patay ang isang 58-anyos na magsasaka matapos bugbugin ng sarili niyang anak sa Davao City.

Ayon sa imbestigasyon, umiinom ng kape ang biktima sa loob ng kanilang bahay nang dumating ang kanyang 30-anyos na anak na may dalang kahoy.

Bigla raw nitong hinampas sa mukha ang ama at pinalo pa gamit ang pala.

Dahil sa tindi ng pinsala, agad na nasawi ang biktima.

Tinitingnan ng mga awtoridad ang personal na galit bilang posibleng motibo sa krimen.

Naaresto naman ang suspek.

Nagbanta ang lokal na pamahalaan ng Daraga, Albay na papanagutin ang dalawang vlogger na nag-selfie nang hubad sa “green lava” view area ng Bulkang Mayon.

Ayon kay Mayor Victor Perete, labis nilang kinondena ang ginawa ng mga vlogger na tinawag niyang bastos at pambababoy sa kilalang tourist spot.

Inatasan ng alkalde ang mga awtoridad na hanapin ang dalawa at tukuyin ang mga batas o ordinansang kanilang nilabag.

Tatalakayin rin ng Sangguniang Bayan ang posibilidad na kasuhan at ideklarang persona non grata ang mga vlogger dahil sa kanilang ginawa.

Pansamantalang ipinasara ng Archdiocese of Cebu ang Parish Church of San Fernando Rey sa Liloan matapos matagpuang patay ang isang babae sa loob ng simbahan.

Ayon sa ulat ng pulisya, may mga sugat at pasa sa leeg ang biktima. Nakita umano siyang pumasok sa simbahan kasama ang isang lalaki, at nakarinig naman ng sigawan at kaguluhan ang ilang saksi.

Kinumpirma ng simbahan na sa loob mismo ng simbahan nangyari ang pananakit.

Dahil sa marahas na insidente, sinuspinde muna ang lahat ng misa at pampublikong gawain habang isinasagawa ang kinakailangang ritwal ng paglilinis at pagbabalik ng kabanalan alinsunod sa batas ng simbahan.

Ang hakbang na ito ay upang maibalik ang dangal ng simbahan bilang tahanan ng panalangin at kapayapaan.

Isang babae na nag-ulat umano ng bagong silang na sanggol na iniwan sa kulungan ng baboy ang kalaunan ay natuklasang siya pala ang mismong ina ng sanggol.

Ayon sa pulisya, sinabi ng 20-anyos na si “Ana” na natagpuan niya ang sanggol sa isang pigpen sa Barangay Anonang, Leon, Iloilo.

Kasama raw ni Ana noon ang kanyang dalawang taong gulang na anak. Ngunit kinabukasan, napansin ng mga pulis ang kakaibang kilos ni Ana — maputla, balisa, at may bahid ng dugo ang kanyang damit at binti.

Dito na siya umamin na siya mismo ang nanganak at itinago ang sanggol dahil sa hiya.

Kinumpirma ng medikal na pagsusuri na kakapanganak lamang ng babae.

Si Ana ay nasa pangangalaga ngayon ng Municipal Social Welfare and Development Office, habang ang sanggol ay nasa ospital at nasa maayos na kalagayan.