RONDA PROBINSYA

Patay ang isang 51-anyos na magsasaka matapos umanong saksakin ng kanyang kapitbahay kasunod ng alitan tungkol sa Wi-Fi connection sa Ilagan City sa Isabela.

Ayon sa pulisya, nakarinig ang suspek na isang 37-anyos na construction worker ng mainitang pagtatalo sa pagitan ng biktima at asawa nito tungkol sa Wi-Fi connection.

Sa imbestigasyon, nagkasalubong umano ang dalawa at tinangka raw ng biktima na hampasin ang suspek gamit ang metal pipe. Dahil dito, bumunot umano ng bolo ang suspek at nasaksak ang biktima nang ilang beses.

Matapos ang insidente, nagtungo ang suspek sa bahay ng kanyang tiyahin at kusang sumuko sa mga awtoridad.

Patuloy ang imbestigasyon ng pulisya habang inihahanda ang mga kasong isasampa laban sa suspek.

Isang critically endangered na Philippine freshwater crocodile ang nasagip ng mga awtoridad matapos itong matagpuan sa isang sapa sa Barangay San Isidro, Kidapawan City, Cotabato noong Hunyo 2.

Ayon sa DENR, ang babaeng buwaya na may habang 5.7 talampakan at timbang na 35 kilo ay ligtas na nailipat sa University of Southern Mindanao Wildlife Rescue Center para sa obserbasyon bago muling pakawalan sa angkop nitong tirahan. Nanawagan din ang ahensya sa publiko na agad iulat ang mga wildlife sightings upang makatulong sa konserbasyon ng mga nanganganib na species.

#dwiz #dwiznews #aliw23

Isang lalaki sa San Fernando, southern Cebu ang nahaharap sa kasong arson matapos umano niyang sunugin ang sarili niyang bahay.

Ayon sa pulisya, lasing umano siya nang mangyari ang insidente sa Barangay Panadtaran.

Batay sa imbestigasyon, may nakakita umano sa kanya na sinindihan ang kanyang bahay bago tumakas. Agad namang rumesponde ang mga kapitbahay at naapula ang apoy kaya hindi na ito kumalat sa ibang bahay.

Itinanggi ni Paradela ang paratang at sinabi niyang hindi niya maalala ang nangyari dahil sa sobrang kalasingan. Sinabi rin niyang kakauwi lang niya mula sa lamay at magluluto sana siya nang makita niyang may apoy na ang bahay.

Nasawi ang isang 28-anyos na babae matapos mawalan ng malay habang nakapila para sa ₱20 kada kilong bigas sa Bukidnon.

Sa imbestigasyon, maaga umanong pumila ang biktima, ngunit sa kalagitnaan ng pila ay bigla na lamang itong natumba at nawalan ng malay.

Agad naman siyang isinugod ng mga tao sa paligid sa ospital, ngunit idineklara siyang dead on arrival.

Batay sa death certificate ng ginang, problema sa puso ang ikinasawi niya na humantong sa atake sa puso.

Nanawagan naman ng tulong ang pamilya ng babae, lalo pa’t apat na anak ang naiwan at naulila ng biktima.

Ligtas na naiahon ng mga rescuer ang isang 37-anyos na babaeng hiker sa bangin sa Mt. Apo.

Sa imbestigasyon, umakyat umano ang biktima sa isang lakaing bato para magpa-picture. Ngunit matapos ang picture taking, bigla umanong humangin ng malakas dahilan para mahulog ito sa bangin na tinatayang nasa 30 metro ang taas.

dahil sa insidente, nagtamo ng sugat sa ulo at iba pang parte ng katawan ang babae

Sa ngayon, nasa maasyos nang kalagayan ang ginang matapos mabigyan ng atensyong medikal.

: CDRRMO Sta Cruz/Digos CDRRMO

Patay ang isang taong gulang na batang lalaki matapos masagasaan ng isang bus kasunod ng aksidente ng sinasakyang motorsiklo ng kanyang pamilya sa bayan ng Samboan, Cebu.

Ayon sa pulisya, pauwi na sana ang pamilya nang mawalan ng balanse ang kanilang motorsiklo matapos umanong madaanan ang isang lubak sa national highway.

Sa pagbagsak ng motorsiklo, nabitawan ng ina ang bata na tumilapon sa kalsada. Sa kasamaang-palad, kasabay nito ang pagdaan ng isang pampasaherong bus at nasagasaan ng gulong nito ang ulo ng bata.

Posibleng maharap sa kasong reckless imprudence resulting in homicide ang driver ng bus, habang pinag-aaralan pa ng pamilya ng bata kung magsasampa sila ng reklamo.

Nagbabala ang pamahalaang lungsod ng Angeles laban sa mga taong nagpapanggap na biktima o survivor ng gumuhong gusali sa lungsod.

Ito ay matapos arestuhin ng Angeles City Police ang isang lalaki na nag-viral sa social media matapos sabihin na nakaligtas siya sa insidente.

Ayon sa lalaki, bumibili umano siya ng beer malapit sa lugar nang mangyari ang pagbagsak ng gusali.

Sa imbestigasyon, napag-alaman na nakatanggap na siya ng tulong pinansyal mula sa Department of Social Welfare and Development (DSWD).

Nang subukan niyang humingi muli ng ayuda, nagsagawa ng beripikasyon ang mga awtoridad at natuklasang hindi siya survivor, walang kaugnayan sa mga biktima, at hindi residente ng Angeles City.

Inamin ng lalaki na gawa-gawa lamang ang kanyang kuwento kaya siya ay dinala sa kustodiya ng pulisya habang inihahanda ang kaukulang kaso laban sa kanya.

Hawak na ng pulisya ang 42-anyos na traysikel drayber na suspek sa pagpatay sa 19-anyos na dalagita sa Alcoy, Cebu.

Ayon sa Alcoy Municipal Police, inamin umano ng suspek na sinaksak niya ang biktima matapos siyang magalit dahil natagalan itong magbigay ng perang pambili ng gasolina.

Batay sa imbestigasyon, sumakay umano biktima sa traysikel ng suspek noong Mayo 23 at nangakong magbibigay ng 150 pesos para sa gasolina. Ngunit ayon sa suspek, natagalan ang biktima sa pag-abot ng pera kaya niya ito sinaksak habang nasa loob pa ng traysikel.

Natagpuan ang naaagnas nang katawan ng biktima noong Mayo 27 at nakilala sa pamamagitan ng tattoo at mga personal na gamit.

Posibleng robbery with homicide ang isampang kaso laban sa suspek habang hinihintay pa ang resulta ng autopsy.

Isang 73-anyos na lola ang nasawi matapos umanong hampasin ng kanyang 78-anyos na asawa sa Bagabag, Nueva Ecija.

Ayon sa pulisya, narinig ng mga kapitbahay ang pagtatalo ng mag-asawa kaya agad nilang tinawag ang kanilang anak para sana awatin ang dalawa.

Sa gitna ng pagtatalo, hinampas umano ng suspek ang ulo ng kanyang asawa gamit ang bakal na bahagi ng tungkod nito.

Nadala pa sa ospital ang biktima ngunit hindi na ito umabot nang buhay.

Agad namang inaresto ng mga pulis ang suspek.

Isang American national ang arestado ng mga awtoridad matapos matagpuang kasama ang dalawang menor de edad sa loob ng isang condominium unit sa Cebu City.

Ayon sa NBI-Central Visayas, isinagawa ang operasyon matapos makatanggap ng impormasyon mula sa DSWD-7.

Nasagip sa operasyon ang dalawang batang lalaki na may edad 10 at 15 na agad na ipinasa sa kustodiya ng DSWD.

Batay sa paunang imbestigasyon, umano’y inalok ng dayuhan ng pera ang mga menor de edad kapalit ng pagpapalipas ng gabi sa condo unit.

Nahaharap ngayon ang suspek sa patung-patong na kaso.

Patuloy pa ang imbestigasyon ng mga awtoridad sa insidente.

: NBI-CEVRO