RONDA PROBINSYA

Patay sa pananaksak ang isang 38-anyos na lalaki matapos umano siyang mahuli ng isang lalaki na kasama ang live-in partner nito sa loob ng banyo sa Barangay Manambong Sur, Bayambang, Pangasinan.

Ayon sa pulisya, nahuli ng 44-anyos na suspek ang kanyang kinakasama at ang biktima na nagtatalik sa loob ng banyo ng kanilang kapitbahay.

Nagkaroon umano ng mainitang pagtatalo na humantong sa pananaksak ng suspek sa biktima.

Matapos ang insidente, tumakas ang suspek pero kalaunan ay naaresto pa rin ng mga awtoridad habang hawak ang patalim na ginamit sa krimen.

Kalaboso ang isang sepulturero matapos mangikil sa magkasintahang estudyante na nahuli niyang nagtatalik sa isang sementeryo sa Tuguegarao City sa Cagayan.

Sa imbestigasyon, hinintay umano ng suspek na matapos sa pagtatalik ang dalawa bago lumapit sa kanila at sinabing nakuhanan sila ng video.

Nag-alok ang magkasintahan ng 1,000 pesos kapalit ng pagbura, subalit humingi pa ng karagdagang 500 pesos ang sepulturero.

Dito na umano humingi ng tulong ang mga biktima sa pulisya at narekober ang video mula sa cellphone ng suspek, kasama ang perang tinanggap niya mula sa magkasintahan.

Nahaharap naman ang sepulturero sa kasong paglabag sa Anti-Photo and Video Voyeurism Act of 2009 at extortion.

Nanawagan ang Philippine Nickel Industry Association (PNIA) sa agarang pagpapalaya sa isa nilang miyembro na inaresto ng Bureau of Immigration sa NAIA 3 nitong August 21 mula sa Hong Kong.

Ayon sa PNIA, iligal ang pagkulong kay Joseph Sy na siya ring Chairman ng Global FNI Ferronickel Holdings, Inc. dahil naresolba na ang isyu sa citizenship nito.

Tinukoy ng grupo ang dalawang rulings noon ng Bureau of Immigration na nagpapatibay sa Filipino citizenship nito Sy.

Sinabi ng grupo na paglabag sa  fundamental principles ng due process ang pagkaka-aresto sa kanilang miyembro kasabay nang babala na magdudulot ng maling signal sa business at investment community ang pagkaka-aresto kay Sy dahil taliwas ito sa isinusulong ng Pilipinas na pagpapalakas sa tiwala ng investors sa mining industry.

Sa kabila nito, nanindigan ang grupo sa kanilang pagsuporta  sa mining industry sa pagpapanatili ng transparency at pagrespeto sa rule of law at ang pagprotekta sa karapatan ng mga lider ng kanilang industriya ay mahalaga sa pagpapatatag ng tiwala para  makamit ang paglago sa pamumuhunan.

Patay ang 12-anyos na babae matapos masabugan ng granada sa likod ng kanilang bahay sa General Santos City.

Ayon sa stepfather ng biktima, nakita pa umano niya si alyas Angel na naglalakad sa labas bago ang insidente at inakala niyang nangangalakal ng bote at bakal gaya ng nakasanayan.

Ngunit makalipas ang ilang minuto, nakarinig umano siya ng malakas na pagsabog at dito na nila natagpuan ang bata na duguan.

Hinala ng pamilya, maaaring napagkamalan ni Angel na bakal ang granada at aksidenteng sumabog habang hawak niya ito.

Lumabas din sa imbestigasyon, na naputol ang isa niyang kamay, indikasyong hawak niya ang granada nang sumabog ito.

Patuloy ang imbestigasyon ng mga pulis upang malaman kung saan nagmula ang granada at paano ito napunta sa kamay ng bata.

 Umani ng papuri ang isang ina sa pagsuplong niya sa kaniyang sariling anak sa mga pulis na nagtatago ng aabot sa 1.5 million pesos na halaga ng marijuana sa kanilang tahahan sa Davao City.

Nasabat ng mga awtoridad ang hindi bababa sa 1,000 grams ng pinatuyong marijuana.

Inaalam na ng pulisya kung saan galing ang marijuana na nakuha mula suspect.

Nahaharap naman sa kasong paglabag sa Comprehensive Dangerous Drugs Act of 2002 ang nahuling suspek.

Pasintabi sa sensitibong balita.

Kalunus-lunos ang sinapit ng isang konduktor ng pampasaherong bus, matapos siyang mabangga at masagasaan ng dalawang sasakyan sa General Trias, Cavite.

Ayon sa mga ulat, bumaba ang biktima sa bus na pagarahe na sana nang bigla siyang mabundol ng isang kotse.

Sa kasamaang palad, hindi na nagawang umiwas ng biktima at nasagasaan at nakaladkad pa ito sa highway ng kasunod na dump truck.

Dahil dito, nahati ang baywang at itaas na bahagi ng katawan ng biktima, kung saan tinatayang nasa apat na metro umano ang layo nito sa isa’t isa.

Kaugnay nito, agad namang nadakip ng mga awtoridad ang driver ng naturang kotse, habang patuloy ang pagtugis sa driver ng dump truck.

Patay ang isang guro, matapos barilin mismo ng sarili nitong estudyante sa loob ng kanilang campus sa Balabagan, Lanao Del Sur.

Kinilala ang biktimang si Danilo Barba, 34-anyos, habang sa alyas na “Kaizer” nakilala ang suspek.

Ayon sa ulat, naglalakad ang biktima patungo sa paaralan, nang bigla umano itong hinarang ng suspek na sakay ng motorsiklo.

Agad tumakas ang suspek, subalit kusang-loob ding sumuko sa tulong ng kaniyang kapatid na pulis.

Ayon sa pulisya, matinding sama ng loob ang nag-udyok sa suspek na gawin ang krimen matapos umano siyang ibagsak ng naturang guro.

Sa ngayon, mas pinaigting ng pulisya ang seguridad sa eskwelahan.

Dalawang katao ang nasawi habang dalawa pa, ang sugatan matapos mahulog ang sinasakyan nilang loader truck sa tinatayang isang daang (100) metrong bangin sa La Trinidad, Benguet.

Ayon sa mga awtoridad, patungo sana sa Barangay Bineng ang mga biktima upang magsagawa ng road clearing operations kaugnay ng naiulat na soil erosion.

Sa imbestigasyon, nawalan umano ng preno ang loader habang pababa sa matarik at pakurbang bahagi ng kalsada, dahilan upang bumulusok ito sa bangin.

Agad na isinugod sa ospital ang dalawang sugatan na patuloy na nilalapatan ng lunas.

Patuloy pa rin ang imbestigasyon sa insidente.

PINANINIWALAAN na isang mag-asawang natalo noong May 2025 elections ang nasa likod ng disinformation campaign laban kay Special Assistant to the President Anton Lagdameo kaugnay sa mga isyung ipinakakalat sa Bangsamoro Automomous Region in Muslim Mindanao (BARMM). Ito ang pahayag ni Maguindanao del Sur Congressman Esmael ‘Toto’ Mangudadatu hinggil sa mga isyu sa BARMM na sinasabing pilit iniugnay ni Sultan Kudarat Gov. Datu Pax Ali Mangudadatu kay Lagdameo upang dungisan ang tiwala ni Pangulong Ferdinand Marcos Jr. sa kanyang special assistant. Buhat pa noong 2025 elections ay lantaran na umanong inihahayag sa publiko ng pamilya ni Gov. Datu Pax Ali ang paninira kay Lagdameo hanggang matapos ang halalan kung saan natalo sa mga kandidato ni SAP ang ama ni Datu Pax na si Suharto ‘Teng’ sa pagka-gobernador ng Maguindanao del Norte at ang ina nitong si Bai Marriam sa parehong posisyon sa lalawigan naman ng Maguindanao del Sur. Giit ni Cong. Toto, ngayong nalalapit ang October 13, 2025 BARMM parliamentary election ay muling mararamdaman umano ang partisipasyon ulit nina Gov. Datu Pax Ali at pamilya nito sa mga paninira kay Lagdameo. “Bukod sa luma at maling bintang na si Anton ang pangunahing dahilan ng hindi magandang resulta para sa senatorial lineup ng Alyansa nuong nagdaang May election ay pilit nilang iniuugnay si SAP sa mga kasinungalingang nasa likod siya ng mga pagtatangka na muling ipagpaliban ang October 13 BARMM parliamentary polls,” pahayag ni Cong. Toto. “Sa totoo lang ay si Anton ang nangunguna at aktibong sumusulong para sa ganap na pagkakaroon ng parliamentary government ng BARMM sa pamamagitan nitong paparating na October 13 election. At iyan ay sa utos sa kanya ng Pangulo bilang pagtupad sa pangakong mabigyan ng ganap na pagsasarili ang Bangsamoro region at mapanatili ang kapayapaan at progreso hindi lang sa rehiyon kundi sa buong Mindanao,” diin ni Cong. Toto. Kung maaalala, noong nagdaang mga linggo ay muling kumalat sa loob ng BARMM ang mga mali at mapanirang balita na si Lagdameo ang umano’y nasa likod ng hindi pagpasa ng BTA bill na magbibigay ng allocation para sa pitong upuan na dapat ay para sa mga kinatawan ng bumitiw sa BARMM na lalawigan ng Sulu. Sinasabing si Lagdameo rin ang isa sa mga naghahangad na muling ipagpaliban ang nakatakdang October 13 BARMM election. Subalit pinaniniwalaan na isang mataas na opisyal ng Commission on Elections (Comelec) ang nakikipagsabwatan sa ilang lider ng Bangsamoro upang ituloy ang halalan sa October 13 para sa 73 upuan ng BARMM parliamentary at ang para sa pito pang upuan para sa 80-member Parliament ay sa pamamagitan ng Presidential appointment or special election. Ipinalalagay na ang nasabing opisyal ng Comelec ang nasa likod ng umano’y mapanlinlang na kuwento na kesyo humihiling ng pagpupulong sa Presidente ang mga gobernador ng BARMM at nakiusap pa ang mga ito na huwag isama si Lagdameo. Lumalabas na ang interes umano ng pamilya nina Teng Mangudadatu ay nakatutok sa appointment para sa BARMM parliamentary seat kung hindi magtagumpay ang grupo nina Chaiman Abdulraof Macacua at Lagdameo na maisabay sa darating na October 13 elections ang pitong upuan ng Bangsamoro parliament at ang pagpuno nito ay sa pamamagitan na lamang ng pag-appoint ni Pangulong Marcos. Samantala, lumitaw ang mga alegasyon na ang inaasahan ng pamilya nina Teng Mangudadatu para sa pagkakataon na ma-appoint ay ang kanilang koneksiyon umano sa naturang poll official.