RONDA PROBINSYA

Inalis sa puwesto at dinis-armahan ang isang pulis matapos umanong magtutok ng baril sa isang sibilyan habang nasa impluwensiya ng alak sa Barangay Antipolo, Dapitan City.

Kinilala ang pulis na si Police Corporal Henry Boquida, na nakatalaga sa Sapang Dalaga Municipal Police Station sa Misamis Occidental.

Ayon sa nag-upload ng video, naganap ang insidente noong Hunyo 21. Nag-viral sa social media ang video ng umano’y komprontasyon at panawagang papanagutin ang nasabing pulis.

Batay sa pahayag ng Police Regional Office 10, agad na inalis si Boquida sa kanyang puwesto, binawi ang kanyang service firearm, at isinailalim sa restrictive custody habang nagpapatuloy ang imbestigasyon.

Aabot sa 17 silid-aralan ng Panitian Elementary School sa Panitian, Sofronio Española, Palawan ang naapektuhan matapos bahain ang paaralan noong Hunyo 22 dahil sa malakas na pag-ulan.

Bagama’t hindi inabot ng baha ang kindergarten classroom, maraming silid-aralan ang napasok ng tubig na nagdulot ng pinsala sa mga gamit ng mga estudyante at guro. Kabilang sa mga naapektuhan ang mga silid na kamakailan lamang inayos sa pamamagitan ng Brigada Eskwela.

Dahil dito, humihingi ng tulong ang paaralan sa mga magulang, barangay opisyal, lokal na pamahalaan, at iba pang stakeholders upang maibalik sa maayos na kondisyon ang mga silid-aralan at mapalitan ang mga nasirang kagamitan. Patuloy naman ang paglilinis at monitoring sa lugar.

Binisita ni Leyte Rep. Martin Romualdez ang mga naulilang pamilya ng mga estudyanteng nasawi sa pamamaril sa San Jose National High School sa Tacloban City.

Personal na nakiramay si Romualdez sa lamay kasabay ng pangangamusta sa mga kaanak ng mga biktima, nag-alay ng panalangin, at nagbigay ng “words of comfort” na magpapalakas ng loob sa gitna ng pagluluksa sa madugong karahasan na sinapit ng mga biktima.

Ang pagpunta ng mambabatas ay para kamustahin at magbigay ng suporta sa kanilang panawagan para sa hustisya, kasabay ng pagtiyak na hindi nag-iisa ang mga naulila.

Umaasa rin si Romualdez sa agarang paggaling at mabilis na paghilom ng mga sugatang biktima at pagkamit ng hustisya mula sa trahedya.

Nanawagan din siya sa publiko na magkaisa sa pagtulong at pagbibigay ng suporta sa mga biktima at kanilang mga pamilya.

Iginiit ni Romualdez na mahalagang mapalakas ang mga hakbang upang maiwasan ang mga katulad na trahedya sa mga paaralan at komunidad sa hinaharap. | via Geli Mendez (Patrol 30)

Pinangalanan na ang tatlong estudyanteng biktima ng pamamaril sa San Jose National High School sa Tacloban City.

Kinilala ang mga biktima na sina Joyancee “Yancee” Separa (15, grade 9 student); Ayessa Nicole Dazo (14, grade 9 student); at Chris Lorenz Fabian (15, grade 10 student).

Nabatid na kinuhanan ni Separa ang isa sa mga viral video ng insidente bago siya binaril.

Si Dazo naman ang nakuhanan ng isa pang video na karga-karga ng ilang indibidwal upang itakbo sa ospital, ngunit kalauna’y idineklarang dead-on-arrival.

Itinuturing namang bayani si Fabian matapos niyang tinangkang harangin ang pintuan ng isang classroom, dahilan upang makatakas ang kanyang mga kaklase.

Sinubukan din niyang protektahan ang kanyang mga kaklase, ngunit tinamaan siya ng bala sa likod, na kanyang ikinamatay.

Samantala, inanunsyo ng Malacañang na makatatanggap ng tig-P150,000 na financial assistance ang pamilya ng mga nasawing estudyante. — sa panulat ni Anjo Riñon

Kinumpirma ng Philippine National Police (PNP) na inalis sa puwesto ang isang pulis matapos matukoy na ang kanyang service firearm ang ginamit sa pamamaril sa San Jose National High School (SJNHS) sa Tacloban City na ikinamatay ng tatlong estudyante at ikinasugat ng 20 iba pa.

Lumabas sa imbestigasyon na ang 9mm Glock pistol na narekober mula sa isa sa mga “children in conflict with the law” (CICL) ay rehistrado sa isang Police Non-Commissioned Officer na nakatalaga sa isang support unit. Ang pulis ay inilagay na sa restrictive custody at tinanggal na rin sa kanyang puwesto.

Samantala, nasa pangangalaga naman ng Department of Social Welfare and Development ang dalawang suspek para sa tamang disposisyon habang nagpapatuloy ang imbestigasyon ng mga awtoridad sa insidente.

Pinangunahan ni Pangulong Ferdinand “Bongbong” Marcos Jr. ang paglulunsad ng Walang Gutom Kitchen ng Department of Social Welfare and Development (DSWD) sa Cebu City ngayong araw, Hunyo 22.

Kasama ng Pangulo si DSWD Secretary Rex Gatchalian sa pagbubukas ng pasilidad na magbibigay ng pagkain at serbisyo sa mga nangangailangang komunidad.

Ito ang ikalawang Walang Gutom Kitchen sa bansa matapos ang unang pasilidad na itinayo sa Pasay City noong Disyembre 2024.