RONDA PROBINSYA

Dalawa na ang kumpirmadong nasawi sa magkahiwalay na insidente ng pagkalunod sa Bukidnon matapos ang malawakang pagbaha dulot ng habagat na dala ng Bagyong Inday.

Kabilang sa mga biktima ang isang sitenta-anyos na magsasaka sa Quezon at isang singkwenta-anyos na residente ng Malaybalay City na kapwa tinangay ng rumaragasang baha.

Ayon sa Malaybalay City Disaster Risk Reduction and Management Office, halos isang libong residente ang inilikas na pansamantalang nanunuluyan sa evacuation center sa Basakan District.

Bukod dito, nagdulot din ng pagguho ng lupa ang walang tigil na pag-ulan sa Barangay Miglamin, dahilan ng suspensyon ng mga klase sa lahat ng antas sa Malaybalay City, Valencia City, at Cabanglasan, bilang pag-iingat sa mga mag-aaral at guro.

Patuloy namang binabantayan ng mga otoridad ang mga ilog, mabababang lugar, at mga komunidad na posibleng maapektuhan ng pagbaha at landslide.

Pinapayuhan din ang publiko na maging alerto at sumunod sa mga abiso ng lokal na pamahalaan upang maiwasan ang karagdagang insidente. | Sa panulat ni Reabelle Medina

Nailigtas sa nakaambang panganib ang tatlong mangingisda matapos masiraan ng bangka habang nasa karagatan ng Tayabas Bay sa bayan ng Agdangan, Quezon nitong Huwebes.

Ayon sa ulat, bandang alas 2:17 ng hapon nang agad na rumesponde ang mga otoridad sa insidente at matagumpay na nasagip ang mga mangingisdang kinilalang sina Ernesto Perida, Rolando Federal, at John Rey Zoleta.

Batay sa impormasyon ng Municipal Disaster Risk Reduction and Management Office (MDRRMO), nasiraan ng makina ang kanilang bangka habang naglalayag mula sa Barangay Dalahican sa Lucena City, dahilan upang hindi na nila maipagpatuloy ang paglalayag at mangailangan ng agarang tulong.

Samantala, muling pinaalalahanan ng mga awtoridad ang mga mangingisda at iba pang maliliit na sasakyang pandagat na pansamantalang iwasan ang paglalayag habang nananatili ang banta ng masamang panahon dulot ng Bagyong Inday upang maiwasan ang kaparehong insidente at mapangalagaan ang kanilang kaligtasan.  | via Ron Lozano / DWIZ Correspondent – Southern Tagalog

Kanselado ang ilang biyahe ng mga barko sa iba’t ibang bahagi ng bansa, bunsod ng epekto ng Super Typhoon Inday.

Kabilang sa mga apektado ang ilang ruta ng 2GO sa Batangas, Super Shuttle Ferry sa rutang Bohol-Camiguin, gayundin ang mga barko ng San Isidro Shipping Lines, Montenegro Shipping Lines, at VS Grand Ferries sa Eastern Visayas.

Suspendido rin ang mga biyahe sa ilang pantalan sa Masbate, Mindoro, Palawan, Panay, Guimaras, Surigao, Zamboanga, at Zamboanga del Norte.

Kaugnay nito, pinaalalahanan ng PCG ang mga mangingisda, tripulante, at mga biyahero na sumunod sa ipinatutupad na kanselasyon ng mga biyahe at umiwas sa paglalayag habang umiiral ang banta ng masamang panahon upang matiyak ang kanilang kaligtasan.

Samantala, sinabi ni PCG Acting Spokesperson Commander Michael John Encina na muling ipinatutupad ng ahensya ang Intensified Community Assistance, Awareness, Response, and Enforcement o I-CARE Campaign.

Layunin ng hakbang na ito ang maagang paglikas ng mga residenteng nasa high-risk coastal areas, paglalabas ng mga sea travel advisory, pagbabantay sa mga pantalan, at paghahanda ng mga response team para sa agarang pagtugon sa anumang emergency. | Sa panulat ni Reabelle Medina

Dalawang high school student ang sugatan sa pananaksak matapos silang umano’y atakihin ng isang grupo ng kabataan sa Diamond Village, Damosa, Davao City.

Ayon sa Davao City Police Office, nangyari ang insidente habang pauwi ang mga biktima. Tatlong saksak sa likod ang tinamo ng isang estudyante, habang isang saksak naman ang natamo ng isa pa.

Nadakip ng mga pulis ang anim na menor de edad matapos tukuyin ng mga biktima ang pangunahing suspek na nakilalang “Justine.” Isinuko rin umano ng suspek ang isang Swiss knife na pinaniniwalaang ginamit sa pananaksak.

Nilinaw naman ng pamunuan ng Emilio Ramos National High School na hindi estudyante ng kanilang paaralan ang mga suspek at patuloy silang nakikipag-ugnayan sa mga awtoridad sa imbestigasyon.

Nasawi ang isang 16-anyos na binatilyo matapos tamaan ng kidlat sa Barangay Daanlungsod, Tuburan, Cebu nitong Huwebes ng hapon.

Ayon sa Tuburan Police Station, nasa baybayin ang nasawing biktima kasama ang kaniyang 14-anyos na kaibigan nang mangyari ang insidente habang kumakain sila.

Parehong isinugod sa ospital ang dalawang menor de edad, ngunit idineklara nang dead on arrival ang 16-anyos habang ligtas ang kaniyang 14-anyos na kasama.

Patuloy ang imbestigasyon sa insidente ng pulisya at nagpaalala sa publiko na laging i-monitor ang lagay ng panahon at maging maingat lalo na kung pupunta sa mga tabing-dagat.

Sugatan ang dalawang mag-aaral matapos saksakin ng isang Grade 11 student sa loob ng Cabaluay National High School sa Barangay Cabaluay, Zamboanga City nitong Miyerkoles ng umaga, Hulyo 1.

Batay sa paunang imbestigasyon ng pulisya, nag-ugat ang insidente sa umano’y pambubugbog ng dalawang biktima sa mas maliit na suspek sa loob ng silid-aralan, ayon kay Maj. Chester Natividad, hepe ng Criminal Investigation Division Management–Special Investigation Unit ng Zamboanga City Police Office.

Lumalabas sa imbestigasyon na kumuha ang suspek ng maliit na kutsilyo na binalot pa umano sa papel, bago isinagawa ang pananaksak sa dalawang kaklase.

Agad na isinugod sa ospital ang mga biktima para sa agarang lunas, habang dinala naman sa guidance office ng paaralan ang suspek.

Ayon sa pulisya at mga opisyal ng barangay, dati nang nakararanas ng pambu-bully at peer pressure ang suspek mula sa mga naturang mag-aaral. Lumutang din sa hiwalay na ulat ang alegasyong pinipilit umano siyang gumamit ng marijuana.

Patuloy na iniimbestigahan ng mga awtoridad ang posibleng paglabag sa batas ukol sa ilegal na droga, gayundin kung paano nakapasok sa paaralan ang ginamit na patalim. Nanatiling hindi inilalabas ang pagkakakilanlan ng mga menor de edad na sangkot.

Samantala, tiniyak ng Department of Education (DepEd) na mino-monitor nito ang sitwasyon sa pamamagitan ng Schools Division Office ng Zamboanga City at nakikipag-ugnayan sa pamunuan ng paaralan para sa agarang intervention at pagbibigay ng suporta sa mga apektadong mag-aaral at sa komunidad ng paaralan.

Muling umapela ang DepEd sa publiko na hintayin ang pinal na resulta ng imbestigasyon at iwasan ang pagkalat ng hindi beripikadong impormasyon.

Isang Grade 11 student ang umano’y nanaksak sa dalawa niyang kaklase sa loob ng isang pampublikong high school sa Zamboanga City nitong Miyerkoles, Hulyo 1.

Ayon kay Barangay Cabaluay Chairperson Lester Siason, naganap ang insidente sa loob ng isang silid-aralan matapos ang komprontasyon ng tatlong estudyante.

Agad na rumesponde ang mga opisyal ng barangay at mga tauhan ng Bureau of Fire Protection (BFP). Nabigyan ng paunang lunas ang dalawang nasugatan bago isinugod sa ospital.

Batay sa paunang imbestigasyon, umano’y matagal nang nakararanas ng pambu-bully at peer pressure ang suspek. Inakusahan din niya ang dalawang biktima na pinipilit siyang gumamit ng marijuana.

Dahil dito, umano’y nagdala siya ng patalim sa paaralan at ginamit ito nang muli raw siyang pilitin ng mga biktima.

Patuloy ang imbestigasyon ng pulisya kaugnay sa insidente.

Walang pasok “until further notice” simula ngayong Lunes ang Batangas City Integrated HS o yung dating Banahis na nakatayo sa Rizal Street Batangas City.

Agad rin itong kinumpirma ng DepEd Batangas City.

Bunsod ang naturang suspensyon ng mga kumalat na impormasyon na umano’y may banta ng pamamaril sa loob ng naturang eskwelahan BATAY urgent bulletin na inisyu ng kanilang Disaster Risk Reduction and Management pasado alas nuwebe ng gabi ng Linggo.

Layunin ng hakbang na tiyakin ang kaligtasan ng mga estudyante, guro, mga non-teaching staff at mga magulang

Patuloy naman ang ugnayan ng paaralan sa mga otoridad kaugnay ng pangyayari kasabay ng panawagan sa publiko na iwasang magpakalat ng mga di beripikadong impormasyon.

Una riyan ay sunud-sunod ang mga insidente ng umano’y “copycat threats” sa mga eskwelahan matapos ang malagim na pamamaril sa San Jose NHS ng Tacloban City. Ulat ni Ron Lozano / DWIZ Correpondent