RONDA PROBINSYA

Umaasa si Cavite Gov. Jonvic Remulla na maipagpatuloy pa rin ng pamahalaan na gamitin ang Sangley Airport sa Cavite para gawing international airport.

Ito’y upang mabigyang solusyon na ang matagal nang problema ng siksikan ng pasahero gayundin ng mga eroplano sa Ninoy Aquino International Airport (NAIA).

Magugunitang sumailalim sa matinding rehabilitasyon ang Sangley Airport nuong 2018 at target na magamit ito bilang international gateway sa 2030.

Pero binawi ng pamahalaang panlalawigan ng Cavite ang kasunduan sa joint venture Micro-Asia at ng China Communication Corporation.

Sa kasalukuyan, operational na ang Sangley Airport pero para lamang ito sa general aviation o para sa mga maliliit na eroplano.

Mayruong 160 passenger capacity terminal building ang bagong Sangley Airport, may dalawang hangar at isang malapad na runway sakaling maging functional na bilang international airport.

Natunton na ng Department of Health (DOH) ang 368 indibidwal na nakasalamuha ng mga nagpositibo sa bagong variant ng COVID-19 sa Bontoc, Mountain Province at Cordillera Administrative Region (CAR).

Sa nasabing bilang, ayon kay Health Undersecretary Maria Rosario Vergeire, naisalang na sa polymerase chain reaction (PCR ) tests ang 233 sa mga ito.

Limampu’t pito (57) dito ang nagpositibo, 135 ang negatibo, habang hinihintay naman ang resulta sa sample ng 41 iba pa.

Sinabi ni Vergeire na inabot ng tatlong araw ang “contact tracing” na ginawa nila kung saan nasa 2,000 indibidwal ang isinalang sa test sa Sagada at Bontoc.

Laglag sa kamay ng mga operatiba ng Philippine National Police – Anti Kidnapping Group (PNP – AKG) ang 1 kapitan ng barangay sa isinagawang operasyon sa bayan ng Sumisip, lalawigan ng Basilan kahapon ng umaga.

Kinilala ni PNP-AKG Director P/BGen. Jonnel Estomo ang suspek na si Jamiron Ajijon alyas Jamiron Amigos, kasalukuyang kapitan ng Brgy. Marang.

Naaresto si Ajijon ng pinagsanib na puwersa ng PNP-AKG, PNP-SAF gayundin ng lokal na pulisya sa mismong barangay hall sa bisa ng warrant of arrest dahil sa kasong murder .

Si Ajijon Ay tinuturo ring leader umano ng city hunter group, isang gun for hire group na nag-o-operate sa Basilan at sinasabing malapit din kay Abu Sayyaf sub-leader Furuji Indama .

Maliban kay Ajijon, naaresto rin sa operasyon ang tanod nito na kinilalang si Bassel Ajijon Eting dahil sa pagbibitbit ng mataas na kalibre ng mga armas .

Nabatid na nasangkot din si ajijon sa pagdukot o kidnapping sa ilang indibiduwal sa lugar at pag -iingat ng samu’t saring armas na siyang nakuha mula sa kaniya .

Kasalukuyan nang nasa Camp Heneral Batalla sa Zamboanga ang mga suspek at isinailalim ang mga ito sa proper booking at desposition. — ulat mula kay Jaymark Dagala (Patrol 9)

Ikinababahala ng OCTA Research Group ang patuloy na pagtaas ng hawaan ng COVID-19 sa lalawigan ng cebu kabilang ang Cebu City.

Ayon sa OCTA Research Group, tumaas sa 1.7 ang reproduction number ng coronavirus sa Cebu province sa nakalipas na linggo.

Mas mataas pa anila ito sa reproduction number sa buong bansa na umaabot sa  .96.

Batay rin sa pinakahuling report ng OCTA Research Group, pumapalo sa 147 ang average ng naitatalang bagong kaso ng COVID-19 sa probinsiya ng cebu kada araw, sa nakalipas na linggo.

Animnapu’t pitong (67) porsyentong mataas ito sa naitalang mga bagong kaso sa mga naunang linggo.

Maliban pa rito, umabot rin sa 6% ang positivity rate sa Cebu City, sa mga nakalipas na linggo.

Malaki ang posibilidad na isailalim muli sa mas mahigpit na general community quarantine (GCQ) ang Cordillera Administrative Region at Davao Region sa susunod na buwan.

Ito ang inihayag ni Presidential Spokesperson Harry Roque, kasunod ng pagtaas sa 60% ng COVID-19 bed utilization rates sa car at 54%  naman sa Davao Region.

Ayon kay Roque, isinasapinal na ng Inter-Agency Task Force For the Management on Emerging Infectious Diseases (IATF) ang kanilang isusumiteng rekomendasyon kay Pangulong Rodrigo Duterte.

Ani Roque, pagpapasiyahan naman ito ng pangulo kung kanya itong aaprubahan bagong matapos ang kasalukuyang buwan.

Magugunitang una nang sinabi ni Baguio City Mayor Benjamin Magalong na nakatakdang ibalik sa GCQ ang Cordillera Region simula Pebrero 1.

Kasunod ito ng pagkakatala sa 12 kaso ng UK variant ng COVID-19 sa Bontoc, Mountain Province.