RONDA PROBINSYA

Nasabat ng mga awtoridad ang nasa P2.7-milyong halaga ng shabu sa Angeles City sa Pampanga.

Sa inilabas na pahayag ni Philippine National Police (PNP) Chief, Police General Debold Sinas, nahuli ang suspek na si Arnel Gonzales sa kanilang operasyon sa Barangay Pandan sa naturang probinsya.

Kinilala si Gonzales na bahagi sa tala ng mga personalidad na sangkot sa illegal drug trade sa Mabalacat at sa Angeles City.

Narekober kay Gonzales ang 400-gramo ng ilegal na droga at ilang drug paraphernalia maging ang isang pulang kotse na may plakang TLE-296.

Sa ngayon, nasa kustodiya na ng Mabalacat City Police Station si Gonazales at nahaharap sa kasong  paglabag sa R.A. 9165 o comprehensive dangerous drugs act of 2002.

Tinanggal na ng Bureau of Fisheries and Aquatic Resources (BFAR) ang tatlong buwang closed fishing season sa round scad o galunggong sa northeastern Palawan simula ika-31 ng Enero.

Batay sa ulat ng National Stock Assessment Program ng region 4B, tumaas ang nakukuhang galunggong sa pamamagitan ng ring net sa 653.66 metric tons sa taong 2019.

Mula naman sa 170.07 metric tons, tumaas ang nahuhuling galunggong sa pamamagitan ng ring net sa 285.32 metric tons sa kaparehong taon.

Itinuturing naman itong welcome development ni BFAR National Director Eduardo Gongona para matiyak ang suplay ng galunggong.

Patay ang isang sub leader ng Abu Sayyaf Group (ASG) sa Zamboanga City.

Nabatid na pinasok ng mga otoridad ang safehouse ng nasabing ASG sub leader, alas-3 ng madaling araw at makipagbarilan si Arrasid Adjing Halissam, alyas “Guru Ara” sa mga pulis na magsisilbi sa kanya ng warrant of arrest para sa kasong illegal possession of firearms and explosives.

Ayon kay Philippine National Police (PNP) Chief Debold Sinas, si Halissam na miyembro ng Dawlah Islamiyah ay kabilang sa planong paghahasik ng lagim sa Zamboanga Peninsula, Basilan, Sulu at Tawi-Tawi.

Sinabi ni Sinas na nang mapatay si Hapilon sa Marawi City noong 2017, lumipat si Halissam sa napatay na ring ASG leader Hatid Hajan Sawadjaan.

Kasama si Halissam sa mga insidente ng pagdukot at pamumugot simula noong 2009 hanggang 2012, gayundin sa mga insidente ng pambobomba kabilang ang Jolo Cathedral bombing noong 2019 at ang pinakahuli ay ang twin suicide bombing sa Jolo din noong nakalipas na Agosto.

Pinasinungalingan ng Department of Health (DOH) – Region 7 na nakararanas na ng second wave ng coronavirus disease 2019 (COVID-19) ang Cebu City.

Ayon sa tagapagsalita ng DOH-Region 7 na si Dr. Mary Jean Loreche, sa ngayon ay hindi pa nito itinuturing na nasa second wave na ang lunsod sa kabila ng pagsipa ng kaso ng virus dito.

Paliwanag pa ni Dr. Loreche, papaanong magkakaroon ng second wave sa lungsod, hindi pa nga anito umaabot sa 25% ang okupadong bed allocation sa mga ospital sa lungsod.

Nauna rito, inihayag ng OCTA Research Group na kabilang ang Cebu City sa ‘serious concern’ dahil sa pagtaas ng kaso ng virus sa kanilang lugar.

Sa kabila nito, ani Dr. Loreche, kanyang nirerespeto ang pag-aaral o pagtataya ng naturang research group.

Isinara muna ng Ilocos Sur Provincial Government ang border nito sa Mountain Province, para hindi makapasok ang UK variant ng coronavirus na una nang na-detect sa munisipalidad ng Bontoc.

Nagpalabas na ng executive si Ilocos Sur Governor Ryan Singson para sa pagsasara pansamantala ng mga borders sa mga barangay ng Aluling at Commilas sa munisipalidad ng Cervantes.

Dahil dito, hindi papapasukin sa Ilocos Sur ang mga tao at sasakyan na magmumula sa Mountain Province, sa mga checkpoint na itinayo ng mga otoridad.

Kinumpirma noong isang linggo ng Department of Health (DOH) ang local transmission ng UK variant sa munisipalidad ng Bontoc.