RONDA PROBINSYA

Binabalangkas na ng Sanguniang Bayan ng Malay Aklan ang isang batas na naglalayong patawan ng permanent ban ang mga turistang gumagamit ng pekeng COVID-19 RT-PCR test result upang makapasok ng Boracay island.

Ayon kay Malay acting Mayor Floribar Bautista, sinimulan na ng kanilang sanguniang bayan ang deliberasyon sa naturang panukala noong Huwebes.

Ani Bautista, siya mismo ang humiling sa kanilang sanguniang bayan na ipasa ang naturang lokal na ordinansa.

Ito ay bunsod na rin aniya ng nadaragdagang bilang ng mga turistang nahuhuling gumagamit ng pekeng RT-PCR test result.

Batay sa pinakahuling tala ng Aklan Provincial Government, nasa tatlumpung mga turista na ang nahuling gumamit ng pekeng COVID-19 test results.

Habang mahigit 100 turista naman ang nadakip dahil sa paglabas sa safety and health protocols tulad ng hindi pagsusuot ng face mask.

Ipinakalat ng Philippine National Police (PNP) ang nasa 260 na miyembro ng Special Action Force (SAF) sa Eastern Visayas.

 Ito’y ayon kay PNP Chief P/Gen. Debold Sinas ay para sa pinaigting na anti-insurgency campaign ng pamahalaan sa ilalim ng National Task Force to End Local Communist Armed Conflict (ECLAC)

 Ayon sa PNP chief, ang mahigit 260 SAF commandos na kanilang ipinakalat ay ang mga bagong nagsipagtapos sa anim na buwang pagsasanay mula sa Calbayog City sa Samar.

 Una rito, pinangunahan ni Sinas ang graduation rites ng mga nabanggit na bagong SAF commandos upang magbigay ng tactical support sa lokal na pulisya lalo na sa mga operasyon nito kontra krimen.

Isang kilabot na opisyal ng New People’s Army (NPA) ang patay habang isang sundalo naman ang sugatan matapos ang nangyaring bakbakan sa Buenavista, Quezon kahapon ng umaga.

Kinilala ng army’s 2nd infantry division ang nasawing NPA na si Ronnel Batarlo alyas Marwin na siyang itinuturong nasa likod ng pagpatay sa mga pulis sa Brgy. San Juan sa bayan ng San Narciso nuong isang taon.

Ayon kay 2nd I.D. Spokesperson Capt. Jayrald Ternio, nangyari ang bakbakan alas kuwatro ng umaga kahapon sa Sitio Pung-Uy, Barangay Masaya sa nabanggit na bayan.

Nakuha ng mga sundalo sa pinangyarihan ng engkuwentro ang isang M-16 rifle at M-203 granade launcher na nagmula sa panig ng mga kalaban.

Bagama’t hindi pinangalanan, tiniyak ni 2nd I.D Commander M/Gen. Greg Almerol na ligtas at nagpapagaling na lang sa ospital ang nasugatang sundalo.

Kasunod nito, nagpakalat ng checkpoint ang mga tropa ng militar at pulisya sa lugar upang maharang ang mga posibleng kasamahan ng napatay na NPA leader.

Kumpiyansa ang Department of Health (DOH)  na maipatutupad pa rin ang mahigpit na COVID-19 quarantine protocols sa Baguio City.

Ang pahayag ay ginawa ni Health Undersecretary Rosario Vergeire matapos payagan ng Inter-Agency Task Force (IATF) ang pagbubukas ng mga hotel sa lungsod para sa mga turista at leisure travelers.

Gayunman, ipinaliwanag ni Vergeire na ang protocols na ipatutupad ay depende pa rin sa risk classification ng lugar at ibabase sa regulasyon ng Department of Tourism (DOT).

Matatandaang nakatanggap ng kaliwa’t kanang batikos si Mayor Benjamin Magalong matapos dumalo sa birthday party ng isang celebrity at humalo pa sa crowd nang walang suot na facemask.

Kinumpirma ng Department of Agriculture (DA) na napasok na rin ng African swine fever (ASF) ang tatlo pang bayan sa lalawigan ng Leyte.

Sa isang virtual press briefing, binanggit ni DA Regional Executive Director Angel Enriquez na kabilang sa mga apektado ay ang mga munisipalidad ng Tanauan, Palo, at MacArthur.

Una nang iniulat na halos 2,000 baboy ang tinamaan ng ASF sa mga bayan ng Abuyog, La Paz, Javier, at Dulag.