RONDA PROBINSYA

Patay ang isang umano’y hitman ng New People’s Army (NPA), matapos manlaban sa mga pulis sa Brgy. Palacian San Agustin, Isabela kahapon.

Ayon kay Isabela Police director Colonel James Cipriano, kinilala ang hitman na si Renato Busania.

Nagtamo ng mga tama ng bala sa katawan si Busania nang salubungin niya ng putok ang mga pulis na may hawak na warrant of arrest na ipinalabas ni RTC Judge Bonifacio Ong noon pang 2007 sa kasong double murder.

Isinugod pa sa ospital si Busania pero idineklara siyang dead on arrival.

Samantala, tinukoy na bergudo ni Isabela Bayan Muna Secretary General Elena Mendiola si Busania. —sa panulat ni John Jude Alabado

Nakatitiyak ang militar na Bangsamoro Islamic Freedom Fighters (BIFF) ang nasa likod ng pagsabog sa bahagi ng national highway ng South Upi, Maguindanao na ikinasawi ng isa katao.

Ayon kay Joint Task Force Central Command Major General Juvymax Uy, nagtugma ang nakuha nilang improvised explosive device (IED) na hindi sumabog  sa lugar ng insidente sa signature bomb ng BIFF.

Ani uy, kanila ring nabatid na target sana ng pagpapasabog ang alkalde ng South Upi na si Mayor Reynalbert Insular na nakatakda sanang dumaan sa lugar nguni’t hindi natuloy.

Dahil dito, dalawang lalaking magka-angkas sa motorsiklo ang napuruhan sa insidente kung saan isa sa mga ito ang nasawi habang sugatan naman ang isa pa.

Batay sa ulat ng 57^th Infantry “Masikap” Battalion ng Philippine Army at South Upi Municipal Police Station, nangyari ang pagpapasabog malapit sa isang telecommunications company sa timanan public market sa Barangay Romongaob.

Patay ang isang fixer sa Biñan, Laguna matapos pagbabarilin nitong Martes.

Ayon sa ulat, kinilala ang biktima na si Nestor Areza, malapitang binaril ito  sa isang convenience store sa lungsod.

Naisugod pa ang biktima sa ospital ngunit ididineklara itong dead on arrival.

Sa ngayon, inaalam pa ng awtoridad ang motibo sa krimen at pagkakakilanlan ng mga salarin. —sa panulat ni John Jude Alabado

Kinumpira ng Philippine National Police (PNP) na nagkaroon ng pagsabog sa loob ng Police Regional Office 5 sa Camp Simeon Ola, Legazpi City sa Albay.

Ayon kay PNP Spokesman P/BGen. Ildebrandi Usana, nangyari iyon dakong pasado ala siete kagabi sa harap ng tanggapan ng Civil Military Operations na nasa loob din ng Kampo.

Batay aniya sa impormasyon mula PRO 5, sa isang kotseng nakaparada sa lang kampo nagmula ang pagsabog.

Inalis ng pulisya ang posibilidad na Improvised Explosive Device (IED) ang sanhi ng pagsabog sa halip, tinitingnan ang anggulong problema sa electrical wiring ng sasakyan.

Gayunman ani Usana, nagpapatuloy pa rin ang ginagawang imbestigasyon sa insidente at wala namang ibang nadamay na iba pang sasakyan sa insidente. —ulat mula kay Jaymark Dagala (Patrol 9)

Isinailalim na sa lockdown ang limang barangay sa Bontoc, Mountain Province.

Ayon kay Mayor Franklin Odsey, pinaiiral na rin ang mahigpit na quarantine protocols sa mga barangay ng Tocucan, Bontoc Ili, Caluttit, Poblacion, at Samoki dahil sa banta ng panibagong variant ng COVID-19.

Aniya, nasa 6,000 mga residente ang apektado ng naturang lockdown.

Samantala, sa magkahiwalay namang executive order ay pinalawig pa ng alkalde ang “enhanced community quarantine-like” lockdown sa Bontoc IlI, Caluttit, at Poblacion mula ika-25 ng Enero hanggang sa katapusan ng buwan.

Patay ang isang dating vice mayor ng Masantol, Pampanga at maging ang isa pang kasamahan nito matapos pagbabarilin ng hindi pa nakikilalang mga salarin sa Angeles City.

Kinilala ang mga nasawi na sina Jorge Bustos III at Erick Cariaga na dating bise-alkalde ng Masantol.

Kuwento ng guwardiyang si John Maverick Cunanan, nakarinig siya ng dalawang magkasunod na putok ng baril at nakita na lang niya ang dalawa na duguan at wala nang buhay.

Inaalam pa ang motibo at pagkakakilanlan ng mga salarin habang nire-review din ng pulisya ang mga kuha ng CCTV upang makatulong sa kanilang imbestigasyon.

Planong isailalim sa general community quarantine (GCQ) ang Cordillera Administrative Region (CAR) sa susunod na buwan.

Ayon sa Department of Health-CAR, ito’y upang mapigilan ang pagkalat ng coronavirus sa rehiyon na kasalukuyang nasa modified GCQ.

Sinabi ni DOH-CAR regional director Dr. Ruby Constantino na nagpositibo sa UK variant ang labintatlo sa 326 specimen samples na isinumite nila sa Philippine Genome Center.

Paliwanag ni Constantino, balak nilang ituloy ang plano kapag naayos na ang sapat na bilang ng COVID-19 health facilities sa kanilang lugar.

Matatandaang ibinunyag ni DOH Secretary Francisco Duque III na nadiskubre ang labindalawang UK variant samples sa Mountain Province habang isa naman sa La Trinidad, Benguet.