RONDA PROBINSYA

Kasama umano ang anak ni dating Marawi City Mayor Fahad “Pre” Salic sa apat na nanloob sa isang jewelry store sa lungsod kamakailan.

Ayon kay S/Sgt. Amador Rosales, imbestigador ng Marawi PNP, si Mahid Salic ay itinuro ng store owner na sa Noaim Mohammad Macaraya na siyang nagtutok ng baril sa kanya habang binabasag ng tatlo pang suspek ang mga estante.

Sa imbestigasyon, pinasok ng mga armadong lalaki ang Layl-Haya jewelry shop sa Barangay Sugod at tinangay ang mahigit dalawang milyong pisong halaga ng mga alahas.

Natagpuan naman ang getaway vehicle sa isang residential compound na sinasabing pag-aari ng magulang ng misis ni Mahid.

Sinampahan na ng kasong robbery si Mahid at tatlo pang kasabwat ng suspek.

Nasungkit ng nag-iisang bettor mula Dasmariñas, Cavite ang  P20 milyong na jackpot price sa lotto.

Ayon kay Philippine Charity Sweepstakes Office (PCSO) general manager Royina Garma, natumbok ng hindi pinangalanang mananaya ang six-digit winning combination na 05-02-12-26-28-04 sa regular Lotto 6/42 draw.

Limampu’t anim (56) pang bettors ang nakahula ng lima sa anim na kumbinasyon kaya’t makakatanggap ang mga ito ng 24,000 pesos bawat isa.

Ang Lotto 6/42 draw ay binobola tuwing Martes, Huwebes, at Sabado.

Isasailalim sa lockdown ang barangay Guadalupe sa Cebu City tuwing araw ng linggo simula ngayong araw, ika-24 ng Enero.

Batay sa hiwalay na resolusyon ng barangay Guadalupe, ipinatutupad ang isang araw na lockdown dahil pa rin sa banta ng COVID-19.

Dahil dito, hindi papayagang lumabas ng kanilang bahay ang mga residente ng barangay, maliban na lamang kung may emergency o mahalagang gagawin.

Hindi naman sakop nito ang mga health workers at Authorized Persons Outside Residence (APOR).

Ipinag-utos din ang pagsasara ng lahat ng mga negosyo at establisyimento tuwing linggo maliban sa mga botika.

Habang mananatili namang available ang mga pampublikong transportasyon.

Nasamsam ng mga operatiba ng Philippine National Police o PNP-maritime group ang aabot sa P3-M halaga ng smuggled cigarettes sa Bongao, Tawi-Tawi.

Ayon sa PNP, kinailangan pang gumamit ng bangka ang mga operatiba para makuha ang container van na nasa dalampasigan ng Bongao na mula umano sa Malaysia.

Pahayag ng PNP maritime group, nakatanggap sila ng impormasyon na may apat na container na naglalaman ng mga sigarilyo na galing sa Malaysia ang nakatakdang dumating sa Jolo.

Hinala ng pulisya, na lumubog ang vessel na pinagsakyan ng mga container dahil sa sama ng panahon.

Sinabi ni PNP Maritime Group Police Lieutenant Col. Gaylord Tamayo, na tatlong container ang kanilang narekober kung saan dalawa dito ang wala nang laman, habang ang isa naman ay naglalaman lamang ng half container ng mga basa at hindi na mapapakinabangang smuggled cigarettes.

Nabatid na dadalhin sana ang mga iligal na sigarilyo sa Zamboanga, Basilan, Sulu at Tawi-Tawi.

Ipinamahagi ng Department of Agrarian Reform (DAR) ang aabot sa 9.7 ektaryang lupang sakahan sa walong magsasaka sa Coron sa Palawan.

Ayon kay DAR Secretary John Castriciones, ang naturang pamamahagi ng lupa ay nasa ilalim ng ‘serbisyong DAR-to-door program’ ng ahensya.

Sa naturang programa, mismong si Castriciones ang maghahatid ng land titles sa mismong benipisyaryong magsasaka.

Paliwanag ni Castriciones, sa ganitong pamamaraan, nailalapit ng pamahalaan ang mga serbisyo para sa magsasaka para iparamdam anito na nasa kanilang panig ang administrasyon.