Ipinasilip na ng Philippine Movie Press Club ang partial list ng mga nagwagi sa gaganaping ika-17 PMPC Star Awards for Music sa Hunyo 25.
Kabilang sa mga paparangalan ang kantang “Salamin, Salamin” ng p-pop girl group na BINI bilang Dance Recording of the Year; “Rainbow Christmas” ni Vice Ganda bilang Christmas Song of the Year; at si Juan Karlos Labajo bilang Male Acoustic Artist of the Year.
Paparangalan din ang bandang Spongecola bilang Rock Artist of the Year; at si Kris Lawrence bilang male r&b artist of the year.
Kabilang din ang kantang “Palagi” ng mag-asawang TJ Monterde at Kz Tandingan; at ang cover ni Khel Pangilinan ng kantang “Ipagpatawad Mo” sa mga paparangalan ng PMPC ngayong taon.
Pinarangalan din bilang Inspirational Song of the Year ang himnong “Ningas ng Pag-asa” ni Jamie Rivera, na tagalog version ng opisyal na Himno ng Simbahang Katolika para sa 2025 Jubilee Year nito.
Pinakilala na rin sina Jayda Avanzado, Dylan Menor, Jarren Garcia, at Marthena Jickain bilang mga host ng naturang gabi ng parangal.
Ilan naman sa mga magtatanghal sa nasabing event sina Sam Concepcion, Moira Dela Torre, at ang rap group na salbakuta. — sa panulat ni Anjo Riñon
