Ipinagbabawal muna ng lokal na pamahalaan ng Batangas ang pamamasyal sa lahat ng resort at hotel sa lalawigan.
Ito ang inanunsyo ng lokal na pamahalaan dahil sa tumataas na bilang ng kaso ng COVID-19.
Ang naturang hakbang umano ay para maiwasan ang pagdagsa ng mga turista mula sa iba’t-ibang lugar na posibleng magpataas ng tyansa ng pagkalat ng COVID-19 sa lungsod.
Epektibo kahapon, March 18 ang naturang polisiya.
Tinutulan ng League of Provinces of the Philippines (LPP) ang atas ng Department of Health (DOH) na ibalik sa Metro Manila ang ipinamahagi nang COVID-19 vaccines sa mga probinsya.
Ayon kay Marinduque Gov. Presbitero Velasco Jr., pangulo ng LPP, limitado lamang ang suplay ng COVID-19 vaccine sa mga probinsya dahil hindi naman marami ang ipinamahagi ng pamahalaan.
Isa pa aniyang problemang kaniyang nakikita rito ay ang logistics kung saan posibleng masira ang mga bakuna dahil sa pagbyahe muli nito pataungong Metro Manila.
Una rito sinabi ni Health Undersecretary Leopoldo Vega, na ang mga magbabalik ng bakuna ay iyong nasa malapit lang sa Metro Manila.
Aabot sa 1,000 pamilya ang nawalan ng bahay matapos sumiklab ang sunog sa barangay Samala-Marquez sa Kawit, Cavite kaninang madaling araw.
Ayon sa Cavite BFP Provincial Dir. Fire Supt. Rene Bullos, umabot sa task force alpha ang alarma dahil sa mabilis na pagkalat ng apoy sa mga bahay.
Posible kasi aniyang dahil ito sa malakas na hangin at mahina rin umano ang suplay ng tubig sa lugar dahilan para mahirapang maapula agad ang apoy.
Alas kwatro y media ng umaga nang ideklara nang fire out habang patuloy na iniimbestigahan ang pinagmulan ng sunog.
Patuloy na nakapagtatala ng mga pagyanig sa paligid ng Bulkang Taal ang PHIVOLCS.
Sa nakalipas na magdamag, nasa 164 volcanic earthquakes at 67 tremors ang naitala sa bulkan.
Ayon sa Taal bulletin, tumatagal ang mga aktibidad ng bulkan ng isa hanggang dalawang minuto mula sa tatlong hybrid events.
Na-obserbahan din ang pagbuga ng steam-laden plumes ng bulkan na umaabot sa 20 meters ang taas.
Patuloy naman ang paalala ng PHIVOLCS na ikinokonsiderang permanent danger zone ang Taal Volcano Island kung saan, nangangahulugang walang sinuman ang pinahhintulutang pumasok sa lugar.
Maayos at payapa ang naganap na plebisito sa Palawan.
Ayon kay PNP OIC Police Lt. General Guillermo Eleazar, walang naitalang anumang untoward incident sa pagdaraos ng plebisito kung saan 1,000 pulis ang itinalaga para magbigay ng seguridad sa mga botante at election officials sa halos 500 polling centers.
Gayunman ipinabatid ni Eleazar na naging hamon ang transportasyon at maging panahon sa pag-deliver ng election materials sa mga polling centers samantalang maliit na problema naman ang paglalabas ng impormasyon dahil sa mahinang internet signal at masamang lagay din ng panahon.
Pinakamalaking hamon aniya sa kanila na matiyak na sumusunod ang mga tao sa health and safety protocols sa mga pagtitipon.
Magpapatupad ng isang buwang curfew at liquor ban ang lalawigan ng Bulacan dahil sa pagsirit ng kaso ng coronavirus disease 2019 (COVID-19).
Nakasaad sa direktiba ni Bulacan Governor Daniel Fernando ang pagsisimula ng curfew alas-11 mamayang gabi hanggang alas-4 ng madaling araw at magtatapos ito sa ika-17 ng Abril.
Tanging ang mga may emergency lamang at mga empleyadong may dokumento ang papayagang makadaan sa lalawigan sa curfew hours.
Bawal din hanggang ika-17 ng Abril ang pagbebenta, pagbili at pag-inom ng alak sa mga pampubliko at pampribadong lugar.
Ipinag-utos din ni Fernando ang pagbabalik ng border quarantine checkpoints para tuluyang mabantayan ang sitwasyon kontra virus.
Nanaig ang botong ‘no’ sa ginawang plebesito sa Palawan na layong hatiin ang probinsya sa tatlo.
Ayon kay Comelec Spokesperson James Jimenez sa bilang ng Board of Canvassers (BOC) lumabas na 172,304 na mga taga-Palawan ang bumotong ‘no’, habang 122,223 naman ang bumotong ‘yes’ o pabor sa paghahati sa kanilang probinsya.
Bagamat may isa pang munisipalidad ang hindi pa nabibilang ang resulta ng ginawang plebisito, giniit ni Jimenez, na malinaw ang boses ng mga taga-Palawan na hindi pabor ang mga ito na hatiin sa tatlo ang kanilang probinsya.
Mababatid na sa naturang plebisito, pinapili ang mga botante ng ‘yes’ o kaya’y ‘no’ sa paghahati ng palawan sa tatlong probinsya na Palawan Del Norte, Del Sur, at Oriental.
Sa huli, nagpasalamat ang poll body sa mga taga-Palawan na lumahok sa makasaysayang plebisito.
Pagbabawalan nang lumabas ang mga menor-de-edad sa National Capital Region simula bukas, ika-17 ng Marso.
Ito ang inihayag ng Metro Manila Development Authority (MMDA) dahil sa patuloy na pagtaas ng kaso ng coronavirus disease 2019 (COVID-19) sa bansa.
Ayon sa MMDA, binabalangkas na ng Metro Manila Council (MMC) ang resolusyon para sa mas mahigpit na pagpapatupad na health measures kung saan sakop nito ang 17 local government unit sa rehiyon.
Sa ilalim ng resolusyon, pinapayagang lumabas ng bahay ay edad 18 hanggang 65-anyos habang pinagbabawalan naman ang edad 15 hanggang 17-anyos na tatagal ng dalawang linggo.
Mahigit 200 volcanic earthquake ang naitala sa paligid ng Taal Volcano sa nakalipas na 24-oras.
Ayon ito sa PHIVOLCS sa gitna pa rin nang pananatili ng Alert Level 2 sa Bulkang Taal.
Sa kabuuang 252 volcanic earthquakes, 17 ang tumagal ng isa hanggang apat na minuto.
Ipinabatid pa ng PHIVOLCS ang bahagyang paglabas ng usok sa tuktok ng Bulkang Taal na umabot sa mas mataas sa 10 metro.
Nakapagtala ng pinakamaraming kumpirmadong kaso ng Human Immunodeficiency Virus (HIV) sa taong ito ang unang distrito partikular ang Midsayap sa lalawigan ng Cotabato.
Batay sa record, nasa 30 indibidwal ang kumpirmadong apektado ng HIV sa Midsayap, Pigcawayan at Aleosan.
Ayon sa health experts, malaking tulong ang malawakang kampanya ng gobyerno maging ng pribadong sektor para maikalat ang mga impormasyon hinggil sa HIV at mahimok na rin ang mga tao na sumailalim sa HIV test kasunod ng mataas na bilang ng mga naserbisyuhan ng HIV testing hub na nakabase sa Midsayap.
Hinikayat naman ng local health officials ang mga mamamayan na magtungo na lamang sa Amado Diaz Provincial Hospital sa Bayan ng Midsayap para makapagpasuri kotra HIV na anila’y libre naman at confidential ang mga impormasyon ng mga kliyente.