RONDA PROBINSYA

Aabot sa P6.8 milyon halaga ng hinihinalang shabu ang nasabat ng mga awtoridad mula sa dalawang drug suspek sa buy-bust operation sa Barangay Kalanagan sa bayan ng Pantar, Lanao del Norte.

Ang mga suspek na sina alyas Nena at alyas John ay nadakip ng pinagsanib na puwersa ng Philippine Drug Enforcement Agency-Northern Mindanao (PDEA), National Bureau of Investigation at Pantar PNP.

Samantala, anim naman ang nasakote ng mga ahente ng PDEA sa Barangay Hinaplonan sa Iligan City kung saan tinatayang P68,000 na halaga ng pinaniniwalaang shabu ang nakumpiska mula sa mga ito.

Kasong paglabag sa Comprehensive Dangerous Drugs Act ang isasampa laban sa mga suspek.

Nagpatupad ng balasahan ang pamunuan ng Philippine National Police (PNP) sa Calbayog City Police Office sa lalawigan ng Samar.

Ito’y kasunod ng nangyaring pagkamatay ni Calbayog City Mayor Ronaldo Aquino at ng limang iba pa kabilang na ang tatlong pulis.

Ayon kay PNP officer in charge P/LtG. Guillermo Eleazar, sinibak sa puwesto ang chief of police ng Calbayog City na si P/LtC. Niel Montaño gayundin ang siyam na mga tauhan nito.

Papalitan si Montaño ni P/LtC. Rodolfo Alborta habang si P/Maj. rUEL BURLAT naman ang uupo bilang bagong hepe ng kanilang intellegence unit kapalit ni P/LtC. Fernando Calabria Jr. na una nang sinibak sa puwesto.

Magugunitang sinibak si Calabria sa puwesto matapos namang humingi sa korte ng listahan ng mga abogadong kumakatawan sa mga indibiduwal na nai-uugnay sa CPP-NPA.

Nagpapatuloy ang bilangan ng boto sa Palawan kasunod ng isinagawang plebesito roon para hatiin sa tatlo ang kanilang lalawigan.

Ayon kay Commission on Elections (Comelec) Spokesman James Jimenez, nangunguna ang botong “no” sa partial at unofficial results.

Ginawa ang plebesito sa Palawan para ratipikahan ang Republic Act 11259 na nilahukan ng mga residente mula sa 23 bayan sa lalawigan.

Sa ilalim ng ipinasang batas, hahatiin ang Palawan sa tatlo na kinabibilangan ng Palawan Del Sur, Palawan Del Norte at Palawan Oriental na siyang pagtitibayin naman kung papaboran ng mga Palaweño.

Umarangkada na ngayong araw ang plebisito para hatiin sa tatlo ang probinsya ng Palawan.

Ayon sa Commission on Elections (Comelec), higit 490,000 na mga botante ang nakarehistro sa Palawan mula sa 23 mga munisipyo nito.

Sa naturang plebisito, kinakailangang bumoto ng mga residente ng yes o kaya’y no para makuha ang kanilang pulso hinggil sa paghahati ng kanilang probinsya.

Oras paboran ang paghahati ng Palawan o ratification ng RA 11259, mahahati ang probinsya sa tatlo.

Ito ang Palawan Del Norte, Oriental, at Del Sur.

Habang ang kabisera naman ng Palawan Del Norte ay Taytay, Roxas ang magiging kabisera ng Palawan Oriental, at Brooke’s Point naman sa Palawan Del Sur.

Mariing itinanggi ng pamunuan ng Philippine National Police (PNP) na pinigilan o ginawang hostage ng mga pulis ang labi ng apat na aktibista sa Antipolo City.

Ayon kay PNP Spokesman P/BGen. Ildebrandi Usana, pawang kasinungalingan ang pinalulutang ng mga militante kung ang pagbabatayan ang ulat ng Rizal Provincial Police Diretor Na Si P/Col. Joseph Arguelles.

Giit ng tagapagsalita ng PNP, ang mga aktibista tulad ng grupong “karapatan” ang siyang unang nagpumilit na pasukin ang Antipolo Memorial Homes kasama ng pamilya ng mga nasawi subalit walang abiso.

Paliwanag pa ni Usana, nais ng may-ari ng punerarya na tanging ang pamilya lamang ng mga nasawi ang papasukin bilang pagtalima na rin sa health protocols lalo’t marami aniyang tao nang mga sandaling iyon.

Giit ni Usana, sa mga miyembro lamang ng pamilya uubrang ibigay ang labi ng kanilang ka-anak kaya’t nagpasaklolo na sa PNP ang may-ari ng punerarya para kasuhan ang mga militante dahil sa panggugulo nito.

Muling isasailalim sa autopsy ang labi ng mga aktibistang pinatay umano ng pulisya sa tinaguriang “bloody sunday” operations sa CALABARZON nuong isang linggo.

Ito ang inihayag ni Bagong Alyansang Makabayan o Bayan – Southern Tagalog Spokesman Casey Cruz matapos na makuha na ng pamilya ang labi ng kanilang mga ka-anak sa Antipolo Memorial Homes.

Ayon kay Cruz, kabilang sa mga isasailalim sa re-autopsy ang labi nila Randy at Puroy Dela Cruz; Edward at Abner Esto; Melvin Dasigao at Mark Lee Bacasno na siyang target ng operasyon ng mga pulis at sundalo.

Gayunman, sinabi ni Cruz na mananatiling confidential sa pamilya ang magiging resulta ng re-autopsy sa tulong ng mga para-legal experts mula sa kanilang hanay.

Kasunod nito, nanindigan si Cruz na itutuloy nila ang paghahain ng counter charges laban sa mga tauhan ng pnp partikular na ang Criminal Investigation and Detection Group (CIDG).

Magugunitang nagkainitan ang mga militante at mga pulis matapos umanong i-hostage nito ang labi ng mga napatay sa operasyon kontra loose firearms.

Inaalam na ng Police Regional Office 4B o MIMAROPA PNP kung sinu-sinong mga pulis at sibilyang nakasalamuha ni Philippine National Police (PNP) Chief P/Gen. Debold Sinas.

Ito’y makaraang ipag-utos ni MIMAROPA PNP Director P/BGen. Pascual Muñoz Jr. ang masinsinang contact tracing makaraang magpositibo sa COVID-19 ang PNP chief.

Kasalukuyang naka-quarantine na rin si Muñoz matapos maging close contact ng PNP chief bilang pagsunod na rin sa umiiral na health protocols sa COVID-19.

Nakikipag-ugnayan din ang regional health service ng MIMAROPA PNP sa may-ari ng resort kung saan unang namalagi si Gen. Sinas at isinailalim na rin iyon sa disinfection.

Magugunitang nagtungo sa punong tanggapan ng PNP  si sinas nuong Marso 11, ang araw kung kailan lumabas ang resulta ng kaniyang swab test na nagsasabing positibo siya sa virus.

Gayunman, nanindigan si Muñoz na sumunod ang lahat ng mga nasa loob ng kampo sa minimum health protocols tulad ng pagsusuot ng facemask, face shield, proper hygine at pagpapanatili ng physical distancing.

Namahagi ng tulong ang pamunuan ng Philippine Coast Guard (PCG) sa 50 pamilya sa Barangay Aya sa Talisay Batangas na nawala ng tirahan dahil sa patuloy na pagtaas ng alert level ng Taal Volcano.

Sa pagbisita ng PCG sa Batangas, nakasama nitong mamahagi ng mga food packs at ibang kagamitan ang iba’t-ibang sangay ng kanilang ahensya.

Sa huli, nagpaalala ang mga awtoridad sa publiko na patuloy na tumutok sa anumang impormasyon o babala ng pamahalaang lokal hinggil sa sitwasyon ng bulkan.