RONDA PROBINSYA

Tumaas ang bilang ng mga turistang nasa Boracay sa unang araw na pinayagan ang paggamit ng saliva RT-PCR test.

Ipinabatid ni Felix Delos Santos, Jr., pinuno ng Malay Municipal Tourism Officer, umabot ng 1,065 tourist ang dumating sa Boracay kumpara sa mga dumating ditong turista noong ika-13 ng Marso na nasa 967 lamang.

Sinabi ni Delos Santos na ito na ang pinakamataas na tourist arrival na naitala simula nang buksan ang isla sa domestic tourist noong Oktubre at mga taga-Metro Manila pa rin ang mga nangungunang bisita rito.

Matapos magpalabas ng advisory si Aklan Fgovernor Florencio Miraflores noong ika-19 ng Marso, naging epektibo na ang paggamit ng mas mura at mas mabilis na saliva coronavirus disease 2019 (COVID-19) test bilang alternatibo sa swab test na maaaring maging dahilan nang pagbuhos ng mga turista sa susunod na mga araw.

Pumalo na sa higit 19,000 na mga indibidwal ang nasawata ng mga awtoridad dahil sa paglabag sa umiiral na curfew hours sa Metro Manila bilang pag-iingat sa banta ng COVID-19.

Sa datos na hawak ng Philippine National Police (PNP), sinabi ni PNP OIC PLt. Gen Guillermo Eleazar na umabot na ang kabuuang bilang ng mga curfew violators sa rehiyon sa bilang na 19,628.

Sa naturang bilang, 6,048 ang mga ito ay pinagsabihan lang ng mga awtoridad hinggil sa kanilang paglabag sa umiiral na curfew, habang ang 7,326 ang pinagmulta, at iba pa.

Mababatid na higit 19,000 mga curfew violators, 5,865 sa mga ito ay naitala ng Manila Police District; higit 4,000 sa Southern police district; 3,614 sa Eastern police district; habang ang mga nalalabi ay nahuli naman ng iba pang sangay ng pulisya sa Metro Manila.

Inilunsad ng Pambansang Pulisya ang manhunt operations laban sa communist terrorists group na nanambang sa kanilang mga kabaro na nauwi ng pagkasawi ng limang katao at dalawang sugatan.

Inatasan ni PNP-OIC Lt. Gen. Guillermo Eleazar ang pro-4a-Regional Police Director BGen. Felipe Natividad at Pro-5-Regional Police Director BGen. Bartolome Bustamante na makipagtulungan sa kanilang mga counterparts sa hanay ng AFP para sa ikakasang hot pursuit operations laban sa komunistang grupo.

Ani Eleazar, ang pag-ambush sa mga alagad ng batas ay patunay lamang na wala talagang balak ang mga makakaliwang grupo sa pangmatagalang kapayapaan sa pamahalaan.

Sa huli, tiniyak ng PNP na ibibigay nito ang lahat ng tulong na kanilang makakaya sa pamilya ng mga nasawing alagad ng batas at ang kanilang taos pusong pakikiramay at pagsaludo sa mga ito.

Nagkaroon na ng B.1.1.7 COVID variant at mutations sa Caraga Region.

Ito ang kinumpirma ng Department of Health Caraga matapos umanong magpositibo sa bagong variant ang isang residente habang dalawang mutations naman ang isinasailalim sa imbestigasyon.

Ayon kay DOH regional director Cesar Cassion, ito’y batay sa isinumiteng samples sa Philippine Genome Center (PGC).

Sinasabing mula sa isang returning overseas Filipino na taga-Bislig City, Surigao del Sur ang nagpositibong B.1.1.7 variant habang ang sinusuri pang mutations ay galing sa mga residente ng Bislig at Buenavista sa lalawigan ng Agusan del Norte.