RONDA PROBINSYA

Umapela ang Lokal na Pamahalaan ng Iloilo City sa Inter-Agency Task Force (IATF) na itaas ang kanilang quarantine classification dahil sa patuloy na pagdami ng kaso ng coronavirus disease 2019 (COVID-19) sa lungsod.

Ayon kay Mayor Jerry Treñas, hiniling niya mismo sa IATF na gawing modified enhanced community quarantine (MECQ) ang status sa lungsod mula sa modified general community quarantine (MGCQ).

Ani Treñas, sa pagdami ngayon ng COVID-19 case sa maraming barangay sa lungsod, mahirap ng tukuyin kung saan talaga ito nagmumula.

Ramdam na rin aniya na unti-unti nang napupuno ng mga pasyenteng tinamaan ng COVID-19 ang mga ospital sa lungsod.

Naitala ang tahimik na pagbuga ng steam plume o singaw ng main crater ng Bulkang Taal ngayong umaga ng Biyernes.

Ayon sa PHIVOLCS, nagsimula ang pasulpot-sulpot na pagbuga ng singaw dakong alas-11 ng umaga ng Huwebes kasabay ng pagsisimula rin ng pag-ulan.

Wala namang naitalang volcanic earthquakes at infrasound sa Bulkang Taal mula ala-1 ng hapon, kahapon, Huwebes.

Pinawi naman ng PHIVOLCS ang pangamba ng publiko hinggil dito dahil inaasahan na anila ang mga ganitong uri ng pangyayari dahil nananatili pa rin namang nakataas sa Alert Level 2 ang bulkan.

Patuloy naman ang pagbabantay ng PHIVOLCS sa mga aktibidad ng Bulkang Taal.

Nanawagan ng tulong ang Puerto Princesa para sa karagdagang health workers bunsod ng patuloy na pagtaas ng kaso ng coronavirus disease 2019 (COVID-19) sa kanilang lugar.

Ayon kay Mayor Lucilo Bayron, humiling na sila sa national at regional Inter-Agency Task Force Against COVID-19, para madagdagan ang kanilang medical frontliners.

Ani Bayron, nalalagay sa alanganin ang mga quarantine facilities dahil sa limitadong health workers.

Natigil din umano pansamantala noong ika-10 hanggang ika-15 ng Mayo ang operasyon ng RT-PCR testing center ng Puerto Princesa dahil sa maintenance na nagresulta sa mga backlog.

Dahil dito, nakatakda umanong bumisita sa lungsod sina testing czar Secretary Vince Dizon, vaccine czar Secretary Carlito Galvez  Jr. at mga miyembro ng regional IATF.

Pinutulan ng kuryente ang islang bayan ng Rapu-Rapu sa Albay.

Ito, ayon kay Lesley Capus, head ng institutional relations and customer ng Albay Power and Energy Corporation (APEC), ay dahil sa P32-milyong utang sa kanila sa singil  sa kuryente ng mahigit 1,000 member consumers nila simula pa noong 2014.

Sinabi ni Capus na P15-milyon ang hinihingi nilang bayad para huwag nang ituloy ang pagputol ng supply ng kuryente subalit mahigit P3-milyon pa lamang ang ibinayad sa kanila.

Taong 2018 pa lamang ay naniningil na sila sa Rapu-Rapu residents dahil hindi naman kayang abonohan ng APEC ang binibili nilang kuryente sa National Power Corporation.

Inihayag naman ni Rapu-Rapu Mayor Boy Galicia na posibleng ang kawalan ng opisina ng APEC ang dahilan kaya’t hindi nakakabayad ang mga residente.

Ipinabatid ni Galicia na mayroong payment outlet sa isla subalit may charge, samantalang mayroon ding collector subalit isa o tatlong beses kada taon.