RONDA PROBINSYA

Puno na ang mga ospital sa Puerto Princesa City dahil sa patuloy na pagtaas ng kaso ng coronavirus disease 2019 (COVID-19).

Ayon kay Mayor Lucilo Bayron, kasalukuyang naka-admit ang 59 na COVID-19 patient sa ospital ng Palawan.

Sa dalawa umanong pribadong ospital ay mayroon lang 14 na kamang nakalaan para sa mga COVID-19 patient.

Sinabi pa ni Bayron na umaabot ng dalawang araw ang paghihintay ng COVID-19 patients bago sila ma-admit sa ospital.

Kasabay nito, nanawagan na rin ang alkalde sa pamahalaan ng dagdag na health workers.

Nagulo ang konsultasyon sa bayan ng Irosin, Sorsogon kaugnay sa anti-coronavirus disease 2019 (COVID-19) information caravan ng lalawigan.

Kasunod ito nang pagsasaboy ng tubig ni Board Member Ed Atutubo kay Konsehal Salome Navales matapos ang sagutan ng mga ito hinggil sa layunin ng nasabing caravan dahil sa concern ng konsehal na gawin sa ibang paraan ang nasabing hakbangin.

Iginiit ni Atutubo na nakasaad mismo sa Executive Order No. 12 na inisyu ni Sorsogon  Governor Chiz Escudero ang pagbuo ng COVID-19 Task Force on Information Dissemination para mabigyan ng sapat na kaalaman ang mga kabataan sa lalawigan sa mga dapat gawin upang maiwasan ang hawahan sa COVID-19.

Itinanggi ni Atutubo ang alegasyon ng konsehala na nilapitan lamang niya para ipakita ang mga litrato ng ilang residente sa bayan na hindi simusunod sa health protocols at aksidente lamang ang pagkakatapon ng tubig mula sa hawak niyang bottled water sa damit nito.

Hindi naman natapos ang kaguluhan nang suntukin umano ni Atutubo si Municipal Administrator Lorenzo Ubalde na inamin ng bokal subalit hindi aniya siya ang nauna at nagkaayos naman sa bandang huli.

Subalit ipina-blotter at ipinaabot na ni Navales sa Department of the Interior and Local Government  (DILG) ang ginawa sa kanya ni Atutubo.

Binigyang diin ni Atutubo na walang kinalaman sa pulitika ang information caravan.

Nasawi ang isang 63 taong gulang na lolo makaraang barilin umano ng nakababata nitong kapatid sa Ma-ayon, Capiz.

Naisugod pa sa ospital ang biktimang si Alfredo Dumagpi pero idineklarang dead on arrival dulot ng tinamong malubhang sugat sa tiyan.

Sa imbestigasyon, nagkaroon ng pagtatalo ang biktima at ang asawa ng suspek hanggang sa kumuha ng kumuha ng baril ang salarin at pinaputukan si Dumagpi.

Tinutugis na ng mga awtoridad ang suspek na agad na tumakas matapos ang pamamaril.

Kasado na ang lockdown sa 12 barangay sa Bacarra, Ilocos Norte bunsod ng patuloy na pagtaas ng COVID-19 cases sa lugar.

Ayon sa Bacarra LGU, epektibo ang modified enhanced community quarantine (MECQ) simula bukas, Mayo 24.
Matatandaang ikinaalarma ng mga residente ang pagdami ng kaso sa kanilang bayan matapos makapagtala ng ‘zero cases’ sa loob ng ilang buwan.

Nabatid na nasa 110 na ang aktibong kaso sa Bacarra mula sa 430 active cases sa buong lalawigan ng Ilocos Norte.

Napilitang lumikas ng kanilang tahanan ang ilang pamilya sa Isulan, Sultan Kudarat, matapos ang nangyaring pagbaha.

Ayon sa lokal na pamahalaan ng Isulan, karamihan sa pamilyang ito ang pansamantalang nananatili ngayon sa waiting shed matapos na umapaw ang Ala River dahil sa patuloy na pagbuhos ng ulan.

Nagsasagawa na ngayon ng damage assessment ang local government ng Isulan sa mga lugar na naapektuhan ng pagbaha kasabay ng pamamahagi ng mga food packs sa mga evacuee.

Una nang sinabi ng PAGASA na ang nararanasang mga pag-ulan sa Southern Mindanao ay dulot ng intertropical convergence zone (ICZ).