RONDA PROBINSYA

Naglunsad na ng imbestigasyon ang lokal na pamahalaan ng Cebu kaugnay sa naganap na mass gathering sa isang bar sa lungsod.

Ayon kay Cebu Mayor Edgardo Labella, bilang bahagi ng imbestigasyon, inisyuhan na ng show-cause order ang pamunuan ng naturang bar para pagpaliwanagan kaugnay sa nasabing insidente.

Ani Labella, isa sa mga depensa sa naturang ay insidente ay dahil umulan  umano kaya napilitan ang mga nasa labas na pumasok sa loob ng bar at magsiksikan para di mabasa ng ulan.

Pagtitiyak ng alkalde, babawiin ang permit ng naturang establisyimento sa oras na mapatunayang may nilabag ito.

Nasawi ang dalawang biker sa naganap na pagsabog ng isang pinaghihinalaang anti-personnel land mine (APM) sa Masbate City noong Linggo, ika-6 ng Hunyo, 2021.

Base umano sa isinagawang imbestigasyon, papunta ang mga biktima sa Barangay B. Titong nang tamaan ang mga ito ng sumabog na land mine na pinaghihinalaang itinanim ng mga myembro ng New People’s Army (NPA).

Ayon sa inilabas na pahayag ng pulisya, nasawi ang magpinsang sina Keith Absalon, edad 21 taong gulang at isang varsity player sa FEU at si Nolven Absalon, na edad 40 taong gulang.

Habang sugatan naman at ginagamot sa hospital ang anak ni Nolven na si Chrisbin Daniel Absalon, edad 16 taong gulang.

Samantala, naghigpit naman ng seguridad ang mga pulis sa Masbate City matapos ang pangyayari.

Patuloy naman ang paggulong ng imbestigasyon at paghanap sa kinaroroonan ng mga salarin.

Patay ang isang hinihinalang Abu Sayyaf bomb maker matapos makasagupa ng mga pulis sa Basilan.

Ayon kay Philippine National Police (PNP) Chief Gen. Guillermo Eleazar, ang suspek na si Aroy Ittot o mas kilala bilang “Oroy” ay sisilbihan sana ng warrant of arrest para sa kasong murder nang paputukan nito ang mga arresting officers gamit ang M16 rifle.

Dito na napilitang gumanti ang mga awtoridad na nagresulta sa kamatayan ni Oroy.

Isa umano si Oroy sa mga tauhan ng yumaong Abu Sayyaf Group sub-leader na si Furuji Indama at sinasabing sangkot sa pambobomba sa convoy ni Mayor Durie Kalahal ng Tuburan, Basilan noong 2018.

Narekober sa pinangyarihan ng insidente ang isang M16 rifle, isang M14 rifle, ilang piraso ng bala, at grenade rifles.

Mahigit P2 milyong halaga ng hinihinalang shabu ang nasabat ng mga awtoridad sa tatlong suspek sa anti-illegal drug operation sa bayan ng Kalilangan sa Bukidnon.

Kinilala ni PNP Chief Gen. Guillermo Eleazar ang mga suspek na sina Jabir Dacula Mandok, Jucair Mandok at Sittie Mandok na parehong kasama sa drugs watch-list ng pulisya.

Nasa 300 gramo ng hinihinalang shabu na may halagang P2.04 million ang nasabat mula sa mga suspek na ngayo’y nahaharap sa kasong paglabag sa Comprehensive Dangerous Drugs Act.

Isa ang kumpirmadong patay habang sugatan naman ang dalawang iba pa sa salpukan ng isang motorsiklo at humaharurot na pickup sa national highway sa Barangay del Pilar, bayan ng Mabini, Davao de Oro.

Kinilala ang nasawi na si Gemman Sobriano habang ginagamot naman sa ospital ang kanyang mag-ama na si Arjie Masillones at ang kanilang isang taong gulang na anak.

Nabatid na lulan ng motorsiklo ang mag-ina na minamaneho ni Masillones nang banggain ng pickup mula sa kabilang lane.

Agad namang tumakas ang pickup driver matapos ang pangyayari.

Iniimbestigahan pa ng pulisya ang nasabing aksidente.