RONDA PROBINSYA

Humingi ng tawad ang Communist Party of the Philippines – New People’s Army (CPP-NPA) sa pamilya ng magpinsang sina Keith at Nolven Absalon.

Ito’y kasunod ng malagim na pagkasawi ng dalawa matapos masabugan ng landmine habang nagbibisikleta sa Brgy. Anas, Masbate City, kamakailan.

Ayon kay Marco Valbuena, tagapagsalita ng komunistang grupo, pinagsisisihan nila ang sinapit ng magpinsan dahil sa pagkakamali sa kanilang opensiba laban sa mga kawal ng pamahalaan.

Handa rin aniya silang magbigay ng karampatang danyos sa pamilya ng magpinsan kasabay ng pag-ako sa malagim na insidente.

Gumagawa na rin ng pagwawasto ang mga rebelde sa kanilang hanay upang hindi na maulit ang kahalintulad na pangyayari.

Inaasahang makababalik na sa kani-kanilang mga tahanan ang mga bakwit o mga residenteng naapektuhan ng may limang buwang bakbakan sa Marawi City noong 2017.

Ito’y ayon sa Lanao Del Sur People’s Council dahil sa mabilis na progreso ng ginagawang rehabilitasyon sa lungsod matapos ang madugong Marawi siege.

Ayon kay Padoman Paporo, pangulo ng grupo, naitayo na rin ang public utilities sa lungsod mula nang gawing full blast ang rehabilitasyon nito noong Hulyo ng isang taon.

Dahil dito, malaki ang pagpapasalamat ni Paporo kay Pangulog Rodrigo Duterte, gayundin sa 56 na ahensya ng pamahalaan na nagtutulungan upang mapabilis ang pagbangon ng lungsod.

Mariing kinondena ng Philippine National Police (PNP) ang ginawang pagpapasabog ng mga miyembro ng New People’s Army (NPA) na ikinasawi ng football player ng Far Eastern University (FEU) na si Keith Absalon at ikinasugat ng pinsan nito sa Masbate City.

Ayon kay PNP Chief P/Gen. Guillermo Eleazar, kaniya nang inatasan ang Bicol PNP na magkasa ng manhunt operation laban sa NPA na kumitil sa isang itinuturing na pag-asa sa larangan ng football sa bansa.

Batay sa ulat, isang landmine ang pinasabog ng mga rebelde habang nagbibisikleta ang magpinsan sa Brgy. Anas, Masbate City, Linggo ng umaga.

Kasunod nito, inatasan ni Eleazar ang mga lokal na pulisya na paigtingin pang lalo ang police visibility sa kanilang nasasakupan upang matiyak ang kaligtasan ng publiko.

Dinapuan ng COVID-19 si Occidental Mindoro Governor Eduardo Gadiano.

Batay sa post online ni Gadiano, sinabi nito na positibo ang lumabas sa swab test na isinagawa sa kanya.

Dagdag pa ni Gadiano na nakaranas siya ng ilang sintomas gaya ng ubo, panghihina ng katawan maging ang lagnat.

Dahil dito, agad na nag-isolate si gadiano at nakatakda na ring i-swab ang mga kasamahan sa kanilang tahanan.

Sa huli, nanawagan si Gadiano sa lahat ng mga nakasalamuha noong Hunyo 3 at 4 na sumunod sa health protocols kontra COVID-19 para maiwasan ang hawaan pa ng virus.

Isinailalim sa general community quarantine (GCQ) ang halos lahat ng mga lungsod at bayan sa probinsya ng Albay.

Sang-ayon sa kautusan ni Albay Governor Al Francis Bichara, ang naturang kautusan ay batay na rin sa report ng Department of Health–Bicol Center for Health Development kung saan nakita ang patuloy na pagsipa ng kaso ng virus sa kanilang probinsya.

Mababatid na napagkasunduan ng Bicol Task Force katuwang ang mga local chief executives na isailalim sa naturang quarantine status ang lahat ng mga lungsod at munisipalidad sa probinsya.

Maliban na lamang sa mga munisipalidad ng Jovellar at Rapu-Rapu hanggang sa 15 ng Hunyo.

Dahil dito, ipinag-utos ang pagpapatupad ng mahigpit na quarantine protocols kontra COVID-19.

Ibig sabihin, hindi pwedeng lumabas ang mga indibidwal 18-anyos pababa at 65-anyos pataas–maliban na lamang kung may importanteng bibilhin o gagawin.

Paiiralin din ang 50/50 work-from-home status at on-site capacity.