RONDA PROBINSYA

Nananatiling suspendido ang trabaho sa municipal treasurer’s office ng San Antonio, Zambales simula pa noong Miyerkules matapos magpositibo sa COVID-19 ang walo sa kanilang empleyado.

Napilitan din ang ilan pang tanggapan sa munisipyo na mag-suspinde ng trabaho pero agad din nagbalik operasyon.

Sa ngayon ay mayroon ng 2,890 COVID-19 cases sa Zambales simula nang pumutok ang pandemya noong isang taon.

Nasa 706 ang active cases habang 2,123 na ang nakarekober at 60 na ang namatay. — sa panulat ni Drew Nasino.

Muling isasailalim sa dalawang linggong modified enhanced community quarantine (MECQ) ang Borongan City, Eastern Samar.

Simula bukas, ika-13 ng Hunyo ay ipatutupad ang mas mahigpit na MECQ upang mapabagal ang pagkalat ng COVID-19.

Ipinag-utos na ni Borongan City Mayor Jose Ivan Agda ang pagbabawal sa lahat ng uri ng mass gatherings at pagpapasara ng mga tourist destination at recreational establishment.

Ipagbabawal din ang pag-inom ng alak sa publiko habang epektibo ang curfew hours simula alas otso ng gabi hanggang ala singko ng umaga.

Sa kasalukuyan ay mayroong 43 active cases sa lungsod kabilang na ang pitong fatalities. — sa panulat ni Drew Nasino.

Tumanggi ang Communist Party of the Philippines (CPP) na isuko sa pamalahaan ang mga miyembro ng New People’s Army (NPA) na umako sa pagkamatay ng FEU football player na si Keith Absalon at kanyang pinsang si Nolven sa Masbate.

Ito ang tugon ng CPP matapos hamunin ni Armed Forces of the Philippines Spokesman, Maj. Gen. Edgard Arevalo ang mga komunista na isuko sa gobyerno ang mga rebeldeng sangkot sa pagpapasabog ng landmine na ikinasawi ng magpinsan.

Ayon kay Marco Valbuena, chief information officer ng CPP, hindi naman sa ayaw nilang bigyang katarungan ang mga naulila, pero dahil ang rebeldeng grupo ang may hurisdiksyon sa mga akusado.

Una nang inako ng CPP-NPA ang pagkamatay ng mga absalon matapos magkamali umano sa isinagawang aksyon ang mga rebelde bagay na kanilang ipinaghingi ng tawad sa pamilya ng mga biktima. — sa panulat ni Drew Nasino.

Arestado ng mga operatiba ng Philippine National Police (PNP) Criminal Investigation and Detection Group (CIDG) Rizal ang mastermind sa Wahana Credit and Loan Corporation Investment Scam na bumibiktima sa mga pulis.

Kinilala ang utak sa nasabing investment scam na si dating Police Corporal Michael Yap na nahaharap sa 15 bilang ng estafa.

Ayon kay CIDG Rizal Provincial Chief Police Major Dave Anthony Capurcos, maraming nawala sa serbisyo at nag-away na magkakamag-anak dahil sa nasabing investment scam na tumiba ng milyun-milyong piso mula sa mga naloko nitong pulis.

Sinabi ni Yap na tinangka niyang bawiin ang pera o naiinvest ng mga kabaro niya subalit nabigo siya dahil wala nang naibigay sa kanya ang kumpanya.

Inilagay naman aniya niya ang pera sa Wahana at hindi ito ibinulsa kaya’t wala talaga siyang hawak na pera na ininvest ng mga pulis at maging ang kaniyang mga biyenan ay biktima rin.

Magugunitang 2019 nang magpasaklolo sa mga otoridad ang mahigit 300 katao para tugisin ang limang suspek na nasa likod ng investment scam na nanloko sa kanila, subalit 2018 nang umamin si Yap na mayroong problema sa pondo at nangakong babayaran ang investors.